Европа
Лавров изјави дека нема да избегнува средба со турскиот колега во Белград
Шефот на руската дипломатија Сергеј Лавров за време на неговата посета на Кипар во средата изјави дека Русија турското соборување на рускиот борбен авион во Сирија го смета за „непријателски чин“, но најави дека нема да одбегнува средба со својот турски колега Мевлут Чавушоглу во рамките на самитот на Организацијата за безбедност и соработка во Европа (ОБСЕ) кој во четврток и петок ќе се одржи во српската престолнина Белград, што би претставувало прва средба на двајца високи функционери од двете држави по инцидентот од 24-ти ноември и воведувањето на санкции од Москва против Турција.
Рускиот министер Сергеј Лавров, потсети дека ден по инцидентот со авионот имал телефонски разговор со шефот на турската дипломатија Мевлут Чавушоглу и „од него не слушнав ништо ново“ во споредба со јавното објавените ставови на Анкара, којашто според рускиот дипломат се сведуваат на оправдување на дејствувањето на турските воздухопловни сили против рускиот авион.
„Турската страна ги интензивира барањата за организирање на средбата со министерот за надворешни работи на Турција во рамките на Советот на министри за надворешни работи. Нема да избегнуваме и ќе послушаме што Чавушоглу има да каже. Можеби ќе каже нешто ново, што сé уште не го рекол во јавноста“, изјави Лавров по разговорите со кипарскиот домаќин Јоанис Касулидес.
Лавров, како што пренесуваат руските медиуми, повторил дека Русија смета дека турското соборување на рускиот „Су-24“ претставува непријателски акт.
„Се случи со ништо непровоциран инцидент, непријателски кон Русија. Ние така гледаме на него“, рекол шефот на руската дипломатија и истакнал дека е „јасно оти Москва оваа акција на Турција ја смета за спротивна на целите на борбата против тероризмот“.
Што се однесува на рестриктивните мерки коишто Москва ги воведе против Анкара во врска со споменатиот инцидент, Лавров смета дека се соодветни, и оти главната задача на Русија е да се спречи „прелевањето“ на терористичката закана од Турција на својата територија./крај/мф/сн
Извор: РИА Новости
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Шпанскиот премиер размислува да се повлече од функцијата, отворена истрага против неговата сопруга
Шпанскиот премиер Педро Санчез денеска објави дека се повлекува од јавните должности затоа што мора „да застане и да размисли“ дали ќе продолжи да биде шеф на владата откако судот во Мадрид отвори прелиминарна истрага против неговата сопруга за корупција и трговско влијание.
„Итно ми треба одговор на прашањето дали вреди, дали да продолжам да ја водам владата или да се откажам од оваа чест“, објави тој преку социјалната мрежа „Икс“.
Синдикатот Манос Лимпијас (Чисти раце) ја пријавил неговата сопруга Бегона Гомез дека им помагала на претприемачите на јавни тендери и го искористила тоа. Судот претходно денеска соопшти дека отворил истрага, без да даде детали.
Министрите од левичарската влада на Санчез оценија дека се работи за лажен извештај и дека синдикатот што го доставил е близок до екстремната десница.
Европа
Суспендиран рускиот свештеник кој одржа јавна молитва за Навални
Рускиот православен свештеник, кој во март отслужи служба за мртвите за починатиот руски опозициски лидер Алексеј Навални, е суспендиран од свештеничките должности на три години, соопшти Московската епархија на Руската православна црква.
Во соопштението објавено вчера на официјалната веб-страница на епархијата, не се наведува зошто е казнет свештеникот Дмитриј Сафронов. Нему му е забрането да дава благослов, да ја носи облеката и крстот на црковниот свештеник до 2027 година.
Сафронов треба да биде префрлен и во друга црква во Москва за да ги извршува должностите на читател на псалми. По завршувањето на периодот на покајание, врз основа на повратни информации од местото на послушанието, ќе се донесе одлука за можноста за негова понатамошна свештеничка служба“, се вели во соопштението на епархијата.
Сафронов одржа комеморација на 26 март, на која присуствуваа илјадници луѓе кои дојдоа да се простат од Навални, најжестокиот критичар на претседателот Владимир Путин во Русија.
Навални почина во февруари на 47-годишна возраст во казнена колонија на Арктикот.
Европа
Судот во Русија ја одби жалбата на американскиот новинар кој е во затвор поради шпионажа
Руски суд денеска ја отфрли последната од серијата жалби на новинарот на „Волстрит журнал“, Еван Гершкович, против истражниот затвор под обвинение за шпионажа.
Гершкович (32) е првиот американски новинар уапсен во Русија под обвинение за шпионажа по Студената војна. На 29 март минатата година тој беше приведен од Федералната служба за безбедност (ФСБ), а беше уапсен на задача во рускиот град Екатеринбург.
Руските власти тврдат дека тој се обидувал да дојде до доверливи информации кои требало да и ги пренесе на американската влада, но новинарот, весникот за кој работи и американската влада негираат дека тој е шпион.
Датумот на судењето се уште не е одреден, а притворот минатиот месец му беше продолжен за уште три месеци и треба да трае до 30 јуни.
Минатомесечното рочиште беше затворено за печатот, но во вторникот на новинарите им беше дозволено да го снимат Гершкович додека тој стои во стаклената кутија во судницата и им се насмевнува на колегите од медиумите.
Рускиот претседател Владимир Путин изјави дека во одреден момент Гершкович би можел да биде ослободен во замена за рускиот затвореник кој се држи во странство, но таков договор се уште не е постигнат.