Европа
Мапа од бриселскиот аеродром била најдена во станот во Атина на организаторот на нападите во Париз
Мапа на меѓународниот бриселска аеродром Завентем кој беше нападнат во вторникот од бомбаши самоубијци била пронајдена во стан во грчката престолнина Атина во кој престојувал Абделхамид Абаауд, еден од организаторите на нападите од ланскиот 13-ти ноември во Париз, пишува во неделата агенцијата Belga.
„Цртежи и шеми на аеродромот во Брисел биле откриени во компјутерот и USB стик во стан во Атина, каде што во јануари 2015 година престојувал Абделхамид Абаауд, еден од организаторите на париските терористички напади“, пренесува агенцијата повикувајќи се на своите извори во истрагата.
Претходно оваа информација ја објавија и некои грчки медиуми, повикувајќи се на извори во тамошната полиција.
Грчкото обвинителство не ја потврдило за белгиската новинска агенција оваа информација.
Истовремено, веб страницата на грчката телевизија Skai ги истакнува тешкотиите во соработката на белгиските и грчките власти по прашањето на размената на податоците за сомнителните лица особено во услови на огромниот мигрантски бран кој ја зафати минатата година Европа.
Претходно во петокот вечерта белгискиот министер за внатрешни работи Јохан Јан Јамбон вината ја префрли врз полициската небрежност како причина што не било влезен во трага на милитантот на Исламската држава Ибрахим Бакрави, кого минатата година го протерала Турција, а тој во вторникот се разнесе во Брисел.
Белгиските власти се соочија со непријатности откако Турција во средата објави дека го претерала Ибрахим Ел Бакрави назад во Европа минатиот јули, предупредувајќи дека е милитант. Ибрахим Ел Бакрави е еден од бомбашите кои се разнесоа во нападите во вторникот, разнесувајќи се на бриселскиот меѓународен аеродром Завентем.
Во февруари 2015 година за време на антитерористичка операција во Белгија биле откриени документи кои покажувале дека се подготвуваат големи терористички напади на територијата на земјата. Водачот на таа група, Абделхамид Абауд, го избегна апсењето, бидејќи во тој момент се наоѓал на боиштето во Сирија.
Подоцна тој бил еден од главните организатори на терористичките напади во Париз од 13-ти ноември 2015 година кога беа убиени 130 луѓе а повеќе од 350 беа ранети. Тој беше ликвидиран неколку дена подоцна во престрелка со француската полиција во париското предградие Сен Дени.
Серија терористички напади се случија во Брисел утрото на 22-ри март. Две експлозии предизвикаа бомбаши самоубијци на терминалот за полетување на меѓународниот аеродром Завентем, а уште едена експлозија имаше во станицата на подземната железница Малбек, во близина на европскиот кварт. Според досегашните информации, во нападите загинаа 31 човек, а 316 лица се ранети./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Голем руски напад врз Украина, Полска ги подигна борбените авиони
Руските сили рано утринава ја напаѓаа инфраструктурата во областа Камјанск во близина на украинскиот град Днипро, при што е повредено најмалку едно лице, изјави регионалниот гувернер, додека медиумите во Суспилна објавија дека има експлозии и во регионите Ивано-Франковск и Хмелницки.
„Непријателот ја нападна критичната инфраструктура во регионот. Главна цел на непријателот е нашиот народ и виталните места за населението“, напиша на Телеграм гувернерот на регионот Дњепропетровск, Серхиј Лисак.
Лисак не објасни за каков напад станува збор, но коментаторите на Телеграм известија за употребените проектили и експлозиите во областа. Исто така, наводно имало и прекин во снабдувањето со електрична енергија и вода.
Ројтерс не можеше независно да ги потврди извештаите од областа. Украинските медиуми јавуваат дека експлозии се слушнале и во Лавов, град на крајниот запад на Украина.
