Европа
Ирците со 62 отсто го изгласаа истополовиот брак
Република Ирска на историскиот референдум со уверливо мнозинство гласала за озаконување на браковите на лица од ист пол, бидејќи објавените конечни резултати во саботата навечер покажуваат дека „за“ гласале повеќе од 62 отсто од оние кои излегле на плебисцитот.
За промена на уставот со кој се дозволува брак за истополовите двојки гласале 1.2012.607 Ирци, додека против гласале 734.000 луѓе. Медиумите оценуваат дека колку за Ирците било значајно ова прашање сведочи и одѕивот на референдумот, кој бил над 60 отсто, поголем од кој и да е референдум во последните две децении, за што помогна и фактот дека многу ирски државјани од САД и од Велика Британија дошле во земјата во петокот за да гласаат.
Од 43 изборни единици, референдумот минал во 42, а против гласале единствено изборната единица Роскомон-Саут Лејтрим во централниот дел од земјата, отфрлајќи ги истополовите бракови со 5.42 отсто. Најмногу гласови браковите на лицата од ист пол добиле во источен Даблин, и тоа 75 отсто.
Со ова Ирска стана 19 земја во светот, а 14-та во Европа, којашто ги признава истополовите бракови, но е првата којашто тоа го не го стори преку парламентарна процедура, туку преку плебисцит.
Ирскиот устав и онака може да се менува или дополнува исклучително преку референдум, па оваа одлука значи дека одредбата за истополовите бракови може да се укине единствено доколку тоа прашање повторно биде ставено на референдум.
Ова претставува изненадувачки пресврт во традиционално конзервативната и изразено католичка Ирска, во која хомосексуалноста беше декриминализирана во 1993 година. Од 2010 година со закон беше дозволено граѓанско партнерство, но на ниво на закон кој можеше да биде променет со одлука на ирската влада. Со ваквиот исход на референдумот, меѓутоа, бракот на две лица од ист пол ќе има ист статус според ирскиот устав, како и бракот меѓу маж и жена. Таквата врска ќе се смета за семејство и ужива еднаква уставна заштита како и секое друго семејство. Сепак, останува отворено прашањето за родителството и правата во врска со сурогат родителството за истополовите двојки./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Шолц: Војната во Украина може да трае уште неколку години
Германскиот канцелар Олаф Шолц изјави дека верува оти војната во Украина може да се пролонгира уште неколку години.
„Никој не може да каже дали оваа војна ќе трае можеби пет години“, рече Шолц вечерва во источниот германски град Кемниц.
Тој ја бранеше германската воена помош за Украина и додаде дека заедно со неа мора да се негува и дипломатијата.
„Меѓутоа, од почетокот на војната, рускиот претседател Владимир Путин не покажа знаци на движење напред“, рече тој.
„Диктиран мир е неприфатлив. Не смее да се дозволи да се извлече со ова“, додаде германскиот канцелар.
Европа
Лавров: Москва се уште инсистира на вистинска руска Украина
По повеќе од две години интензивна војна во Украина, рускиот министер за надворешни работи Сергеј Лавров денеска го потврди тврдењето на Москва дека полага право да владее над соседната земја.
„Во најдобар случај, иднината на западна Украина е непозната“, рече Лавров во интервјуто во Москва за неколку руски телевизиски станици.
„Во спротивно ќе има само Украина која е навистина руска, која сака да биде дел од рускиот свет, која сака да зборува руски и да ги образува своите деца“, рече тој.
Не станува збор за каква било алтернатива, смета Лавров, кој е министер за надворешни работи од 2004 година и е лојален поддржувач и доверлив човек на претседателот Владимир Путин.
Русија не сака да ги напаѓа земјите на НАТО, како што се тврди на Запад за да ги исплаши гласачите, рече Лавров. „Но, ако сакаат да го донесат НАТО до нашите граници, тогаш секако дека ќе знаеме како да го спречиме тоа во Украина“, рече тој.
Како и другите високи членови на руското раководство, Лавров рече дека Русија е подготвена за преговори со Украина, но само под посебни услови.
Нема да има прекин на огнот за време на можните преговори, разговорите со украинскиот претседател Володимир Зеленски се бесмислени, а Киев мора да се откаже од својата формула за мир, рече тој.
Во есента 2022 година, Зеленски презентираше десет точки за мир, меѓу кои се издвојуваат повлекувањето на руската армија, реконструкцијата и компензацијата и гонењето на воените злосторници.
Европа
Генералниот секретар на НАТО и вети на Украина дополнителни системи за воздушна одбрана
Сојузниците на НАТО се согласија да обезбедат дополнителни системи за противвоздушна одбрана во Киев, изјави шефот на НАТО Јенс Столтенберг по специјалната средба на министрите за одбрана на сојузниците со украинскиот претседател Володимир Зеленски.
„Покрај „Патриот“, има и други оружја што сојузниците можат да ги обезбедат, вклучувајќи го и SAMP/T (францускиот систем), а многу други кои немаат достапни системи ветија дека ќе обезбедат финансиска поддршка за нивните набавки за Украина“, изјави Столтенберг за новинарите во Брисел.
Зеленски го побара состанокот бидејќи неговата земја се соочува со недостиг на муниција и задржување на клучните американски финансирања, што со месеци е блокирано од републиканците во Конгресот, додека ЕУ не успева да испорача муниција навреме.
Тој во петокот им рече на членките на НАТО дека на Украина и се потребни најмалку седум системи за воздушна одбрана „Патриот“ или други напредни системи за воздушна одбрана за да се спротивстави на руските воздушни напади, повикувајќи ги да ја засилат воената помош за Киев.
Во емотивниот говор преку видео врска, украинскиот лидер го опиша сегашното ниво на странска помош како „многу ограничено“ и рече дека Израел не бил оставен на себе за време на масовниот ирански воздушен напад во саботата.
„(Рускиот претседател Владимир) Путин мора да биде симнат на земјата, а нашето небо мора повторно да стане безбедно… И тоа целосно зависи од вашиот избор… (од) изборот дали сме навистина сојузници“, рече Зеленски во неговиот говор.