Европа
Неизвесност и последни предупредување пред британскиот референдум за ЕУ
Повеќе европски челници ги упатија последните предупредувања за Британците да не излегуваат од Европската унија, ден пред референдумот за членството во ЕУ кој е неизвесен, колку што е и пресуден и за иднината на Велика Британија и за остатокот од 28-члениот блок.
Во средата, ден пред референдумот, две онлајн анкети даваа блага предност на приврзаниците на излегувањето од ЕУ и покажаа дека сé уште има голем број нерешителни избирачи, додека можноста за излегување на Обединетото Кралство од Европската унија го загрижува Брисел, како и деловните кругови и речиси сите челници на важните земји во светот.
Според агенцијата за истражување на јавното мнение Opinium, во чија анкета учествувале 3.011 лица, 45 отсто од испитаниците се определиле за излегување, додека 44 отсто за останување во ЕУ, но поборниците на останувањето се надеваат на 9-те проценти кои уште не донеле одлука, додека 2 отсто одговориле дека нема да се изјаснат. Во анкетата на TNS, спроведена врз 2.320 испитаници, 43 отсто се за излегување, 41 отсто за останување и 16 проценти се без одлука.
Неколку часови пред отворањето на гласачките места, 46,5 милиони британски гласачи се наоѓаат пред историски важната одлука, пред 41 година откако исто така на плебисцит гласаа за останување во тогашната западноевропска заедница.
„Кога еднаш ќе скокнете од авионот, повеќе не можете да се вратите“, предупреди британскиот премиер Дејвид Камерон .
„Во прашање е иднината на Европската унија“, истакна францускиот претседател Франсоа Оланд предупредувајќи дека одлуката ќе биде „неотповиклива“.
Доколку се случи британското излегување, Европската унија, којашто загрижено го следи порастот на евроскептицизмот, ќе ја загуби една од најмоќните членки, петтата според обемот светска економија и постојана членка на Советот за безбедност на Обединетите нации.
И претседателот на Европската комисија, Жан-Клод Јункер, предупреди дека излегувањето би претставувало „чин на самоосакатување“. „Надвор е надвор. Не би имало никакво ново преговарање со Лондон“, истакна Јункер.
Главните меѓународни институции со седмици наназад предупредуваат на сериозни економски последици, а британската централна банка дури ја спомена можноста за рецесија во земјата. Извршната директорка на ММФ, Кристин Лагард, изјави во средата дека одлуката за британското излегување би влијаела и на американската економија.
Во средата речиси 1.300 челници на компании, меѓу кои половината котираат на лондонската берза, повикаа на останување во заедницата со 28 држави.
Слични повици упатија и познатите личности од светот на спортот, филмот и музиката, како Дејвид Бекам, Даниел Крејг и бендот U2, кои посакаа да победи таборот „Remain“, приврзаниците на останувањето во ЕУ.
За разлика од нив, републиканскиот кандидат за претседател на САД, Доналд Трамп, се изјасни за излегувањето на Британија од ЕУ, признавајќи дека во контекстот на неговата насоченост на Америка, сепак, „не размислувал премногу за тоа прашање“.
Кралицата Елизабета Втора, којашто должноста ја обврзува на воздражаност, не сакала да коментира, и покрај навалувањата на евроскептичните весници предводени од Daily Telegraph и таблоидите Sun и Daily Mail.
Шкотската национална партија (SNP) која владее во Единбург, повтори дека излегувањето „нужно“ ќе предизвика втор референдум за независноста на Шкотска. Северна Ирска, пак, стравува од повторното појавување на фантомот од минатото, доколку би морала да ја одреди границата со јужниот сосед.
Приврзаниците на излегувањето ја поставија имиграцијата во центарот на својата кампања. Повикуваат да се „преземе контролата“ над границата за да се запре приливот на мигрантите од ЕУ и предупредуваат на евентуалното влегување на Турција во ЕУ.
Кампањата го покажа и генерацискиот јаз, имајќи предвид дека младите Британци главно се изјаснуваат за ЕУ, додека повозрасните се понаклонети на излегувањето. Лондон, и другите голема градови, Шкотска и Северна Ирска се за останување, а внатрешноста на Англија за излегување.
Дејвид Камерон во 2013 година вети дека ќе го организира овој референдум, за да ги отстрани постојаните поделби во својата Конзервативна партија во врска со ЕУ.
Велика Британија, членка на ЕУ од 1973 година, којашто не е во Шенген зоната и не го воведе еврото, веќе има посебен статус во Унијата. Може да биде веќе во четвртокот вечерта првата земја којашто ја напуштила ЕУ./крај/мф/сн
Извор: AFP
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Возачот на „Фликсбас“ осомничен за убиство од небрежност во Германија
Против возачот на автобусот кој вчера се преврте на германскиот автопат при што загинаа четири лица, а многумина беа повредени, се води истрага за убиство и нанесување телесни повреди од небрежност, соопштија од јавното обвинителство.
Портпаролот на канцеларијата не можеше да каже дали мажот (62) веќе бил сослушан.