Медиумската куќа Суспилна објави за руски крстосувачки ракети во украинскиот воздушен простор и експлозии во регионите Ивано-Франковск и Хмелницки и градот Днипро, додавајќи дека не е познато дали проектилите погодиле некоја цел.
Руските сили извршија големи напади врз објектите на енергетската инфраструктура во последните неколку недели, вклучувајќи го и масовниот напад на 22 март, кој Киев го опиша како најголем таков напад од инвазијата на московските сили во февруари 2022 година.
Оперативната команда на полските вооружени сили соопшти дека полските и сојузничките авиони биле активирани рано утринава откако Русија извршила ракетни напади врз Украина.
„Полските и сојузничките авиони летаат во полскиот воздушен простор, што може да резултира со зголемени нивоа на бучава, особено во југоисточниот дел на земјата“, објави командата на социјалната платформа „Икс“.
Југоисточниот дел на Полска се граничи со Украина, додаде Ројтерс.
Европа
Автобус повторно се преврте на автопат во Германија, патниците биле средношколци
Автобус со околу 60 патници се преврте вчера на автопатот А44 во западната германска покраина Северна Рајна Вестфалија, јавува дпа. Во сообраќајката се повредени над 20 лица, извести полицијата синоќа.
Да потсетиме, ден претходно слична несреќа се случи во Германија кога автобус на „Фликсбас“ се преврте на автопатот во близина на градот Лајпциг на истокот од земјата. Во таа несреќа загинаа четири лица, а над 20 се повредени.
Автобусот излетал од патот и се превртел на страна во близина на градот Верл, 100 километри источно од Дизелдорф. Целосно е затворен делот од 20 километри од автопатот А44 од излезот Уна Ост до Верл во правец на Касел. На местото на несреќата пристигнале полицајци, пожарникари и спасувачки хеликоптер.
Полицијата првично соопшти дека 21 лице е полесно повредено, а едно е тешко. Подоцна, тие ја ревидираат бројката на 20 полесно повредени и еден тешко повреден. Портпаролот на полицијата изјави дека автобусот превезувал ученици од стручно училиште во Варбург кои се враќале од патување во Англија.
Се уште не е јасна причината за несреќата. Полицијата соопшти дека никој не е во животна опасност и дека во несреќата не учествувале други возила. Несреќата се случи само еден ден откако четири лица загинаа во автобуска несреќа во близина на Лајпциг во источна Германија.
Европа
Украина се обидува да ја убеди Индија да застане на страната на Киев, а не на Москва
Украинскиот министер за надворешни работи Дмитро Кулеба ја повика Индија да застане со Киев, велејќи дека блиските врски на Индија со Русија се засноваат на избледеното советско наследство, објави денеска Фајненшл тајмс.
Кулеба вчера пристигна во Њу Делхи со цел да ги зајакне врските со Индија, како и да ја промовира визијата на Киев за пат кон мирот во Украина.
Според Ројтерс, Индија традиционално има блиски економски и одбранбени врски со Москва и се воздржува да ја критикува Русија поради нејзината инвазија на Украина. Згора на тоа, купувањето на руска нафта од Индија е на рекордно ниво во последно време.
Кулеба рече дека Индија има многу да добие од проширувањето на трговските и технолошките врски со Украина, поставувајќи го прашањето за улогата на индиските компании во повоената обнова на Украина.
Украина сака да ја „врати трговијата“ со Индија, во форма на извоз на земјоделски производи како што е сончогледовото масло, а самата сака да купи повеќе индиски стоки. „Ние сме заинтересирани да увеземе дел од тешката машинерија што ја произведува Индија“, рече Кулеба.
Украина се надева дека во наредните месеци ќе одржи самит на светските лидери без учество на Русија, со цел да го промовира и зајакне својот план за мир, кој меѓу другото повикува на повлекување на руските трупи од нејзината територија.
Русија ја отфрли таа украинска дипломатска иницијатива.