Европа
Медведев: Само од Украинците зависи дали ќе ги снајде судбината на Југославија
Украинската криза може да ја решат само Украинците и само од нив зависи дали оваа земја ќе ја снајде „тажната судбина“ на Југославија, изјави во саботата рускиот премиер Дмитриј Медведев.
Украинската криза е конструирана, а за тоа одговорноста паѓа врз поранешните и врз сегашните челници на Украина, поранешните затоа што не воспоставија ред и поредок, а вторите затоа што дозволија избувнување на граѓанската војна во југоисточните доминантно рускојазични региони, смета рускиот премиер Дмитриј Медведев.
Покрај тоа, како што смета Медведев, сегашната криза во Украина и војната во источните области каде за речиси една година загинаа повеќе од 6.500 луѓе, можат да ја решат „само Украинците во Украина, ноти Русија, ниту Европската унија, ниту САД“.
Опстанокот на Украина зависи од мудроста, трпението, тактот и подготвеноста да се постигне компромис во преговорите меѓу сите оние коишто носат одлуки во Украина, како властите во Киев, така и политичките сили во југоисточните региони, истакна рускиот премиер.
„Само тогаш во Украина ќе настапи мирот. Веројатно и тоа е најважното за си, бидејќи доколку не биде така, ќе бидеме сведоци на еден многу тажен процес. Тој веќе сега е тажен, но би можел да поприми драматични димензии“, предупреди Медведев./крај/мф/сн
Извор: Sputnik
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Повеќе од сто килограми кокаин пронајдени меѓу банани во супермаркети во Германија
Вработени во неколку германски супермаркети во Берлин и Бранденбург откриле повеќе од 100 килограми кокаин во пакувања со банани, пренесува „Билд“ повикувајќи се на полициски извори.
Во Бранденбург, како што се наведува, во најмалку четири продавници биле пронајдени меѓу 20 и 100 килограми кокаин, пренесува „Танјуг“.
Полицијата во моментот спроведува истрага со проверка на стоката во продавниците поради што сѐ уште не се знае конечната количина дрога во нив, но не и информацијата во колку продавници има.
Европа
Шпанскиот премиер размислува да се повлече од функцијата, отворена истрага против неговата сопруга
Шпанскиот премиер Педро Санчез денеска објави дека се повлекува од јавните должности затоа што мора „да застане и да размисли“ дали ќе продолжи да биде шеф на владата откако судот во Мадрид отвори прелиминарна истрага против неговата сопруга за корупција и трговско влијание.
„Итно ми треба одговор на прашањето дали вреди, дали да продолжам да ја водам владата или да се откажам од оваа чест“, објави тој преку социјалната мрежа „Икс“.
Синдикатот Манос Лимпијас (Чисти раце) ја пријавил неговата сопруга Бегона Гомез дека им помагала на претприемачите на јавни тендери и го искористила тоа. Судот претходно денеска соопшти дека отворил истрага, без да даде детали.
Министрите од левичарската влада на Санчез оценија дека се работи за лажен извештај и дека синдикатот што го доставил е близок до екстремната десница.
Европа
Суспендиран рускиот свештеник кој одржа јавна молитва за Навални
Рускиот православен свештеник, кој во март отслужи служба за мртвите за починатиот руски опозициски лидер Алексеј Навални, е суспендиран од свештеничките должности на три години, соопшти Московската епархија на Руската православна црква.
Во соопштението објавено вчера на официјалната веб-страница на епархијата, не се наведува зошто е казнет свештеникот Дмитриј Сафронов. Нему му е забрането да дава благослов, да ја носи облеката и крстот на црковниот свештеник до 2027 година.
Сафронов треба да биде префрлен и во друга црква во Москва за да ги извршува должностите на читател на псалми. По завршувањето на периодот на покајание, врз основа на повратни информации од местото на послушанието, ќе се донесе одлука за можноста за негова понатамошна свештеничка служба“, се вели во соопштението на епархијата.
Сафронов одржа комеморација на 26 март, на која присуствуваа илјадници луѓе кои дојдоа да се простат од Навални, најжестокиот критичар на претседателот Владимир Путин во Русија.
Навални почина во февруари на 47-годишна возраст во казнена колонија на Арктикот.