Европа
Германците го поддржуваат планот за Грција, Меркел мора да ги убеди пратениците
Повеќе од половината Германци го поддржуваат третиот пакет за меѓународна финансиска помош за Грција, по постигнатиот договор на самитот на еврозоната во Брисел, но големо мнозинство се сомневаат во подготвеноста на Атина да ги спроведе неопходните реформи, покажа анкетата направена во понеделникот.
По 17-часовните преговори челниците на земјите членки на еврозоната, едноставно ја принудија Грција да предаде дел од суверенитетот на надворешните супервизори, и за возврат се согласија да преговараат за помошта во износ од 86 милијарди евра во следните три години по линија на Европскиот механизам за стабилизација (ESM), за Грција којашто технички е во банкрот откако на 30-ти јуни не успеа да ги плати ратите кон Меѓународниот монетарен фонд (ММФ), а веќе на 20-ти јули ѝ доспева за наплата ратата од 3,6 милијарди евра од заемот од Европската централна банка (ЕЦБ).
Грчката влада сега доби прецизни термини до кои треба да се придржува и да ги применува непопуларните реформи на зголемување на данокот на додадена вредност (ДДВ) во одредени сектори, реформа на пензискиот систем, приватизацијата, да ги измени правилата за банкрот, да воведе буџетски кастрења и да ги донесе законите за банките кои важат во Европската унија.
Германија којашто е најголемиот грчки доверител поединечно и чии приватни доверители најмногу учествуваа во отпишувањето на дел од долгот во износ од 107 милијарди евра, имаше најцврст став во еврозоната во однос на мерките на коишто Грција треба да се обврзе за да остане во зоната на користење на еврото.
Во испитувањето на јавното мнение коешто го спровела агенцијата Infratest, 52 отсто од испитаниците во Германија сметаат дека е добро да ѝ се помага на Германија, а 33 проценти сметаат дека тоа не е добра одлука. На прашањето за реформите и намалувањето на јавната потрошувачка кои Атина мора да ги спроведе, 57 отсто од испитаниците сметаат дека зададените мерки се соодветни, а 22 отсто ги смета за недоволни. Само 13 проценти од Германците сметаат дека условите се престроги, а речиси четвртината од испитаниците сметаат дека на Грција не може да ѝ се верува дека ќе ги спроведе реформите.
Од друга страна, откако помогна да се направат чекорите со кои на Грција ѝ се овозможува да добие нова програма за финансиска помош, германската канцеларка Ангела Меркел сега ја очекува нова тешка задача, односно во тој план да ги увери и скептичните членови на својата конзервативна коалиција, пишува агенцијата DPA.,
Германскиот Бундестаг (парламентот) ќе заседава кон крајот на седмицава кога ќе треба да донесе одлука дали на својата влада ќе ѝ даде мандат за натамошни преговори за новиот тригодишен план за спасување на Грција. Меѓутоа, повеќе од петмесечните напорни преговори со Грција ги оставија пратениците на пратеничката група на христијанските демократи на Меркел неподготвени да одлучат да ја финансираат Грција со дополнителни пари на германските даночни обврзници.
„Меркел, како и секој демократски челник, сака да победи на следните избори. Таа размислува за германскиот заеднички политички консензус за штедење“, смета Ирвин Колиер од берлинскиот Институт „Џон Ф. Кенеди“ и појаснува дека германската канцеларка не смее да ризикува на домашен терен да добие негативен ефект од впечатокот дека се согласила на премногу отстапки кон Атина.
Се смета, сепак, дека грчката драма може да стане „моментот на вистината“ за германската канцеларака како главен европски лидер, бидејќи со години се таложат доказите дека договорот во Брисел склучен во понеделникот во мугрите може да има неочекувана цена.
Меркел оди по жица, се истакнува во анализата на DPA. Од една страна, се обидува да го задуши можниот бунт во својата влада со наметнување на многу строги услови за Грција, а , од друга страна, мора да се грижи нејзиното политичко наследство и германското долгогодишно настојување Европа повеќе да биде интегрирана, да не биде засенето од грчкото излегување од еврозоната./крај/мф/сн
Извор: DPA
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Шолц: Војната во Украина може да трае уште неколку години
Германскиот канцелар Олаф Шолц изјави дека верува оти војната во Украина може да се пролонгира уште неколку години.
