Европа
Ирска гласаше за истополовите бракови
Се чини дека ирските гласачи на референдумот за измена на уставната дефиниција за бракот со кој би се дозволила венчавка на двојки од ист пол, го дале својот глас „за“, означувајќи така драматичен пресврт во традиционално католичката земја, тврдат во саботата владини министри , но и противниците на оваа идеја, пренесуваат агенциите.
Конечните резултати од гласањето на референдумот се очекуваат подоцна во саботата, и доколку предлогот на ова плебисцитарно изјаснување добие „зелено светло“, Ирска ќе биде првата земја којашто истополовиот брак го озаконила со директно гласање, откако во 1993 година ја декриминализираше хомосексуалноста.
Националната радиотелевизија RTE јави дека победата на поборниците за промена на уставот која го озаконува „бракот меѓу две лица без разлика на полот“ е повеќе од веројатна.
Таквото мислење го споделува и министерот за рамноправност Ајдан О’Риордан. „Мислам дека победата е извојувана. Бројот луѓе кои излегоа на референдумот е без преседан“, вели О’Риордан, пренесува Reuters.
„Изгледа дека сите предвидуваат победа на заговорниците на измената на уставната дефиниција на бракот (…) и во моментов изгледа така. Тоа е разочарувачки“, вели Џон Мареј од католичкиот институт Iona.
Католичката црква во Ирска, чијашто доктрина поучува дека хомосексуалноста е грев, своето спротиставување на предлогот за истополовите бракови го ограничи на кампања на проповедите, па опозицијата ја предводеа лаички здруженија, ставајќи го акцентот на прашањето за родителството и правата во врска со сурогат родителството за истополовите двојки. Тие се убедени дека законот за истополовото граѓанско партнерство од 2011 година е сосема доволен.
Во петокот повеќе од 3,2 милиони Ирци беа повикани да се изјаснат за предлогот за промена на уставот кој го озаконува бракот на лица од ист пол, кој го поддржаа политички партии, медиуми, некои синдикати, како и студентски и спортски здруженија. Го поддржаа и многу славни личности со ирско потекло, како на пример Боно Вокс, пејачот на U2. Пред куќата на Оскар Вајлд, писателот кој пореди хомосексуалноста беше затворен во Велика Британија, активистите поставија плакати со пораките „Гласајте за и „Еднаквост за сите“./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Бремена жена дошла на редовен преглед, лекарите по грешка ѝ направиле абортус во болница во Прага
Во трагичен инцидент претходно оваа недела во Универзитетската болница „Буловка“ во Прага 8 дошло до забуна кај лекарите за две жени што не биле од Прага, а тоа резултирало со абортус на бремена жена без нејзино знаење или желба, пренесуваат тамошните медиуми.
Здравствениот експерт вели дека, освен големата негрижа од страна на персоналот, за шокантниот настан придонела и јазичната бариера.
Кобната грешка се случила на 25 март, јавуваат чешките медиуми. Имено, една трудница дошла во болница на редовен преглед на бременоста. Меѓутоа, медицинските сестри, лекарите, гинеколозите и анестезиолозите ја помешале со друга трудница, која имала закажана киретажа (метод на абортус).
Така, бремената мајка била ставена под општа анестезија и лекарите по грешка ѝ направиле абортус.
„Министерството за здравство изразува најдлабоко жалење до пациентот и целото семејство“, рече портпаролот на Министерството, Онџеј Јакоб, во соопштението за печатот во четвртокот.
„Имаше неопростлива човечка грешка, а одговорните се разрешени“, додаде тој.
Од самата болница за информативниот портал „Новинки.чз“ изјавија дека се подготвени да платат отштета.
Според чешките медиуми, и двете пациентки биле странски државјанки, кои живееле во Чешка.
Официјалните лица не објавија никакви информации за идентитетот на жените.
Европа
Голем руски напад врз Украина, Полска ги подигна борбените авиони
Руските сили рано утринава ја напаѓаа инфраструктурата во областа Камјанск во близина на украинскиот град Днипро, при што е повредено најмалку едно лице, изјави регионалниот гувернер, додека медиумите во Суспилна објавија дека има експлозии и во регионите Ивано-Франковск и Хмелницки.
„Непријателот ја нападна критичната инфраструктура во регионот. Главна цел на непријателот е нашиот народ и виталните места за населението“, напиша на Телеграм гувернерот на регионот Дњепропетровск, Серхиј Лисак.
Лисак не објасни за каков напад станува збор, но коментаторите на Телеграм известија за употребените проектили и експлозиите во областа. Исто така, наводно имало и прекин во снабдувањето со електрична енергија и вода.
Ројтерс не можеше независно да ги потврди извештаите од областа. Украинските медиуми јавуваат дека експлозии се слушнале и во Лавов, град на крајниот запад на Украина.
Медиумската куќа Суспилна објави за руски крстосувачки ракети во украинскиот воздушен простор и експлозии во регионите Ивано-Франковск и Хмелницки и градот Днипро, додавајќи дека не е познато дали проектилите погодиле некоја цел.
Руските сили извршија големи напади врз објектите на енергетската инфраструктура во последните неколку недели, вклучувајќи го и масовниот напад на 22 март, кој Киев го опиша како најголем таков напад од инвазијата на московските сили во февруари 2022 година.
Оперативната команда на полските вооружени сили соопшти дека полските и сојузничките авиони биле активирани рано утринава откако Русија извршила ракетни напади врз Украина.
„Полските и сојузничките авиони летаат во полскиот воздушен простор, што може да резултира со зголемени нивоа на бучава, особено во југоисточниот дел на земјата“, објави командата на социјалната платформа „Икс“.
Југоисточниот дел на Полска се граничи со Украина, додаде Ројтерс.
Европа
Автобус повторно се преврте на автопат во Германија, патниците биле средношколци
Автобус со околу 60 патници се преврте вчера на автопатот А44 во западната германска покраина Северна Рајна Вестфалија, јавува дпа. Во сообраќајката се повредени над 20 лица, извести полицијата синоќа.
Да потсетиме, ден претходно слична несреќа се случи во Германија кога автобус на „Фликсбас“ се преврте на автопатот во близина на градот Лајпциг на истокот од земјата. Во таа несреќа загинаа четири лица, а над 20 се повредени.
Автобусот излетал од патот и се превртел на страна во близина на градот Верл, 100 километри источно од Дизелдорф. Целосно е затворен делот од 20 километри од автопатот А44 од излезот Уна Ост до Верл во правец на Касел. На местото на несреќата пристигнале полицајци, пожарникари и спасувачки хеликоптер.
Полицијата првично соопшти дека 21 лице е полесно повредено, а едно е тешко. Подоцна, тие ја ревидираат бројката на 20 полесно повредени и еден тешко повреден. Портпаролот на полицијата изјави дека автобусот превезувал ученици од стручно училиште во Варбург кои се враќале од патување во Англија.
Се уште не е јасна причината за несреќата. Полицијата соопшти дека никој не е во животна опасност и дека во несреќата не учествувале други возила. Несреќата се случи само еден ден откако четири лица загинаа во автобуска несреќа во близина на Лајпциг во источна Германија.