Европа
Камерон ја претстави својата ‘нова стратегија против екстремизмот’
Британскиот премиер Дејвид Камерон ја објави во понеделникот својата „нова стратегија против екстремизмот“, низа мерки кои ќе овозможат одземање пасош на малолетници за да бидат спречени да се приклучат на групи како Исламската држава.
Британската влада од почетокот на годинава неколкупати ја најавуваше оваа нова стратегија којашто до крајот на годината треба да биде конкретизирана во нацрт закон за сузбивање на екстремизмот. Премиерот Дејвид Камерон се надева дека така ќе ги спречи џихадистичките групации да регрутираат странски борци во Велика Британија.
Според официјалните податоци, повеќе до 700 Британци заминале да се борат во Сирија и во Ирак, на териториите коишто ги контролира Исламската држава, а речиси 300 од нив се вратиле во Велика Британија, и се стравува дека може да преземат терористички напади во земјата.
„Мислам дека борбата со екстремизмот е една од главните борби на нашата генерација. Во борбата со таа отровна идеологија имаме избор: да го затвориме очите надевајќи се дека нашите вредности ќе опстанат или … да ги браниме тие вредности со сите сили“, изјави Камерон.
Неговата влада има намера да ги заостри условите за стекнување британско државјанство, во прв ред оние кои промовираат „екстремистички ставови“, и да го олесни одземањето на државјанство на оние коишто „не ги прифаќаат“ британските вредности.
Вториот „битен елемент“ од оваа стратегија се состои во тоа да се „прави повеќе на заштитата на децата и лицата кои се во опасност да бидат радикализирани“, истакна Камерон. „Конкретно, родителите загрижени поради тоа што нивните 16 или 17-годишници би можеле под влијание на екстремистите да отидат во странство, ќе можат да побараат да им се одземат пасошите“, додаде.
Оваа можност веќе постои за лицата до 16 година, а полицијата може да им ги одземе пасошите и на сомнителни полнолетни лица.
Премиерот Камерон, покрај тоа, рече дека „никој кој е осуден за тероризам и екстремизам нема да може да работи со деца и лица од другите ранливи категории“. Претходно во неделата тој ја претстави програмата која ќе чини 6,8 милиони евра за помош на локалните здруженија и организации во справувањето со џихадистичката пропаганда.
Мината година во Велика Британија медиумите пишуваа за неколку случаи кога малолетници заминале во редовите на Исламската држава, од кои најголем публицитет доби оној кога три девојчиња на 15 и 16 годија заминаа во Сирија./крај/мф/сн
Извор: AFP
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Шолц: Војната во Украина може да трае уште неколку години
Германскиот канцелар Олаф Шолц изјави дека верува оти војната во Украина може да се пролонгира уште неколку години.
„Никој не може да каже дали оваа војна ќе трае можеби пет години“, рече Шолц вечерва во источниот германски град Кемниц.
Тој ја бранеше германската воена помош за Украина и додаде дека заедно со неа мора да се негува и дипломатијата.
„Меѓутоа, од почетокот на војната, рускиот претседател Владимир Путин не покажа знаци на движење напред“, рече тој.
„Диктиран мир е неприфатлив. Не смее да се дозволи да се извлече со ова“, додаде германскиот канцелар.
Европа
Лавров: Москва се уште инсистира на вистинска руска Украина
По повеќе од две години интензивна војна во Украина, рускиот министер за надворешни работи Сергеј Лавров денеска го потврди тврдењето на Москва дека полага право да владее над соседната земја.
„Во најдобар случај, иднината на западна Украина е непозната“, рече Лавров во интервјуто во Москва за неколку руски телевизиски станици.
„Во спротивно ќе има само Украина која е навистина руска, која сака да биде дел од рускиот свет, која сака да зборува руски и да ги образува своите деца“, рече тој.
Не станува збор за каква било алтернатива, смета Лавров, кој е министер за надворешни работи од 2004 година и е лојален поддржувач и доверлив човек на претседателот Владимир Путин.
Русија не сака да ги напаѓа земјите на НАТО, како што се тврди на Запад за да ги исплаши гласачите, рече Лавров. „Но, ако сакаат да го донесат НАТО до нашите граници, тогаш секако дека ќе знаеме како да го спречиме тоа во Украина“, рече тој.
Како и другите високи членови на руското раководство, Лавров рече дека Русија е подготвена за преговори со Украина, но само под посебни услови.
Нема да има прекин на огнот за време на можните преговори, разговорите со украинскиот претседател Володимир Зеленски се бесмислени, а Киев мора да се откаже од својата формула за мир, рече тој.
Во есента 2022 година, Зеленски презентираше десет точки за мир, меѓу кои се издвојуваат повлекувањето на руската армија, реконструкцијата и компензацијата и гонењето на воените злосторници.
Европа
Генералниот секретар на НАТО и вети на Украина дополнителни системи за воздушна одбрана
Сојузниците на НАТО се согласија да обезбедат дополнителни системи за противвоздушна одбрана во Киев, изјави шефот на НАТО Јенс Столтенберг по специјалната средба на министрите за одбрана на сојузниците со украинскиот претседател Володимир Зеленски.
„Покрај „Патриот“, има и други оружја што сојузниците можат да ги обезбедат, вклучувајќи го и SAMP/T (францускиот систем), а многу други кои немаат достапни системи ветија дека ќе обезбедат финансиска поддршка за нивните набавки за Украина“, изјави Столтенберг за новинарите во Брисел.
Зеленски го побара состанокот бидејќи неговата земја се соочува со недостиг на муниција и задржување на клучните американски финансирања, што со месеци е блокирано од републиканците во Конгресот, додека ЕУ не успева да испорача муниција навреме.
Тој во петокот им рече на членките на НАТО дека на Украина и се потребни најмалку седум системи за воздушна одбрана „Патриот“ или други напредни системи за воздушна одбрана за да се спротивстави на руските воздушни напади, повикувајќи ги да ја засилат воената помош за Киев.
Во емотивниот говор преку видео врска, украинскиот лидер го опиша сегашното ниво на странска помош како „многу ограничено“ и рече дека Израел не бил оставен на себе за време на масовниот ирански воздушен напад во саботата.
„(Рускиот претседател Владимир) Путин мора да биде симнат на земјата, а нашето небо мора повторно да стане безбедно… И тоа целосно зависи од вашиот избор… (од) изборот дали сме навистина сојузници“, рече Зеленски во неговиот говор.