Европа
Јункер ги смирува ЕУ и Велика Британија, смета дека предлогот за реформи е правичен
Предлогот за реформирањето на односите на Велика Британија со Европската унија (ЕУ) е правичен кон Лондон и сите останати 27 земји членки на Унијата, изјавил претседателот на Европската комисија (ЕК) Жан-Клод Јункер пред европратениците во Стразбур, додавајќи дека очекува Европскиот парламент (ЕП) да го поддржи овој договор.
„Секогаш говорев дека сакам Британија да остане членка на ЕУ врз основа на чесен договор. Решението кое е предложено е праведно за Британија и останатите 27 земји членки“, рекол Јункер, пренесува Reuters.
Јункер додал дека предлогот е исправен и за ЕП, потенцирајќи дека „парламентот мора целосно да ги прифати новите договори“. Претседателот на ЕК навел дека Комисијата го поддржала предлогот на Европскиот совет, Доналд Туск и дека таа соработувала со него во однос на ова прашање.
Во нацрт предлогот на Туск се наведува дека членките на ЕУ имаат можност да ја сопрат исплатата на социјалната помош кон работниците од другите земји членки на Унијата, во случај кога постои „вонредна состојба која ги загрозува клучните аспекти на социјалниот систем на соодветната земја“.
Туск исто така предложил механизам преку кој деветте членки на Унијата кои не го користат еврото како валута можат да изразат загриженост и да добијат „неопходни разубедувања“ во врска со одлуките кои ги носи еврозоната.
Британскиот премиер Дејвид Камерон, кој сака да биде постигнат договор помеѓу Лондон и Брисел што поскоро за веќе во јуни да може да го одржи планираниот референдум за членствто на Британија во ЕУ, изјавил дека предлозите на Туск покажуваат „реален напредок“, но дека „се уште има доста работа“./крај/мф/бс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Шпанскиот премиер размислува да се повлече од функцијата, отворена истрага против неговата сопруга
Шпанскиот премиер Педро Санчез денеска објави дека се повлекува од јавните должности затоа што мора „да застане и да размисли“ дали ќе продолжи да биде шеф на владата откако судот во Мадрид отвори прелиминарна истрага против неговата сопруга за корупција и трговско влијание.
„Итно ми треба одговор на прашањето дали вреди, дали да продолжам да ја водам владата или да се откажам од оваа чест“, објави тој преку социјалната мрежа „Икс“.
Синдикатот Манос Лимпијас (Чисти раце) ја пријавил неговата сопруга Бегона Гомез дека им помагала на претприемачите на јавни тендери и го искористила тоа. Судот претходно денеска соопшти дека отворил истрага, без да даде детали.
Министрите од левичарската влада на Санчез оценија дека се работи за лажен извештај и дека синдикатот што го доставил е близок до екстремната десница.
Европа
Суспендиран рускиот свештеник кој одржа јавна молитва за Навални
Рускиот православен свештеник, кој во март отслужи служба за мртвите за починатиот руски опозициски лидер Алексеј Навални, е суспендиран од свештеничките должности на три години, соопшти Московската епархија на Руската православна црква.
Во соопштението објавено вчера на официјалната веб-страница на епархијата, не се наведува зошто е казнет свештеникот Дмитриј Сафронов. Нему му е забрането да дава благослов, да ја носи облеката и крстот на црковниот свештеник до 2027 година.
Сафронов треба да биде префрлен и во друга црква во Москва за да ги извршува должностите на читател на псалми. По завршувањето на периодот на покајание, врз основа на повратни информации од местото на послушанието, ќе се донесе одлука за можноста за негова понатамошна свештеничка служба“, се вели во соопштението на епархијата.
Сафронов одржа комеморација на 26 март, на која присуствуваа илјадници луѓе кои дојдоа да се простат од Навални, најжестокиот критичар на претседателот Владимир Путин во Русија.
Навални почина во февруари на 47-годишна возраст во казнена колонија на Арктикот.
Европа
Судот во Русија ја одби жалбата на американскиот новинар кој е во затвор поради шпионажа
Руски суд денеска ја отфрли последната од серијата жалби на новинарот на „Волстрит журнал“, Еван Гершкович, против истражниот затвор под обвинение за шпионажа.
Гершкович (32) е првиот американски новинар уапсен во Русија под обвинение за шпионажа по Студената војна. На 29 март минатата година тој беше приведен од Федералната служба за безбедност (ФСБ), а беше уапсен на задача во рускиот град Екатеринбург.
Руските власти тврдат дека тој се обидувал да дојде до доверливи информации кои требало да и ги пренесе на американската влада, но новинарот, весникот за кој работи и американската влада негираат дека тој е шпион.
Датумот на судењето се уште не е одреден, а притворот минатиот месец му беше продолжен за уште три месеци и треба да трае до 30 јуни.
Минатомесечното рочиште беше затворено за печатот, но во вторникот на новинарите им беше дозволено да го снимат Гершкович додека тој стои во стаклената кутија во судницата и им се насмевнува на колегите од медиумите.
Рускиот претседател Владимир Путин изјави дека во одреден момент Гершкович би можел да биде ослободен во замена за рускиот затвореник кој се држи во странство, но таков договор се уште не е постигнат.