Европа
Локални избори во Италија, тест за владата и десницата
Околу 13 милиони Италијанци се повикани во неделата да гласаат на првиот круг од делумните локални избори, чиј исход е важен и за разединетата десница и за левоцентристичката влада на премиерот Матео Ренци чија партија заостанува во престолнината Рим.
Според сајтот на министерството за внатрешни работи, ќе можат да гласаат 13,3 милиони избирачи, од кои 18 илјади првпат ќе може да го остварат ова право. Гласачките места ќе бидат отворени од 7 часот а ќе бидат затворени во 23 часот. Ќе се избираат претставниците во 1.342 италијански општини, како и во големите градови како Рим, Милано, Неапол, Торино, Болоња, Трст и Каљари.
Најмногу избирачи има во Рим, каде што ќе се избира нов градоначалник, како и нов состав на градскиот совет, додека најмалку избирачи има во гратчето Мортероне, во покраината Леко, каде што се регистрирани само 31 гласач.
Најголемо внимание на изборите е посветено кон трите најголеми градови Рим, Милано и Неапол. Особено е интересно во главниот град, каде што претходниот градоначалник од владејачката Демократската партија, Инацио Марино, беше принуден да поднесе оставка по разгорувањето на скандалот за трошоците, а за нов градоначалник на Вечниот град претендираат дури 13 кандидати.
Прашањето е кој ќе победи во Рим, кандидатката на Движењето 5 ѕвезди (M5S), на сатиричарот Бепе Грило, која води во анкетите, или кандидатот на Демократската партија (PD) на премиерот Матео Ренци.
Медиумите како најверојатен победник ја именуваат кандидатката на M5S, Вирџинија Раџи, која во анкетите има околу 30 отсто од гласовите, наспроти 24 отсто за Роберто Џакети, кандидатот на PD кој е потпретседател на Домот на пратениците. На третото место е претседателската на партијата „Италијански браќа“, Џорџија Мелони, која е во шестиот месец од бременоста.
Во Милано на градоначалничката позиција претендираат девет кандидати, но главната борба најверојатно ќе се води меѓу кандидатот на левоцентристичките сили Џузепе Сала и кандидатот на десноцентристите, Стефано Паризи.
Во Неапол има десет градоначалнички кандидати, меѓу кои и актуелниот Луиџи де Маџистрис, кој според анкетите има и најголеми шанси да добие уште еден мандат.
Поразот на Демократската партија во Рим би бил лош сигнал за владата четири месеци пред клучното гласање за нејзино преживување на референдумот за уставните промени, покрај чиј успех Ренци би го врзал своето политичко преживување, најавувајќи го своето заминување во случај на неуспех. Неуспехот би бил уште поголем, доколку неговиот кандидат не би успеал ниту во Милан, од каде дојде актуелниот премиер, каде што е во тесна позиција со кандидатот на десната опозиција.
Успехот, пак, на Движењето 5 ѕвезди на национално ниво, би ѝ дал можност на оваа партија, која е често оспорувана како партија, да покаже дали умее или не да управува со најголемиот италијански град, и ќе претставува сериозен противник на следните парламентарни избори.
Пребројувањето на гласовите ќе започне веднаш по затворањето на гласачките места во 23 часот, но бидејќи се гласа во најголемите градови во земјата и во многу општини, конечните резултати ќе бидат објавени во понеделник. Доколку на изборите за градоначалници победниците нема да бидат познати веќе во понеделникот, вториот круг ќе се одржи на 19-ти јуни./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Германија уапси две лица: соработувале со Русите, планирале да ја саботираат армијата
Две лица, кои освен германско државјанство имаат и руско државјанство, се уапсени во Германија поради наводно планирање саботирање на воени објекти, вклучително и американски, со цел да ја поткопаат воената поддршка за Украина, соопшти денеска германското обвинителство. Властите извршија претрес во домовите и работните места на двајцата осомничени, кои се обвинети дека работеле за странска тајна служба, се наведува во соопштението на обвинителството.
Еден од осомничените, идентификуван како Дитер С., разговарал за можни заговори со лице поврзано со руската тајна служба од октомври 2023 година, се посочува во соопштението.
Дитер С. подготвувал бомбашки напади и палење во воени објекти, вклучително и оние со кои управуваат американските сили, се додава во соопштението.
Според магазинот „Шпигел“, еден од објектите е воената база „Графенвоер“ во јужната сојузна држава Баварија, каде што украинските војници се обучуваат да управуваат со американските тенкови „Абрамс“. Руската амбасада во Берлин не одговори веднаш на барањето за коментар.
„Намерата на акциите беше да се поткопа воената поддршка што Германија и ја дава на Украина против руската воена агресија“, се вели во соопштението на германските обвинители.
Европа
Фон Дер Лајен: На Европа не и се заканува војна, но треба да бидеме подготвени и да произведуваме оружје
Европа во моментов не се соочува со непосредна закана од војна, но мора да биде подготвена за тоа, изјави претседателката на Европската комисија, Урсула фон дер Лајен.
„Заканата од војна можеби не е непосредна, но не е невозможна. Треба да бидеме подготвени и тоа започнува со итната потреба за зајакнување и трансформирање на вооружените сили на членките на блокот“, рече Фон дер Лајен на Европскиот самит за одбрана и безбедност.
Според неа, ЕУ мора да произведе оружје од новата генерација за да „победи на бојното поле“.
„Европа треба да се стреми да развие и произведе нова генерација на оперативни способности за да победи во битките и да обезбеди доволно материјално количество и технолошка супериорност што можеби ќе и треба во иднина, а тоа значи турбо полнење на нашиот одбранбен индустриски капацитет во следните пет години,“ изјави Фон дер Лајен.
Европа
(Видео) Русите го гранатираа Чернихив, загинаа најмалку 13 лица, Зеленски бара дополнителна помош
Украинскиот претседател Володимир Зеленски ги повика западните партнери на потребната решителност и поддршка по рускиот ракетен напад врз северниот град Чернихив утринава, при што загинаа најмалку 13 лица.
„Ова немаше да дојде до ова доколку Украина добиеше доволно опрема за противвоздушна одбрана и ако беше доволна решеноста на светот да се спротивстави на рускиот тероризам“, објави Зеленски на „Телеграм“.
Министерот за внатрешни работи, Ихор Клименко, во изјава за „Телеграм“ рече дека во нападот загинале најмалку 13 лица, а повеќе од 60 се повредени и дека спасувачките операции се во тек.
Во нападот беа оштетени и четири катни згради, болница, образовна институција и десетици автомобили, додаде тој.
Русија изврши напад со три крстосувачки ракети „Искандер“, изјави регионалниот гувернер Вјачеслав Чаус во коментар за украинскиот јавен сервис „Суспилна“. Тој рече дека три проектили паднале во близина на центарот на градот и дека е оштетена цивилната инфраструктура.
Локалното население е повикано да дарува крв, изјави градоначалникот Олександр Ломако. Чернихив се наоѓа на речиси 150 километри северно од Киев, недалеку од границата со Русија. Кога руските сили ја нападнаа Украина во февруари 2022 година, Чернихив беше нападнат, но не беше преземен.