Европа
Меркел одбива да го ограничи бројот имигранти кои влегуваат во Германија
Германската канцеларка Ангела Меркел во петокот на годишниот конгрес на својот клучен сојузник и сестринска партија, баварската Христијанско-социјална унија (CSU), го бранеше својот стил на водење на имигрантската криза, отфрлајќи го предлогот за ограничување на бројот лица кои бараат азил кои ќе влезат во земјата.
Германската канцеларка Ангела Меркел во својот говор беше упорна на меѓународно решение за мигрантската криза, односно долгорочно намалување на бројот на имигрантите.„Овој преголем предизвик мора да се реши на начин тој да не ѝ наштети на Европската унија. Доколку тоа го сакаме, сите напори мораме да ги насочиме на изнаоѓањето европско, меѓународно решение“, рече Меркел пред повеќе од илјада делегати на конгресот на CSU во Минхен.Меркел, меѓу другото, предложи заштита на надворешните граници на ЕУ и договор со Турција за легалната имиграција. „Тоа е вистинскиот начин за намалување на бројот на бегалците, а не воведување на национален лимит, кој ќе ни овозможи да делуваме во интересот на сите“, додаде.Баварскиот премиер и челник на CSU, Хорст Зеехофер, пред нејзиниот говор го изнесе предлогот за ограничен број имигранти коишто можат да влезат во Германија. Баварија е најпогодена со бегалскиот бран меѓу сојузните покраини. „Како и да гледаме на тоа, нема друг начин освен одредување лимит или граници за прифаќање на имигрантите“, рече Зееховер. Делегатите на CSU претходно во петокот гласаа за воведување на ограничувањето за прифаќање на имигрантите, но не назначија за која бројка би станувало збор.Зборувајќи веднаш по Меркел, Зеехофер, исто така, остана доследен на ограничувањето. „Цврсто веруваме дека со толку голем, историски предизвик на интегрирање на бегалците во нашата земја, долгорочно нема да ја имаме согласноста на граѓаните, доколку не се договориме за ограничувањето за имиграцијата на бегалците“, рече Зеехофер што беше проследено со долг и силен аплауз.Одлуката на кацеларката Меркел во септември да ги отвори германските граници за имигрантите кои бегаат од судирите и сиромаштијата на Блискиот исток, во Африка и Азија, предизвика тензии во односите меѓу CDU и нејзината Христијанско-демократска унија (CDU).Последните седмици во Германија на дневно ниво влегуваат околу 10.000 имигранти. Баварија е особено на удар на големиот број имигранти кои пристигнуваат преку јужна Европа на Западот. Според податоците на баварскиот министер за внатрешни работи, Јоахим Херман, од почетокот на годината во Германија влегле повеќе од 900.000 имигранти.Зеехофер политиката на Меркел на отворени граници за бегалците повеќепати ја нарече „грешка“. Владите на сојузните држави, нои волонтерите, предупредуваат дека нивните ресурси се преоптоварени и дека „пукаат по шевовите“. Коалицијата CDU/CSU во последно време бележи пад на поддршката во анкетите. Во Баварија е сé посилна десната евроскептична и антиимигрантска партија Алтернатива за Германија (AfD). Популарноста на Меркел претрпе тежок удар поради имигрантската криза. Во април годинава 75 отсто од Германците сметат дека добро ја извршува својата должност. Во истражувањето на институтот Infratest минатата седмица, тоа го мислеле само 49 отсто од испитаниците./крај/мф/сн
Извор: DPA
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Голем руски напад врз Украина, Полска ги подигна борбените авиони
Руските сили рано утринава ја напаѓаа инфраструктурата во областа Камјанск во близина на украинскиот град Днипро, при што е повредено најмалку едно лице, изјави регионалниот гувернер, додека медиумите во Суспилна објавија дека има експлозии и во регионите Ивано-Франковск и Хмелницки.
„Непријателот ја нападна критичната инфраструктура во регионот. Главна цел на непријателот е нашиот народ и виталните места за населението“, напиша на Телеграм гувернерот на регионот Дњепропетровск, Серхиј Лисак.
Лисак не објасни за каков напад станува збор, но коментаторите на Телеграм известија за употребените проектили и експлозиите во областа. Исто така, наводно имало и прекин во снабдувањето со електрична енергија и вода.
