Наводниот организатор на терористичките напади од 13-ти ноември во Париз, Белгиецот Абделхамид Абаауд бил ликвидиран во средата за време на антитерористичката операција во северното предградие на француската престолнина Сен-Дени, објави електронската верзија на американскиот дневен весник The Washington Post.

„Осомничениот организатор на терористичките напади во Париз, Абделхамид Абаауд е мртов, велат двајца претставници на разузнавањето“, пишува весникот. Сепак, засега изостанува официјалната потврда на оваа информација чии извори се анонимни извори од разузнавањето. Парискиот обвинител Франсоа Моленс, кого го цитира The Washington Post, потврдил дека антитерористичката операција на специјалците на француската полиција помогнати од педесетина војници која започнала во средата утрото во 4,30 часот, била покрената по добиените оперативни сознанија за можната локација на која се крие Абаауд. И Моленс нема официјална потврда за ликвидацијата на осомничениот организатор на атентатите во Париз во кои загинаа најмалку 132 луѓе.По овој 28-годишник роден во Белгија со арапски корени, е распишана меѓународна потерница од полициските служби на неколку западни земји. Тој претходно престојувал во Сирија, каде што се борел на страната на екстремната сунитска организација Исламска држава којашто ја презема одговорноста за терористичките напади во Париз.Во меѓувреме, обвинителот Моленс за новинарите изјави дека е невозможно утврдувањето на идентитетот на жената којашто во средата утрото во истата операција го активирала „самоубиствениот појас“ кој го носела на себе.„Експлозијата којашто се случи е резултат на активирањето на ’самоубиствениот појас’ кој го активирала жената. Во моментов не е возможно да се утврди нејзиниот идентитет, поради состојбата на останките“, рече обвинителот.Исламистичките милитанти кои во опсада ги држеше француската полиција во Сан-Дени планирале нови терористички напади во парискиот деловен кварт на најмалку три цели, рекле три различни извори за агенцијата Reuters.Еден од изворите рекол дека нападот бил планиран за четвртокот во квартот во кој седишта имаат некои од најголемите француски компании, како нафтениот концерн „Тotal“ или банката „Societe Generale“. Неколку полициски извори, пак, рекле дека цели биле трговскиот центар „Quatre Temps“ и главниот плоштад, како и високите деловни облакодери на западниот раб на Париз.„Полицијата трагаше по терористите кои подготвуваат нов напад врз основа на информациите од локалните и прекуокеанските антитерористички агенции“, рекол еден од изворите на Reuters.Полициските извори рекле дека информацијата за планираниот напад врз деловниот кварт била добиена од разузнавачката служба на Мароко, која во Париз испратила четворица своите агенти.Според соговорникот, потрагата во предградието Сен-Дени е организирана за апсење на организаторот на нападите во петокот Абделхамид Абаауд, белгискиот исламист од мароканско потекло, но полицијата наместо него открила терористичка ќелија којашто подготвувала напади врз Дефенс Според последните информации, биле убиени две лица, жената самоубиец која се разнела, и еден милитант кој смртно настрадал во престрелката со полицијата. Седум лица се уапсени./крај/мф/сн

Извор: Макфакс