Европа
Лажен идентитет на парискиот напаѓач, поседувал германска сим картичка
Младиот маж кој во четвртокот во Париз на годишнината на терористичките напади врз сатиричното списание Charlie Hebdo вооружен со кујнски нож и со лажен експлозив нападна париска полициска станица, поседувал германска сим картичка и веројатно лажно се претставувал како Мароканец кога бил уапсен пред неколку месеци, покажува досегашниот тек од истрагата.
Парискиот истражител Франсоа Молен изјави дека мажот кого го уби полицијата додека се заканувал со лажен појас со експлозив пред полицискиот комесаријат на 18-от озлогласен Гур Д’Ор арондисман на Пари, веројатно дал лажен идентитет кога пред неколку месеци бил уапсен на југот од Франција.
„Не верувам дека идентитетот е точен“, изјави Молен според кого убиениот имал германска сим картичка за мобилен телефон, пренесе AFP. Во телефонот се пронајдени пораки на арапски и на германски јазик.
Германската агенција DPA пренесува од Берлин дека германското министерство за внатрешни работи одбило да коментира можни врски со Германија.
Истрагата во четвртокот, откако напаѓачот беше убиен, објави дека се претставил како бездомник со име Али Салах, Мароканец роден 1995 година во Казабланка, кога бил приведен во истрага на кражба во Вар во јужна Франција.
Тој идентитет му противречи на пишаното парче хартија, на арапски јазик, коешто го имал во себе во моментот на нападот и според што тој е Тунижанец со име Тарк Б., додал Молен.
Според ова парче хартија, убиениот положил заклетва за лојалност на Абу Бакр ал-Багдади, челникот на џихадистичката терористичка организација Исламска држава, наведува парискиот иследник. Својот чин, според напишаното, го оправдувал со одмазда поради „нападите во Сирија“.
Познато е дека Исламската држава бара од своите припадници да немаат кај себе оригинални документи за идентификација, за да не им се олеснува на истражните органи. „Пријавата на лажен идентитет, исто така, е начин на кој извршителите сакаат да ги сокријат трагите“, вели за AFP неименуван полициски извор.
Сепак, француските медиуми пишуваат дека напаѓачот од четвртокот бил идентификуван според отпечатоци од палците. Тој бил веќе регистриран во полицијата во 2013 година, исто така, во јужна Франција, кога бил уапсен „за грабеж во група по претходен договор“. Сепак, во полициската база за регистрирани исламисти никогаш не фигурирало името Али Салах.
„Натамошната истрага ќе покаже дали тој ѝ припаѓал на некоја терористичка група. Можеби станува збор за психолошки неурамнотежено лице, коешто дејствувало индивидуално“, изјави министерот за правда на Франција, Кристијан Тобира./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Шолц: Војната во Украина може да трае уште неколку години
Германскиот канцелар Олаф Шолц изјави дека верува оти војната во Украина може да се пролонгира уште неколку години.
„Никој не може да каже дали оваа војна ќе трае можеби пет години“, рече Шолц вечерва во источниот германски град Кемниц.
Тој ја бранеше германската воена помош за Украина и додаде дека заедно со неа мора да се негува и дипломатијата.
„Меѓутоа, од почетокот на војната, рускиот претседател Владимир Путин не покажа знаци на движење напред“, рече тој.
„Диктиран мир е неприфатлив. Не смее да се дозволи да се извлече со ова“, додаде германскиот канцелар.
Европа
Лавров: Москва се уште инсистира на вистинска руска Украина
По повеќе од две години интензивна војна во Украина, рускиот министер за надворешни работи Сергеј Лавров денеска го потврди тврдењето на Москва дека полага право да владее над соседната земја.
„Во најдобар случај, иднината на западна Украина е непозната“, рече Лавров во интервјуто во Москва за неколку руски телевизиски станици.
„Во спротивно ќе има само Украина која е навистина руска, која сака да биде дел од рускиот свет, која сака да зборува руски и да ги образува своите деца“, рече тој.
Не станува збор за каква било алтернатива, смета Лавров, кој е министер за надворешни работи од 2004 година и е лојален поддржувач и доверлив човек на претседателот Владимир Путин.
Русија не сака да ги напаѓа земјите на НАТО, како што се тврди на Запад за да ги исплаши гласачите, рече Лавров. „Но, ако сакаат да го донесат НАТО до нашите граници, тогаш секако дека ќе знаеме како да го спречиме тоа во Украина“, рече тој.
Како и другите високи членови на руското раководство, Лавров рече дека Русија е подготвена за преговори со Украина, но само под посебни услови.
Нема да има прекин на огнот за време на можните преговори, разговорите со украинскиот претседател Володимир Зеленски се бесмислени, а Киев мора да се откаже од својата формула за мир, рече тој.
Во есента 2022 година, Зеленски презентираше десет точки за мир, меѓу кои се издвојуваат повлекувањето на руската армија, реконструкцијата и компензацијата и гонењето на воените злосторници.
Европа
Генералниот секретар на НАТО и вети на Украина дополнителни системи за воздушна одбрана
Сојузниците на НАТО се согласија да обезбедат дополнителни системи за противвоздушна одбрана во Киев, изјави шефот на НАТО Јенс Столтенберг по специјалната средба на министрите за одбрана на сојузниците со украинскиот претседател Володимир Зеленски.
„Покрај „Патриот“, има и други оружја што сојузниците можат да ги обезбедат, вклучувајќи го и SAMP/T (францускиот систем), а многу други кои немаат достапни системи ветија дека ќе обезбедат финансиска поддршка за нивните набавки за Украина“, изјави Столтенберг за новинарите во Брисел.
Зеленски го побара состанокот бидејќи неговата земја се соочува со недостиг на муниција и задржување на клучните американски финансирања, што со месеци е блокирано од републиканците во Конгресот, додека ЕУ не успева да испорача муниција навреме.
Тој во петокот им рече на членките на НАТО дека на Украина и се потребни најмалку седум системи за воздушна одбрана „Патриот“ или други напредни системи за воздушна одбрана за да се спротивстави на руските воздушни напади, повикувајќи ги да ја засилат воената помош за Киев.
Во емотивниот говор преку видео врска, украинскиот лидер го опиша сегашното ниво на странска помош како „многу ограничено“ и рече дека Израел не бил оставен на себе за време на масовниот ирански воздушен напад во саботата.
„(Рускиот претседател Владимир) Путин мора да биде симнат на земјата, а нашето небо мора повторно да стане безбедно… И тоа целосно зависи од вашиот избор… (од) изборот дали сме навистина сојузници“, рече Зеленски во неговиот говор.