Европа
The Guardian: Јункер ги блокираше напорите на ЕУ во борбата против даночните затајувања
Претседателот на Европската комисија(ЕК) Жан-Клод Јункер со години, додека беше премиер на Луксембург, ги блокирал напорите на Европската унија(ЕУ) во борбата против даночните затајувања, тврди британскиот весник The Guardian, повикувајќи се на германски дипломатски документи.
The Guardian пишува дека имал увид во доверливи германски дипломатски документи за делувањето на еден одбор, формиран за да се дефинира кодексот на однесување во поглед на фискалната политика. Одборот бил формиран во 1998 година, а земјите членки тогаш ветиле дека нема да водат нелојален натпревар во оданочувањето на компаниите.
Доверливите документи се во посед на The Guardian и Меѓународниот конзорциум на истражувачки новинари, кој минатата година ја откри аферата „панамски документи“.
Британскиот дневник пишува дека дел од земјите членки всушност ги блокирале напорите на ниво на ЕУ околу борбата против затајување данок, спротивно на целта за која е основан овој одбор, а Луксембург често бил предводник во попречувањето на постигање консензус.
The Guardian тврди дека станува збор за еден од најтаинствените одбори во Брисел, што е формиран за да се избегне под притисок на сѐ помоќните мултинационални компании земјите членки да бидат изиграни така што профитот на овие компании во најголем дел би му побегнал на даночното кастрење.
„Уште еднаш стана појасно дека повеќето земји не се заинтересирани за вистински реформи…особено, луксембуршките претставници говореа дека ќе се спротивстават на тоа нивните аргументи изнесени во тој одбор да бидат јавно објавени“, се вели во една белешка на која се повикува The Guardian.
Бидејќи тој одбор функционира врз основа на консензус, секоја од земјите членки може да блокира или да ги разводни предлозите што не им одат во прилог.
Јункер беше премиер на Луксембург од 1995 до 2013 година, а во тој период едно време ја вршеше и должноста министер за финансии. /крај/хн/ст
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Шпанскиот премиер размислува да се повлече од функцијата, отворена истрага против неговата сопруга
Шпанскиот премиер Педро Санчез денеска објави дека се повлекува од јавните должности затоа што мора „да застане и да размисли“ дали ќе продолжи да биде шеф на владата откако судот во Мадрид отвори прелиминарна истрага против неговата сопруга за корупција и трговско влијание.
„Итно ми треба одговор на прашањето дали вреди, дали да продолжам да ја водам владата или да се откажам од оваа чест“, објави тој преку социјалната мрежа „Икс“.
Синдикатот Манос Лимпијас (Чисти раце) ја пријавил неговата сопруга Бегона Гомез дека им помагала на претприемачите на јавни тендери и го искористила тоа. Судот претходно денеска соопшти дека отворил истрага, без да даде детали.
Министрите од левичарската влада на Санчез оценија дека се работи за лажен извештај и дека синдикатот што го доставил е близок до екстремната десница.
Европа
Суспендиран рускиот свештеник кој одржа јавна молитва за Навални
Рускиот православен свештеник, кој во март отслужи служба за мртвите за починатиот руски опозициски лидер Алексеј Навални, е суспендиран од свештеничките должности на три години, соопшти Московската епархија на Руската православна црква.
Во соопштението објавено вчера на официјалната веб-страница на епархијата, не се наведува зошто е казнет свештеникот Дмитриј Сафронов. Нему му е забрането да дава благослов, да ја носи облеката и крстот на црковниот свештеник до 2027 година.
Сафронов треба да биде префрлен и во друга црква во Москва за да ги извршува должностите на читател на псалми. По завршувањето на периодот на покајание, врз основа на повратни информации од местото на послушанието, ќе се донесе одлука за можноста за негова понатамошна свештеничка служба“, се вели во соопштението на епархијата.
Сафронов одржа комеморација на 26 март, на која присуствуваа илјадници луѓе кои дојдоа да се простат од Навални, најжестокиот критичар на претседателот Владимир Путин во Русија.
Навални почина во февруари на 47-годишна возраст во казнена колонија на Арктикот.
Европа
Судот во Русија ја одби жалбата на американскиот новинар кој е во затвор поради шпионажа
Руски суд денеска ја отфрли последната од серијата жалби на новинарот на „Волстрит журнал“, Еван Гершкович, против истражниот затвор под обвинение за шпионажа.
Гершкович (32) е првиот американски новинар уапсен во Русија под обвинение за шпионажа по Студената војна. На 29 март минатата година тој беше приведен од Федералната служба за безбедност (ФСБ), а беше уапсен на задача во рускиот град Екатеринбург.
Руските власти тврдат дека тој се обидувал да дојде до доверливи информации кои требало да и ги пренесе на американската влада, но новинарот, весникот за кој работи и американската влада негираат дека тој е шпион.
Датумот на судењето се уште не е одреден, а притворот минатиот месец му беше продолжен за уште три месеци и треба да трае до 30 јуни.
Минатомесечното рочиште беше затворено за печатот, но во вторникот на новинарите им беше дозволено да го снимат Гершкович додека тој стои во стаклената кутија во судницата и им се насмевнува на колегите од медиумите.
Рускиот претседател Владимир Путин изјави дека во одреден момент Гершкович би можел да биде ослободен во замена за рускиот затвореник кој се држи во странство, но таков договор се уште не е постигнат.