Европа
Москва: Во ЕУ нема консензус за санкциите
Во Европската унија (ЕУ) нема консензус околу тоа дали санкциите против Русија треба да бидат укинати, проширени или, пак, засилеи, изјави рускиот амбасадор при ЕУ, Владимир Чижов.
Во интервју за руската агенција Тасс, Чижов потенцира дека ова прашање ќе биде решено, со жестока дискусија или, пак, без, наредната година кога ќе истечат санкциите, бидејќи според него„сите санкции се воведуваат на година дена и нема бесконечни санкции“.
„Стратешка задача на 28-члениот блок е да ја одреди политиката на ЕУ во поглед на Русија“, истакна.
Рускиот дипломат потсетува дека на маргините на состанокот на Европскиот совет во Брисел на 18-ти декември, некои лидери изјавиле дека нема да има нови санкции.
„Причина за тоа не е фактот што ЕУ е изморена од одлучување за санкциите, туку поради тоа што нивната ефикасност е мала“, наведува Чижов, наведувајќи дека од друга страна пак, споредниот ефект на санкциите е голем.
„Затоа, како оптимист, се надевам дека лидерите на ЕУ и натаму имаат здрав разум. Тој би требало да има каже дека санкциите водат во ќорсокак“, истакнува Чижов, додавајќи дека САД ги поттикнуваат санкциите против Русија.
Според него, ЕУ мора „што поскоро да се откаже од тој пат“ и да ги нормализира односите со Русија.
„Во меѓувреме, многу лидери на ЕУ сега велат дека е невозможно да се вратат на редовното работење со Русија. Нам не ни треба такво работење, туку пристојна, искрена и чесна соработка без обид за вовлекување на Русија во некои прилично спорни претпоставки кои ЕУ ги нарекува свои вредности“, заклучува Чижов.
Очекува дека министрите за надворешни работи на ЕУ повторно ќе го разгледаат прашањето за санкциите против Русија на редовниот состанок кон крајот на јануари, а портпаролката на високата претставнична на ЕУ за надворешна политика, Маја Коцијанчич најави дека состанокот ќе биде фокусиран на утврдувањето на заедничките европски стратегии во поглед на Русија./крај/мф/бс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Шпанскиот премиер размислува да се повлече од функцијата, отворена истрага против неговата сопруга
Шпанскиот премиер Педро Санчез денеска објави дека се повлекува од јавните должности затоа што мора „да застане и да размисли“ дали ќе продолжи да биде шеф на владата откако судот во Мадрид отвори прелиминарна истрага против неговата сопруга за корупција и трговско влијание.
„Итно ми треба одговор на прашањето дали вреди, дали да продолжам да ја водам владата или да се откажам од оваа чест“, објави тој преку социјалната мрежа „Икс“.
Синдикатот Манос Лимпијас (Чисти раце) ја пријавил неговата сопруга Бегона Гомез дека им помагала на претприемачите на јавни тендери и го искористила тоа. Судот претходно денеска соопшти дека отворил истрага, без да даде детали.
Министрите од левичарската влада на Санчез оценија дека се работи за лажен извештај и дека синдикатот што го доставил е близок до екстремната десница.
Европа
Суспендиран рускиот свештеник кој одржа јавна молитва за Навални
Рускиот православен свештеник, кој во март отслужи служба за мртвите за починатиот руски опозициски лидер Алексеј Навални, е суспендиран од свештеничките должности на три години, соопшти Московската епархија на Руската православна црква.
Во соопштението објавено вчера на официјалната веб-страница на епархијата, не се наведува зошто е казнет свештеникот Дмитриј Сафронов. Нему му е забрането да дава благослов, да ја носи облеката и крстот на црковниот свештеник до 2027 година.
Сафронов треба да биде префрлен и во друга црква во Москва за да ги извршува должностите на читател на псалми. По завршувањето на периодот на покајание, врз основа на повратни информации од местото на послушанието, ќе се донесе одлука за можноста за негова понатамошна свештеничка служба“, се вели во соопштението на епархијата.
Сафронов одржа комеморација на 26 март, на која присуствуваа илјадници луѓе кои дојдоа да се простат од Навални, најжестокиот критичар на претседателот Владимир Путин во Русија.
Навални почина во февруари на 47-годишна возраст во казнена колонија на Арктикот.
Европа
Судот во Русија ја одби жалбата на американскиот новинар кој е во затвор поради шпионажа
Руски суд денеска ја отфрли последната од серијата жалби на новинарот на „Волстрит журнал“, Еван Гершкович, против истражниот затвор под обвинение за шпионажа.
Гершкович (32) е првиот американски новинар уапсен во Русија под обвинение за шпионажа по Студената војна. На 29 март минатата година тој беше приведен од Федералната служба за безбедност (ФСБ), а беше уапсен на задача во рускиот град Екатеринбург.
Руските власти тврдат дека тој се обидувал да дојде до доверливи информации кои требало да и ги пренесе на американската влада, но новинарот, весникот за кој работи и американската влада негираат дека тој е шпион.
Датумот на судењето се уште не е одреден, а притворот минатиот месец му беше продолжен за уште три месеци и треба да трае до 30 јуни.
Минатомесечното рочиште беше затворено за печатот, но во вторникот на новинарите им беше дозволено да го снимат Гершкович додека тој стои во стаклената кутија во судницата и им се насмевнува на колегите од медиумите.
Рускиот претседател Владимир Путин изјави дека во одреден момент Гершкович би можел да биде ослободен во замена за рускиот затвореник кој се држи во странство, но таков договор се уште не е постигнат.