Европа
Лавров: Русија е подготвена да разгледа финансиска помош за Грција
Русија ќе го разгледа евентуалниот повик за финансирање на грчката влада, којашто како и самата таа е подложена на нелегитимната политика на Западот, изјави во средата рускиот министер за надворешни работи Сергеј Лавров, на заедничката прес-конференција по разговорите во Москва со грчкиот колега Никос Коциас.
„Кога станува збор за економските прашања, денеска разговаравме за финансиската ситуација во Грција, којашто, исто така, е во тешка ситуација поради едностраната и нелегитимна линија на нашите западни колеги“, изјави шефот на руската дипломатија Сергеј Лавров.
„Доколку ни се обрати грчката влада (со барање за финансиска помош), Русија ќе го разгледа тој повик“, истакна Лавров, кого го цитира агенцијата ТАСС.
„Ја поздравуваме конструктивната политика на грчката влада којашто се изјасни за развој на нашето стратешко партнерство без обиди за политизирања, идеологизирања и жртвување на геополитичките амбиции на трети држави. Го цениме ставот на грчката влада, кој подразбира дека е целосно контрапродуктивно со Русија да се разговара со јазикот на санкциите“, додаде Лавров алудирајќи на заканата на Грција со вето на одлуката на ЕУ за проширување на санкциите против Москва во врска со кризата во Украина.
„Постои растечко незадоволство од санкциите против Русија. Се чини дека станува збор за вистински тренд. Ние го поддржуваме таквото поставување на прашањето. Има група држави кои се залагаат за ревизија или за ублажување (на санкциите), рече шефот на грчката дипломатија Никос Кациас.
Според него, Грција има намера да ја одигра улогата на посредник меѓу Европската унија и Русија за решавање на проблемите. Додаде дека Атина предложила во Брисел да се изземат од опсудувањето односите меѓу Русија и ЕУ само преку призмата на украинската криза.
„Се надеваме дека украинската криза ќе биде надмината, и гледаме на тоа позитивно. Се надеваме дека Минска ќе бидат донесени решени, дека ќе биде изнајден компромис. Ние ќе ги почитуваме и поддржиме тие одлуки“, порача Коциас во Мосвка.
Новата грчка влада предводена од коалицијата на радикалната левица Сириза ги возбуди духовите во Европа заземајќи помек став кон Русија во врска со украинската криза, но ги прифати правилата на однесување со продолжувањето на постојните санкции без проширување кон крајот на јануари. Во западните медиум не остана не забележано и тоа што рускиот амбасадор во Атина веднаш следниот ден по инаугурацијата беше првиот странски претставник воопшто кој беше примен од новиот грчки премиер Алексис Ципрас.
Исто така, се одбележува и поканата што Ципрас ја прифати да ја посети Москва на 9-ти мај, на рускиот национален празник Денот на победата, а во меѓувреме е поканет и министерот за одбрана Панос Каменос, кој пак го води помалиот коалиционен партнер десничарската националистичка партија Независни Грци. Откако членовите на новата влада во Атина неколкупати јавно ги искажаа проруските симпатии, во Брисел се јави сомнежот за можна стратешка преориентација на дипломатијата кој на земјата којашто е членка на ЕУ од 1981 година.
Шефовите на дипломатиите на двете земји, исто така, разговараа за „одличните шанси“ за руско-грчкото партнерство во секторот на енергијата, водејќи сметка за интересите на Атина, за гасоводот кој Русија има намера да го изгради преку територијата на Турција до грчката граница за испорака на рускиот гас на Европа./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Фон Дер Лајен: На Европа не и се заканува војна, но треба да бидеме подготвени и да произведуваме оружје
Европа во моментов не се соочува со непосредна закана од војна, но мора да биде подготвена за тоа, изјави претседателката на Европската комисија, Урсула фон дер Лајен.
„Заканата од војна можеби не е непосредна, но не е невозможна. Треба да бидеме подготвени и тоа започнува со итната потреба за зајакнување и трансформирање на вооружените сили на членките на блокот“, рече Фон дер Лајен на Европскиот самит за одбрана и безбедност.
Според неа, ЕУ мора да произведе оружје од новата генерација за да „победи на бојното поле“.
„Европа треба да се стреми да развие и произведе нова генерација на оперативни способности за да победи во битките и да обезбеди доволно материјално количество и технолошка супериорност што можеби ќе и треба во иднина, а тоа значи турбо полнење на нашиот одбранбен индустриски капацитет во следните пет години,“ изјави Фон дер Лајен.
Европа
(Видео) Русите го гранатираа Чернихив, загинаа најмалку 13 лица, Зеленски бара дополнителна помош
Украинскиот претседател Володимир Зеленски ги повика западните партнери на потребната решителност и поддршка по рускиот ракетен напад врз северниот град Чернихив утринава, при што загинаа најмалку 13 лица.
„Ова немаше да дојде до ова доколку Украина добиеше доволно опрема за противвоздушна одбрана и ако беше доволна решеноста на светот да се спротивстави на рускиот тероризам“, објави Зеленски на „Телеграм“.
Министерот за внатрешни работи, Ихор Клименко, во изјава за „Телеграм“ рече дека во нападот загинале најмалку 13 лица, а повеќе од 60 се повредени и дека спасувачките операции се во тек.
Во нападот беа оштетени и четири катни згради, болница, образовна институција и десетици автомобили, додаде тој.
Русија изврши напад со три крстосувачки ракети „Искандер“, изјави регионалниот гувернер Вјачеслав Чаус во коментар за украинскиот јавен сервис „Суспилна“. Тој рече дека три проектили паднале во близина на центарот на градот и дека е оштетена цивилната инфраструктура.
Локалното население е повикано да дарува крв, изјави градоначалникот Олександр Ломако. Чернихив се наоѓа на речиси 150 километри северно од Киев, недалеку од границата со Русија. Кога руските сили ја нападнаа Украина во февруари 2022 година, Чернихив беше нападнат, но не беше преземен.
Европа
Во Германија уапсени 10 лица: за пари набавувале дозволи за престој на странци
Во Германија денеска во полициска акција се уапсени десет лица осомничени дека за големи суми пари набавувале дозволи за престој во Германија за странци од Кина и арапските земји.
„Главни осомничени се двајца адвокати од Келн, а истрагата се води против 38 можни члена на шверцерската банда и против 147 други лица, кои се занимавале со систематски шверц на луѓе“, се вели во соопштението на полициската управа на град веднаш до Келн, кои ја водат операцијата.
Осомничените се обвинети дека донеле странски државјани во Германија и ги набавиле потребните документи за големи суми пари, од 30 до 350 илјади евра. Осомничените основале фиктивни фирми и лажни адреси со кои се регистрирале лица од странство.
Весникот „Билд“ пишува дека меѓу осомничените има и вработени во неколку канцеларии за странци во регионот Рајнланд-Пфалц, кои издавале дозволи за престој за пари. Еден од нив е меѓу уапсените. Како што е соопштено, за време на рацијата била запленета и голема количина пари. Минатата година, со 300.000 бегалци и баратели на азил, Германија забележа значителен пораст на илегалниот влез во земјата.