Европа
Мухамед е најпопуларното име во Британија?!
Името Мухамед ги престигна имињата Џек и Оливер на листата на најпопуларни имиња за машки деца во Велика Британија, покажа годишно истражување објавено во понеделникот.
Според истото истражување, најпопуларни имиња за женските деца се Софија, пред Емили и Лили. Најголемото напредување кај женските имиња го направило името Нур, а во првите сто му се приклучило на уште едно муслимански име – Маријам, покажува анкетата на интернет страницата BabyCentre.
Многу популарно, кога станува збор за женските имиња, станало и Елза, благодарејќи на ликот од „Фрозен“, анимираниот хит на Disney.
На листата со машките имиња, повторно меѓу првите сто се проби името Џон, на 98-то место, некогаш најпопуларното име во Велика Британија, коешто е зад имињата Али, Илај и Мајло.
Кралските имиња, како Чарлс, Вилијам и Хари испаднале од мода, покажало споменатото истражување направено врз основа на 56.157 членови на страницата кои добиле принова во 2014 година.
Според британските медиуми, пак, најверојатно дека оваа анкета ги занемарува сеопфатните статистички податоци достапни од официјалните британски служби, кои го опфаќаат периодот до 2013 година. Според нив, името Мухамед било 16-то најпопуларно име за момченцата во Англија и Велс, и 52-ро меѓу најпопуларните во Шкотска.
Имињата избрани преку селекцијата што ја направиле корисниците на The BabyCentre.co.uk, веројатно покажува повеќе на демографската структура на корисниците на страницата, отколку за генералниот тренд во Британија, коментира во понеделникот весникот The Guardian.
Се наведува и дека Мухамед може да стане во одреден момент најчестото име во Велика Британија, и тоа како резултат повеќе на имиграциските отколку на културните трендови. Имено, во текот на последните неколку децении повеќето родители барале поширок спектар од имиња за свои деца, додека Мухамед останува константно најчестото во муслиманската заедница.
Процентот на муслиманската популација изнесува 4,8 отсто, додека најпопуларното име за момчиња во Англија и Велс – Оливер, им било дадено на само 1 процент од бебињата родени минатата 2013 година. Шеснаесетто место за името Мухамед е показател за помалата варијанта на имињата кај муслиманската заедница, заклучува The Guardian.
Името Мухамед е на врвот од најпопуларните имиња за машки новороденчиња и во истражувањето што го спровел посебно весникот The Daily Mail, потпирајќи се на официјалната статистика од почетокот на 2014 година.
Според ова рангирање, кога ќе се собера сите варијации на името Мухамед, Мохамед и Мохамад има 7.445 поени. За споредба, пак, пишува The Guardian, варијациите на пример на Оливер и Оли според ова рангирање би имале 7.749 поени, додека на Хари и Хенри 9.136 поени./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Судот во Русија ја одби жалбата на американскиот новинар кој е во затвор поради шпионажа
Руски суд денеска ја отфрли последната од серијата жалби на новинарот на „Волстрит журнал“, Еван Гершкович, против истражниот затвор под обвинение за шпионажа.
Гершкович (32) е првиот американски новинар уапсен во Русија под обвинение за шпионажа по Студената војна. На 29 март минатата година тој беше приведен од Федералната служба за безбедност (ФСБ), а беше уапсен на задача во рускиот град Екатеринбург.
Руските власти тврдат дека тој се обидувал да дојде до доверливи информации кои требало да и ги пренесе на американската влада, но новинарот, весникот за кој работи и американската влада негираат дека тој е шпион.
Датумот на судењето се уште не е одреден, а притворот минатиот месец му беше продолжен за уште три месеци и треба да трае до 30 јуни.
Минатомесечното рочиште беше затворено за печатот, но во вторникот на новинарите им беше дозволено да го снимат Гершкович додека тој стои во стаклената кутија во судницата и им се насмевнува на колегите од медиумите.
Рускиот претседател Владимир Путин изјави дека во одреден момент Гершкович би можел да биде ослободен во замена за рускиот затвореник кој се држи во странство, но таков договор се уште не е постигнат.
Европа
Нова корупциска афера во Украина, осомничен министер за земјоделство
Украинската антикорупциска полиција го именуваше министерот за земјоделство Микола Солски како осомничен во кривичната истрага за незаконско стекнување на државно земјиште во вредност од седум милиони долари.
Солски, кој го надгледува производството на жито во Украина за време на војната од март 2022 година, рече дека не разбира зошто сега се појавија наводите поврзани со настаните од 2017 и 2018 година.
„Не се согласувам со обвинувањата“, им рече тој на новинарите во Киев откако Украинското национално биро за борба против корупцијата објави соопштение со резултатите од истрагата.
Канцеларијата соопшти дека министерот го предводел планот за стекнување на државно земјиште во вредност од околу 6,9 милиони евра и обид да се стекне земјиште во вредност од 190 милиони гривни.
Солски е првиот министер во владата на претседателот Володимир Зеленски кој е осомничен во корупциски скандал.
Зеленски се обидува да спроведе стапка на нулта толеранција за корупција, а минатата година го отпушти министерот за одбрана поради обвинувања за примање мито поврзани со одбранбената индустрија.
Законодавците изминативе денови порачаа дека очекуваат реконструкција на Владата, секако до крајот на пролетта.
Европа
Русија: Ќе ги таргетираме украинските магацини во кои се доставува западното оружје
Русија ќе ги интензивира нападите врз украинските бази за складирање во кои е сместено оружјето доставено од Запад, изјави денеска министерот за одбрана, Сергеј Шојгу, а Соединетите Држави се подготвуваат да одобрат и достават долго одложувана нова воена помош.
Шојгу рече дека Русија „го отфрли митот за супериорноста на западното оружје“ и дека нејзините сили презеле иницијатива на фронтот долг 1.000 километри.
Тој алудира на фактот дека в сабота, по гласањето во Претставничкиот дом, Вашингтон е подготвен да достави нов пакет воена помош за Украина, вреден речиси 61 милијарда долари.
Украинскиот претседател Володимир Зеленски изјави дека Киев набргу ќе добие повеќе ракетни системи со долг дострел ATACMS како дел од ветениот пакет. Американските власти рекоа дека помошта ќе вклучува испорака на муниција и пресретнувачи за системи за противвоздушна одбрана за Украина.
„Со оглед на заканите од САД и нивните сојузници, ние мора да продолжиме да ги подобруваме составот и структурата на вооружените сили и да го зголемиме производството на најпопуларното оружје и воена опрема“, рече Шојгу додавајќи дека руските сили „ќе го зголемат интензитетот на нападите врз логистичките центри и базите за складирање на западното оружје“.
Рускиот министер за одбрана повтори дека Русија овој месец ги освоила селата Первомајске, Бохданивка и Новомихајливка.
Во понеделникот украинскиот командант го негира падот на Новомихајливка велејќи дека неговите војници сè уште држат 15- 20 отсто од селото.
Руското Министерство за одбрана објави дека руските маринци, кои учествувале во заземањето на Новомихајливка, заробиле оружје од западно производство, вклучувајќи шведски фрлачи на гранати, американски противоклопни системи Javelin и системи за електронско војување на НАТО.