„Никој не може да каже дали оваа војна ќе трае можеби пет години“, рече Шолц вечерва во источниот германски град Кемниц.
Тој ја бранеше германската воена помош за Украина и додаде дека заедно со неа мора да се негува и дипломатијата.
„Меѓутоа, од почетокот на војната, рускиот претседател Владимир Путин не покажа знаци на движење напред“, рече тој.
„Диктиран мир е неприфатлив. Не смее да се дозволи да се извлече со ова“, додаде германскиот канцелар.
Европа
Лавров: Москва се уште инсистира на вистинска руска Украина
По повеќе од две години интензивна војна во Украина, рускиот министер за надворешни работи Сергеј Лавров денеска го потврди тврдењето на Москва дека полага право да владее над соседната земја.
„Во најдобар случај, иднината на западна Украина е непозната“, рече Лавров во интервјуто во Москва за неколку руски телевизиски станици.
„Во спротивно ќе има само Украина која е навистина руска, која сака да биде дел од рускиот свет, која сака да зборува руски и да ги образува своите деца“, рече тој.
Не станува збор за каква било алтернатива, смета Лавров, кој е министер за надворешни работи од 2004 година и е лојален поддржувач и доверлив човек на претседателот Владимир Путин.
Русија не сака да ги напаѓа земјите на НАТО, како што се тврди на Запад за да ги исплаши гласачите, рече Лавров. „Но, ако сакаат да го донесат НАТО до нашите граници, тогаш секако дека ќе знаеме како да го спречиме тоа во Украина“, рече тој.
Како и другите високи членови на руското раководство, Лавров рече дека Русија е подготвена за преговори со Украина, но само под посебни услови.
Нема да има прекин на огнот за време на можните преговори, разговорите со украинскиот претседател Володимир Зеленски се бесмислени, а Киев мора да се откаже од својата формула за мир, рече тој.
Во есента 2022 година, Зеленски презентираше десет точки за мир, меѓу кои се издвојуваат повлекувањето на руската армија, реконструкцијата и компензацијата и гонењето на воените злосторници.
Европа
Генералниот секретар на НАТО и вети на Украина дополнителни системи за воздушна одбрана
Сојузниците на НАТО се согласија да обезбедат дополнителни системи за противвоздушна одбрана во Киев, изјави шефот на НАТО Јенс Столтенберг по специјалната средба на министрите за одбрана на сојузниците со украинскиот претседател Володимир Зеленски.
„Покрај „Патриот“, има и други оружја што сојузниците можат да ги обезбедат, вклучувајќи го и SAMP/T (францускиот систем), а многу други кои немаат достапни системи ветија дека ќе обезбедат финансиска поддршка за нивните набавки за Украина“, изјави Столтенберг за новинарите во Брисел.
Зеленски го побара состанокот бидејќи неговата земја се соочува со недостиг на муниција и задржување на клучните американски финансирања, што со месеци е блокирано од републиканците во Конгресот, додека ЕУ не успева да испорача муниција навреме.
Тој во петокот им рече на членките на НАТО дека на Украина и се потребни најмалку седум системи за воздушна одбрана „Патриот“ или други напредни системи за воздушна одбрана за да се спротивстави на руските воздушни напади, повикувајќи ги да ја засилат воената помош за Киев.
Во емотивниот говор преку видео врска, украинскиот лидер го опиша сегашното ниво на странска помош како „многу ограничено“ и рече дека Израел не бил оставен на себе за време на масовниот ирански воздушен напад во саботата.
„(Рускиот претседател Владимир) Путин мора да биде симнат на земјата, а нашето небо мора повторно да стане безбедно… И тоа целосно зависи од вашиот избор… (од) изборот дали сме навистина сојузници“, рече Зеленски во неговиот говор.