Европа
Над 80 лица од обезбедувањето на ЕУРО2016 во базата потенцијални терористи
Осумдесет и две лица кои се ангажирани да обезбедување на настаните од претстојното европско фудбалско првенство во Франција се наоѓаат во базите податоци на граѓани кои се претставуваат потенцијална закана за безбедноста на турнирот, а германски новинари го пробија безбедносните мерки за време на пријателскиот натпревар меѓу Франција и Камерун.
Францускиот магазин Le Point објави, повикувајќи се на извештај на Главната управа за безбедноста на Франција, дека повеќе десетици лица ангажирани за одржување на редот за време на натпреварите или други настани кои ќе го придружуваат ЕУРО2016 се на листата потенцијално ризични лица од аспект на тероризмот.
Се истакнува дека безбедносните служби спровеле анализа на податоците за 3.500 обезбедувачи и агенции, кои може да бидат вклучени во безбедноста на натпреварите. Биле идентификувани 82 лица, кои минуваат низ специјалната база лица кои претставуваат потенцијална закана за националната безбедност или се способни да извршат терористички чин. Во истата база се внесуваат имињата на оние лица кои се поврзани со екстремни организации од различна провиниенција.
Истовремено новинарите на германската телевизија ARD тестирајќи ги безбедносните мерки на француските стадиони, успеале да прошверцуваат неколку шишиња со кечап на стадионот во Нант за време на пријателскиот натпревар Франција – Камерун. Обезбедувањето на стадионот одземало едно шише, но другите три не успеале да ги откријат.
Еден од организаторите на турнирот, Мартен Кален, не беше одушевен од резултатите од експериментот спроведен од германските новинари. „Ова не е добро“, коментираше кусо Кален додавајќи дека, сепак, стадионот во Нант не е еден од десетте на коишто ќе се играат официјалните натпревари од шампионатот.
Еден од водечките германски експерти за тероризам, Михаел Гетшенберг, предупреди на опасноста од терористички напади за време на ЕУРО2016. „Доколку постои и најмала можност за удар, терористите тоа ќе се обидат и да го искористат“, вели Гетшенберг.
Низа безбедносни пропусти беа регистрирани и на неодамнешното финале на францускиот фудбалски куп во Париз. И покрај големиот број полицајци, војници и обезбедувачи, навивачите на ПСЖ и на Марсеј на парискиот „Stade de France “ успеаја да внесат петарди, чадни бомби, факели, шишиња и други опасни предмети. Дури и камења беа фрлани во меѓусебните пресметки. Се случија и големи проблеми при влегувањето на стадионот кога се создаде блокада со повеќе илјади луѓе, па се закануваше опасност некој да биде прегазен.
Француската јавност беше гневна, споменувајќи си на 130-те жртви и 400-те ранети во џихадистичките напади од ланскиот 13-ти ноември. Притоа тогаш првата цел на бомбашите самоубијци беше токму стадионот „Stade de France“ во париското предградие Сен Дени, на кој ќе се играат воведниот и финалниот натпревар од ЕУРО2016.
Како што беше објавено, со цел да се осигури целосната безбедност на европскиот фудбалски шампионат кој ќе се одржува од 10-ти јуни до 10-ти јули, ќе бидат ангажирани 90.000 полицајци, војници, како и вработени во приватни фирми за обезбедување./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Суспендиран рускиот свештеник кој одржа јавна молитва за Навални
Рускиот православен свештеник, кој во март отслужи служба за мртвите за починатиот руски опозициски лидер Алексеј Навални, е суспендиран од свештеничките должности на три години, соопшти Московската епархија на Руската православна црква.
Во соопштението објавено вчера на официјалната веб-страница на епархијата, не се наведува зошто е казнет свештеникот Дмитриј Сафронов. Нему му е забрането да дава благослов, да ја носи облеката и крстот на црковниот свештеник до 2027 година.
Сафронов треба да биде префрлен и во друга црква во Москва за да ги извршува должностите на читател на псалми. По завршувањето на периодот на покајание, врз основа на повратни информации од местото на послушанието, ќе се донесе одлука за можноста за негова понатамошна свештеничка служба“, се вели во соопштението на епархијата.
Сафронов одржа комеморација на 26 март, на која присуствуваа илјадници луѓе кои дојдоа да се простат од Навални, најжестокиот критичар на претседателот Владимир Путин во Русија.
Навални почина во февруари на 47-годишна возраст во казнена колонија на Арктикот.
Европа
Судот во Русија ја одби жалбата на американскиот новинар кој е во затвор поради шпионажа
Руски суд денеска ја отфрли последната од серијата жалби на новинарот на „Волстрит журнал“, Еван Гершкович, против истражниот затвор под обвинение за шпионажа.
Гершкович (32) е првиот американски новинар уапсен во Русија под обвинение за шпионажа по Студената војна. На 29 март минатата година тој беше приведен од Федералната служба за безбедност (ФСБ), а беше уапсен на задача во рускиот град Екатеринбург.
Руските власти тврдат дека тој се обидувал да дојде до доверливи информации кои требало да и ги пренесе на американската влада, но новинарот, весникот за кој работи и американската влада негираат дека тој е шпион.
Датумот на судењето се уште не е одреден, а притворот минатиот месец му беше продолжен за уште три месеци и треба да трае до 30 јуни.
Минатомесечното рочиште беше затворено за печатот, но во вторникот на новинарите им беше дозволено да го снимат Гершкович додека тој стои во стаклената кутија во судницата и им се насмевнува на колегите од медиумите.
Рускиот претседател Владимир Путин изјави дека во одреден момент Гершкович би можел да биде ослободен во замена за рускиот затвореник кој се држи во странство, но таков договор се уште не е постигнат.
Европа
Нова корупциска афера во Украина, осомничен министер за земјоделство
Украинската антикорупциска полиција го именуваше министерот за земјоделство Микола Солски како осомничен во кривичната истрага за незаконско стекнување на државно земјиште во вредност од седум милиони долари.
Солски, кој го надгледува производството на жито во Украина за време на војната од март 2022 година, рече дека не разбира зошто сега се појавија наводите поврзани со настаните од 2017 и 2018 година.
„Не се согласувам со обвинувањата“, им рече тој на новинарите во Киев откако Украинското национално биро за борба против корупцијата објави соопштение со резултатите од истрагата.
Канцеларијата соопшти дека министерот го предводел планот за стекнување на државно земјиште во вредност од околу 6,9 милиони евра и обид да се стекне земјиште во вредност од 190 милиони гривни.
Солски е првиот министер во владата на претседателот Володимир Зеленски кој е осомничен во корупциски скандал.
Зеленски се обидува да спроведе стапка на нулта толеранција за корупција, а минатата година го отпушти министерот за одбрана поради обвинувања за примање мито поврзани со одбранбената индустрија.
Законодавците изминативе денови порачаа дека очекуваат реконструкција на Владата, секако до крајот на пролетта.