Европа
Германија ја забрзува постапката за депортација по нападите во Келн
Германските министри во вторникот ги претставија главните насоки од планот за забрзување на процесот на депортирање на странците коишто сториле кривично дело, како одговор на масовните сексуални напади и грабежи од страна на имигрантите на новогодишната ноќ во Келн но и во другите германски градови, што ги продлабочија сомневањата во исправноста на политиката на отворени граници за доселениците.
Споменатите напади, кои инаку се предмет на опсежни полициски истраги, го поттикнаа подемот на десните партии и групи и внесоа немир во редовите на конзервативната коалиција на канцеларката Ангела Меркел, која како пропагатор на политиката на безрезервно прифаќање на барателите на азил е под притисок што посилно да одговори на злосторствата сторени од имигрантите.
Според планот кој го претставија конзервативниот министер за внатрешни работи Томас де Мезиер и министерот за правосудство Хеико Маас од социјалдемократите, странците кои ќе бидат осудени за физички и сексуални напади, давање отпор на полицијата и уништување на имот, може да бидат депортирани.
Според сегашниот закон, за повеќето од тие кривични дела се предвидени условни казни и не повлекуваат со себе протерување од земјата.
Меркел го поздрави договорот меѓу двајцата министри од партиите кои ја сочинуваат ткн голема коалиција на власт. „Мораме да се погрижиме законот што поскор да стапи на сила. Сега мораме да изнајдеме како да се забрза парламентарната постапка“, изјави канцеларката.
Повеќе од 600 жени и девојки досега поднеле пријави во полицијата за сексуални напади во Келн и другите германски градови во текот на новогодишната ноќ, проти сторители од северноафирканско потекло.
Парламентарецот Михаел Гросе-Бремер повика на ограничување на доселувањата од Мароко, Алжир и Тунис, бидејќи тоа, како што истакна, се ткн сигурни земји, и не станува збор за бегалци. Германија таквата одлука за имигрантите од Балканот ја донесе минатата година./крај/мф/сн
Извор: Reuters
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Шпанскиот премиер размислува да се повлече од функцијата, отворена истрага против неговата сопруга
Шпанскиот премиер Педро Санчез денеска објави дека се повлекува од јавните должности затоа што мора „да застане и да размисли“ дали ќе продолжи да биде шеф на владата откако судот во Мадрид отвори прелиминарна истрага против неговата сопруга за корупција и трговско влијание.
„Итно ми треба одговор на прашањето дали вреди, дали да продолжам да ја водам владата или да се откажам од оваа чест“, објави тој преку социјалната мрежа „Икс“.
Синдикатот Манос Лимпијас (Чисти раце) ја пријавил неговата сопруга Бегона Гомез дека им помагала на претприемачите на јавни тендери и го искористила тоа. Судот претходно денеска соопшти дека отворил истрага, без да даде детали.
Министрите од левичарската влада на Санчез оценија дека се работи за лажен извештај и дека синдикатот што го доставил е близок до екстремната десница.
Европа
Суспендиран рускиот свештеник кој одржа јавна молитва за Навални
Рускиот православен свештеник, кој во март отслужи служба за мртвите за починатиот руски опозициски лидер Алексеј Навални, е суспендиран од свештеничките должности на три години, соопшти Московската епархија на Руската православна црква.
Во соопштението објавено вчера на официјалната веб-страница на епархијата, не се наведува зошто е казнет свештеникот Дмитриј Сафронов. Нему му е забрането да дава благослов, да ја носи облеката и крстот на црковниот свештеник до 2027 година.
Сафронов треба да биде префрлен и во друга црква во Москва за да ги извршува должностите на читател на псалми. По завршувањето на периодот на покајание, врз основа на повратни информации од местото на послушанието, ќе се донесе одлука за можноста за негова понатамошна свештеничка служба“, се вели во соопштението на епархијата.
Сафронов одржа комеморација на 26 март, на која присуствуваа илјадници луѓе кои дојдоа да се простат од Навални, најжестокиот критичар на претседателот Владимир Путин во Русија.
Навални почина во февруари на 47-годишна возраст во казнена колонија на Арктикот.
Европа
Судот во Русија ја одби жалбата на американскиот новинар кој е во затвор поради шпионажа
Руски суд денеска ја отфрли последната од серијата жалби на новинарот на „Волстрит журнал“, Еван Гершкович, против истражниот затвор под обвинение за шпионажа.
Гершкович (32) е првиот американски новинар уапсен во Русија под обвинение за шпионажа по Студената војна. На 29 март минатата година тој беше приведен од Федералната служба за безбедност (ФСБ), а беше уапсен на задача во рускиот град Екатеринбург.
Руските власти тврдат дека тој се обидувал да дојде до доверливи информации кои требало да и ги пренесе на американската влада, но новинарот, весникот за кој работи и американската влада негираат дека тој е шпион.
Датумот на судењето се уште не е одреден, а притворот минатиот месец му беше продолжен за уште три месеци и треба да трае до 30 јуни.
Минатомесечното рочиште беше затворено за печатот, но во вторникот на новинарите им беше дозволено да го снимат Гершкович додека тој стои во стаклената кутија во судницата и им се насмевнува на колегите од медиумите.
Рускиот претседател Владимир Путин изјави дека во одреден момент Гершкович би можел да биде ослободен во замена за рускиот затвореник кој се држи во странство, но таков договор се уште не е постигнат.