Двокатниот европски превозник „Фликсбас“ со 54 лица, меѓу кои и двајца возачи, излетал од автопатот А9 во близина на Лајпциг во средата наутро и се превртел. Автобускиот оператор претходно пријавил дека во автобусот имало 55 лица. Полицијата соопшти дека загинале четири лица, а шест лица се тешко повредени, а 29 лица се полесно повредени.
Не се соопштени детали за здравствената состојба на повредените.
Инспекторите во моментов се фокусирани на утврдување на причините за несреќата. Сите повредени кои се наоѓаат во болница ќе бидат испрашани, доколку тоа им го дозволи здравствената состојба, изјави портпаролката на полицискиот штаб во Лајпциг како одговор на истрагата.
Ќе се нареди и извештај за анализа на автобуската несреќа, соопштија од јавното обвинителство. Првите резултати се очекуваат само за неколку недели.
Идентитетот на четворицата загинати се уште не беше утврден до четвртокот напладне.
„Се трудиме и се надеваме дека ќе можеме да дадеме информации за тоа во попладневните часови“, изјави портпаролката на полицијата.
Автобусот патувал од Берлин до Цирих.
Европа
(Аудио) Кралот Чарлс ја испрати првата јавна порака по дијагнозата на здравјето на Кејт
Порака од кралот Чарлс беше емитувана денеска по повод годишната служба на Величетврток.
Аудиообраќањето на Чарлс беше емитувано на собранието во катедралата „Ворчестер“ во негово отсуство поради тековното лекување на ракот на монархот.
Тој им порача на сите „да ја подадат раката на пријателството“.
„Актот на богослужба, овде во катедралата ‘Ворчестер’, ме потсетува на заклетвата што ја дадов на почетокот на моето крунисување да го следам примерот на Христос ‘да не ми служат, туку да служам’“, рече кралот.
„Тоа е она што секогаш се трудев да го правам и правам со целото мое срце“, додаде тој.
Кралот дојде на тронот пред 18 месеци, а на почетокот на годината му беше дијагностициран рак поради што беше подложен на хемотерапија.
Европа
Заменик-началникот на генералштабот: Британија може да се бори со Русија само 2 месеца
Британските вооружени сили мора да управуваат со оперативниот ризик, што произлегува од недостигот на ресурси што би сакале да ги имаат во идните војни, пишува „Телеграф“.
Информациите се појавија откако Грант Шапс, министерот за одбрана, им рече на пратениците дека лобирал кај премиерот, Риши Сунак, и министерот за економија и финансии, Џереми Хант, повеќе пари во буџетот да се потрошат за одбраната, но не успеал да обезбеди зголемување.
За време на сослушувањето пред пратениците во Комитетот за одбрана на долниот дом, висок офицер на кралските маринци рече: „Ние бевме многу јасни дека сумата што моментно ја трошиме за муниција не ги покрива трошоците во сите области и заканите со кои се соочуваме“.
„Бевме јасни дека треба да потрошиме повеќе пари над буџетот, на она што го нарекуваме интегрирани противвоздушни ракети“.
На прашањето на Марк Франсоа, поранешен министер за вооружени сили, дали е вистина оти Обединетото Кралство „не може да се бори со Владимир Путин повеќе од неколку месеци во целосна воена ситуација поради недостиог на резерви муниција и опрема, Шапс додаде дека секој таков конфликт ќе се води заедно со сојузниците од НАТО, кои заедно би можеле да ја совладаат Русија, наместо само Велика Британија.
„За луѓето што гледаат и слушаат дека Велика Британија не е подготвена за војна исклучиво со Русија, важно е да разберат дека сме во НАТО и постои меѓусојузнички одбранбен договор Член 5, така што никогаш не би биле во таква ситуација“.
Во еден извештај пратениците рекоа дека на вооружените сили им требаат повеќе средства за „учество во операции додека развиваат воена готовност“ или ќе мора да го намалат „оперативниот товар“ на војската.
Поранешните воени началници на комитетот му кажаа дека вооружените сили се ослабени од 2010 година и дека „во конфликт со еднаков противник тие ќе бидат исцрпени по првите неколку месеци од распоредувањето“.
Шапс исто така им рече на пратениците дека лекциите научени од војната во Украина ја покажале важноста на војната со беспилотни летала бидејќи е смртоносна и евтина.
„Ова во Украина е веројатно првата вистинска војна со беспилотни летала и мислам дека никогаш повторно нема да видиме војна која не вклучува тешка употреба на беспилотни летала“, рече тој.
Минатиот месец Обединетото Кралство објави дека, заедно со Латвија, ќе ја предводи новата коалиција за испорака на илјадници беспилотни летала „камикаѕе“ во Украина во услови на растечки недостиг на муниција на фронтот.
„Дроновите ги нарушуваат нормалните факти за војната. Обично секоја генерација станува поскапа за да има смртоносен ефект, но всушност беспилотните летала, кои понекогаш чинат неколку илјади фунти, може да бидат крајно смртоносни“, рече Шапс.
Сепак, тој предупреди дека „основното војување и муницијата“ остануваат важни во секој иден конфликт.