Европа
Над 90 полицајци повредени во Франкфурт, приведени 500 демонстранти
Деведесет и четири полицајци се повредени, а приведени се повеќе од 500 учесници од кои 16 се притворени, по протестите против капитализмот во средата претпладне во Франкфурт организирани по повод отворањето на новото седиште на Европската централна банка (ECB), објави попладнето портпаролката на франкфуртската полиција Хесер Кошиг.
„Во моментов познато ни е дека 94 полициски службеници се повредени, од кои повеќе од десет се погодени со камења во главата во текот на претпладнето, при недозволените протести, 16 учесници на протестот се уапсени“, изјавила портпаролката Хесер Кошиг за РИА Новости.
Уште една портпаролка на франкфуртската полиција, Клаудија Рогалски за Reuters изјави дека расположението на демонстрантите било „агресивно“. „Имавме фрлање камења, палење канти за ѓубре, а оштетени се и седум полициски автомобили, од кои повеќето се запалени“, рече портпаролката.
Репортерот на CNN јави дека во насилствата се запалени најмалку седум полициски возила, како и дека вкупно биле приведени повеќе од 500 демонстранти.
Претставниците на полицијата во Франкфурт за РИА Новости одбиле да ги потврдат податоците од организаторите на протестот, радикалното левичарско движење Blockupy, дека во раните утрински часови на протестите учествувале најмалку шест илјади луѓе. „Ние не можеме да потврдиме овие податоци. Полицијата не може да го посочи точниот број на учесниците, бидејќи тие се движеа цело време“, вели Кошиг.
Претставникот на франкфуртската филијала на Обединетите германски синдикати Хералд Цитлер изјавил дека на дозволените демонстрации кои започнаа во средата попладне во центарот на градот синдикатите собрале три илјади учесници. „Протестот мина мирно, без судири со полицијата“, изјави Цитлер. Според него, одлуката да се учествува во протестите кои продолжуваат во текот на денот синдикалците ќе ја носат индивидуално.
Претходно полицијата со водени топови ги гаѓаше демонстрантите за да ги растера откако беа нападнати нејзините сили, како и припадниците на противпожарната служба кои ги гаснеа запалените возила и контејнери за смет и автомобилски гуми.
Илјадниците демонстранти против капитализмот се судрија со припадниците на интервентната полицијата недалеку од новото седиште на Европската централна банка (ECB) во Франкфурт неколку часа пред официјалното отворање на објектот чиешто градеше чинеше 1,3 милијарди евра. Организаторите на претпладневниот протест, левото радикално движење Blockupy, нарече според движењето Occupy Wall Street од 2011 година коешто започна на њујоршки Волстрит но планетарно се прошири, проценуваат дека се собрале повеќе од 10.000 луѓе. Многумина во германската финансиска престолнина дошле од другите делови на Европа.
Претседателот на Европската централна банка, Марио Драги, во својот говор на свеченото отворање им порача на демонстрантите дека „промашиле“ со обвинувањата кон ECB, пренесува Reuters.
„Нашиот протест е против ECB, членот на тројката (Европската комисија, Европската централна банка и Меѓународниот монетарен фонд – з.м), којшто и покрај тоа што не е демократски избран го отежнува работењето на грчката влада. Ние сакаме да се стави крај на политиката на остри мерки за штедењето. Сакаме гласен, но мирен протест“, изјави за Reuters еден од организаторите на протестот, Улрих Вилкен./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Шпанскиот премиер размислува да се повлече од функцијата, отворена истрага против неговата сопруга
Шпанскиот премиер Педро Санчез денеска објави дека се повлекува од јавните должности затоа што мора „да застане и да размисли“ дали ќе продолжи да биде шеф на владата откако судот во Мадрид отвори прелиминарна истрага против неговата сопруга за корупција и трговско влијание.
„Итно ми треба одговор на прашањето дали вреди, дали да продолжам да ја водам владата или да се откажам од оваа чест“, објави тој преку социјалната мрежа „Икс“.
Синдикатот Манос Лимпијас (Чисти раце) ја пријавил неговата сопруга Бегона Гомез дека им помагала на претприемачите на јавни тендери и го искористила тоа. Судот претходно денеска соопшти дека отворил истрага, без да даде детали.
Министрите од левичарската влада на Санчез оценија дека се работи за лажен извештај и дека синдикатот што го доставил е близок до екстремната десница.
Европа
Суспендиран рускиот свештеник кој одржа јавна молитва за Навални
Рускиот православен свештеник, кој во март отслужи служба за мртвите за починатиот руски опозициски лидер Алексеј Навални, е суспендиран од свештеничките должности на три години, соопшти Московската епархија на Руската православна црква.
Во соопштението објавено вчера на официјалната веб-страница на епархијата, не се наведува зошто е казнет свештеникот Дмитриј Сафронов. Нему му е забрането да дава благослов, да ја носи облеката и крстот на црковниот свештеник до 2027 година.
Сафронов треба да биде префрлен и во друга црква во Москва за да ги извршува должностите на читател на псалми. По завршувањето на периодот на покајание, врз основа на повратни информации од местото на послушанието, ќе се донесе одлука за можноста за негова понатамошна свештеничка служба“, се вели во соопштението на епархијата.
Сафронов одржа комеморација на 26 март, на која присуствуваа илјадници луѓе кои дојдоа да се простат од Навални, најжестокиот критичар на претседателот Владимир Путин во Русија.
Навални почина во февруари на 47-годишна возраст во казнена колонија на Арктикот.
Европа
Судот во Русија ја одби жалбата на американскиот новинар кој е во затвор поради шпионажа
Руски суд денеска ја отфрли последната од серијата жалби на новинарот на „Волстрит журнал“, Еван Гершкович, против истражниот затвор под обвинение за шпионажа.
Гершкович (32) е првиот американски новинар уапсен во Русија под обвинение за шпионажа по Студената војна. На 29 март минатата година тој беше приведен од Федералната служба за безбедност (ФСБ), а беше уапсен на задача во рускиот град Екатеринбург.
Руските власти тврдат дека тој се обидувал да дојде до доверливи информации кои требало да и ги пренесе на американската влада, но новинарот, весникот за кој работи и американската влада негираат дека тој е шпион.
Датумот на судењето се уште не е одреден, а притворот минатиот месец му беше продолжен за уште три месеци и треба да трае до 30 јуни.
Минатомесечното рочиште беше затворено за печатот, но во вторникот на новинарите им беше дозволено да го снимат Гершкович додека тој стои во стаклената кутија во судницата и им се насмевнува на колегите од медиумите.
Рускиот претседател Владимир Путин изјави дека во одреден момент Гершкович би можел да биде ослободен во замена за рускиот затвореник кој се држи во странство, но таков договор се уште не е постигнат.