Ројтерс не можеше независно да ги потврди извештаите од областа. Украинските медиуми јавуваат дека експлозии се слушнале и во Лавов, град на крајниот запад на Украина.
Медиумската куќа Суспилна објави за руски крстосувачки ракети во украинскиот воздушен простор и експлозии во регионите Ивано-Франковск и Хмелницки и градот Днипро, додавајќи дека не е познато дали проектилите погодиле некоја цел.
Руските сили извршија големи напади врз објектите на енергетската инфраструктура во последните неколку недели, вклучувајќи го и масовниот напад на 22 март, кој Киев го опиша како најголем таков напад од инвазијата на московските сили во февруари 2022 година.
Оперативната команда на полските вооружени сили соопшти дека полските и сојузничките авиони биле активирани рано утринава откако Русија извршила ракетни напади врз Украина.
„Полските и сојузничките авиони летаат во полскиот воздушен простор, што може да резултира со зголемени нивоа на бучава, особено во југоисточниот дел на земјата“, објави командата на социјалната платформа „Икс“.
Југоисточниот дел на Полска се граничи со Украина, додаде Ројтерс.
Европа
Автобус повторно се преврте на автопат во Германија, патниците биле средношколци
Автобус со околу 60 патници се преврте вчера на автопатот А44 во западната германска покраина Северна Рајна Вестфалија, јавува дпа. Во сообраќајката се повредени над 20 лица, извести полицијата синоќа.
Да потсетиме, ден претходно слична несреќа се случи во Германија кога автобус на „Фликсбас“ се преврте на автопатот во близина на градот Лајпциг на истокот од земјата. Во таа несреќа загинаа четири лица, а над 20 се повредени.
Автобусот излетал од патот и се превртел на страна во близина на градот Верл, 100 километри источно од Дизелдорф. Целосно е затворен делот од 20 километри од автопатот А44 од излезот Уна Ост до Верл во правец на Касел. На местото на несреќата пристигнале полицајци, пожарникари и спасувачки хеликоптер.
Полицијата првично соопшти дека 21 лице е полесно повредено, а едно е тешко. Подоцна, тие ја ревидираат бројката на 20 полесно повредени и еден тешко повреден. Портпаролот на полицијата изјави дека автобусот превезувал ученици од стручно училиште во Варбург кои се враќале од патување во Англија.
Се уште не е јасна причината за несреќата. Полицијата соопшти дека никој не е во животна опасност и дека во несреќата не учествувале други возила. Несреќата се случи само еден ден откако четири лица загинаа во автобуска несреќа во близина на Лајпциг во источна Германија.
Европа
Украина се обидува да ја убеди Индија да застане на страната на Киев, а не на Москва
Украинскиот министер за надворешни работи Дмитро Кулеба ја повика Индија да застане со Киев, велејќи дека блиските врски на Индија со Русија се засноваат на избледеното советско наследство, објави денеска Фајненшл тајмс.
Кулеба вчера пристигна во Њу Делхи со цел да ги зајакне врските со Индија, како и да ја промовира визијата на Киев за пат кон мирот во Украина.
Според Ројтерс, Индија традиционално има блиски економски и одбранбени врски со Москва и се воздржува да ја критикува Русија поради нејзината инвазија на Украина. Згора на тоа, купувањето на руска нафта од Индија е на рекордно ниво во последно време.
Кулеба рече дека Индија има многу да добие од проширувањето на трговските и технолошките врски со Украина, поставувајќи го прашањето за улогата на индиските компании во повоената обнова на Украина.
Украина сака да ја „врати трговијата“ со Индија, во форма на извоз на земјоделски производи како што е сончогледовото масло, а самата сака да купи повеќе индиски стоки. „Ние сме заинтересирани да увеземе дел од тешката машинерија што ја произведува Индија“, рече Кулеба.
Украина се надева дека во наредните месеци ќе одржи самит на светските лидери без учество на Русија, со цел да го промовира и зајакне својот план за мир, кој меѓу другото повикува на повлекување на руските трупи од нејзината територија.
Русија ја отфрли таа украинска дипломатска иницијатива.