Европа
Оланд го квалификуваше нападот во Изер како терористички чин
Францускиот претседател Франсоа Оланд потврди во петокот дека нападот кој се случи на југоистокот од Франција, во кој е убиено најмалку едно лице, бил терористички чин, како и дека осомничениот главен напаѓач е идентификуван и уапсен, а медиумите објавија дека е уапсена и неговата сопруга.
„Нападот бил терористички… пронајдено е обезглавено тело… Досега знаеме за еден загинат и двајца ранети“, изјави францускиот претседател Франсоа Оланд на прес-конференцијата во Брисел каде што учествува на самитот на Европската унија.
Додаде дека во областа во којашто е извршен нападот се распоредени дополнителни полициски сили за да се избегнат можни натамошни инцидентите. Оланд нагласи дека Франција мора „да ги искорени групите и поединците кои се одговорни за ваквите постапки“.
Според AFP, францускиот претседател се враќа во Париз и свикал итна седница на националниот совет за одбрана.
Агенцијата пренесе и дека и сопругата на главниот осомничен за нападот во Изер, била приведена во близина на градот Лион. Бил извршен претрес во домот на осомничениот во предградието Сен-Приесте. Жената се наоѓа под заштита, на единиците за борба против тероризмот, прецизира AFP.
Претходно министерот за внатрешни работи Бернар Казнев, изјави дека главен осомничен за нападот е 35-годишниот Јасин Сали, кој бил регистриран од француските безбедносни служби во периодот од 2006 до 2008 година поради поврзаност со радикалното салафистичко движење.
Телевизијата BFMTV претходно емитуваше телефонски разговор со сопругата на наводниот терористи. Во него таа рече дека нејзиниот сопруг во петокот утрото, како и вообичаено, заминал на работа но не се вратил за ручек. „Сестра ми му препорача да го вклучам телевизорот. Таа плачеше. Го познавам својот сопруг, ние сме нормално семејство.. Тој одеше на работа и се враќаше. Ние сме нормални муслимани, го одбележуваме Рамазан. Имаме три деца…“, рече интервјуираната жена.
Во петокот околу 10 часот утрото, во кругот на американската енергетска постројка „Air Factory“ во местото Сен-Квентин-Фалавие, во департманот Изер, се случи напад за кој француските власти велат дека е терористички чин. Според некои локални медиуми, во нападот учествувале повеќе лица кои носеле исламистички знамиња и обележја, кои се пробиле со возлило во просторот на фабриката која дошло до експлозија на резервоар со гас. Обвинителството ја води истрагата како терористички напад.
Во нападот еден човек е убиен, а уште најмалку две се ранети. Од територијата на погонот се евакуирани 40 луѓе. Во близина на местото на нападот пронајдено е исламистичко знаме, како и човечка глава одделена од телото, кое е пронајдено на неколку десетици метри. Медиумите, според непотврдени информации, пренесуваат дека станува збор за локален претприемач, односно директор на мало локално транспортно претпријатие.
Засега малку е познато за текот на настаните во кругот на фабриката. Непознато е дали терористите ја предизвикале експлозијата на резервоар за гас, колку експлозии имало вкупно и кога точно бил изведен нападот врз работниците во фабриката која произведува цилиндри за течен гас и хемиски препарати.
Ова е втор терористички напад во Франција за половина година, откако во првата седмица од јануари годинава исламистички напаѓачи убија 17 луѓе во редакцијата на сатиричниот магазин Charlie Hebdo и во продавница за еврејска кошер храна во Париз./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Шпанскиот премиер размислува да се повлече од функцијата, отворена истрага против неговата сопруга
Шпанскиот премиер Педро Санчез денеска објави дека се повлекува од јавните должности затоа што мора „да застане и да размисли“ дали ќе продолжи да биде шеф на владата откако судот во Мадрид отвори прелиминарна истрага против неговата сопруга за корупција и трговско влијание.
„Итно ми треба одговор на прашањето дали вреди, дали да продолжам да ја водам владата или да се откажам од оваа чест“, објави тој преку социјалната мрежа „Икс“.
Синдикатот Манос Лимпијас (Чисти раце) ја пријавил неговата сопруга Бегона Гомез дека им помагала на претприемачите на јавни тендери и го искористила тоа. Судот претходно денеска соопшти дека отворил истрага, без да даде детали.
Министрите од левичарската влада на Санчез оценија дека се работи за лажен извештај и дека синдикатот што го доставил е близок до екстремната десница.
Европа
Суспендиран рускиот свештеник кој одржа јавна молитва за Навални
Рускиот православен свештеник, кој во март отслужи служба за мртвите за починатиот руски опозициски лидер Алексеј Навални, е суспендиран од свештеничките должности на три години, соопшти Московската епархија на Руската православна црква.
Во соопштението објавено вчера на официјалната веб-страница на епархијата, не се наведува зошто е казнет свештеникот Дмитриј Сафронов. Нему му е забрането да дава благослов, да ја носи облеката и крстот на црковниот свештеник до 2027 година.
Сафронов треба да биде префрлен и во друга црква во Москва за да ги извршува должностите на читател на псалми. По завршувањето на периодот на покајание, врз основа на повратни информации од местото на послушанието, ќе се донесе одлука за можноста за негова понатамошна свештеничка служба“, се вели во соопштението на епархијата.
Сафронов одржа комеморација на 26 март, на која присуствуваа илјадници луѓе кои дојдоа да се простат од Навални, најжестокиот критичар на претседателот Владимир Путин во Русија.
Навални почина во февруари на 47-годишна возраст во казнена колонија на Арктикот.
Европа
Судот во Русија ја одби жалбата на американскиот новинар кој е во затвор поради шпионажа
Руски суд денеска ја отфрли последната од серијата жалби на новинарот на „Волстрит журнал“, Еван Гершкович, против истражниот затвор под обвинение за шпионажа.
Гершкович (32) е првиот американски новинар уапсен во Русија под обвинение за шпионажа по Студената војна. На 29 март минатата година тој беше приведен од Федералната служба за безбедност (ФСБ), а беше уапсен на задача во рускиот град Екатеринбург.
Руските власти тврдат дека тој се обидувал да дојде до доверливи информации кои требало да и ги пренесе на американската влада, но новинарот, весникот за кој работи и американската влада негираат дека тој е шпион.
Датумот на судењето се уште не е одреден, а притворот минатиот месец му беше продолжен за уште три месеци и треба да трае до 30 јуни.
Минатомесечното рочиште беше затворено за печатот, но во вторникот на новинарите им беше дозволено да го снимат Гершкович додека тој стои во стаклената кутија во судницата и им се насмевнува на колегите од медиумите.
Рускиот претседател Владимир Путин изјави дека во одреден момент Гершкович би можел да биде ослободен во замена за рускиот затвореник кој се држи во странство, но таков договор се уште не е постигнат.