Европа
Оланд му изразил на Путин загриженост поради јакнење на тензиите во Украина
Францускиот претседател Франсоа Оланд му ја изразил својата загриженост на рускиот колега по должност Владимир Путин во телефонскиот разговор во кој учествуваше и германската канцеларка Ангела Меркел во вторникот, поради јакнењето на тензиите последните денови и се почестото кршење на прекинот на огнот во источна Украина, објави Елисејската палата.
Претходно за истиот телефонски разговор меѓу тројцата челници извести и Кремљ во чиешто соопштение беа акцентирани согласноста за забрзување на законодавното утврдување на специјалниот статус во рамите на Украина на одметнатиот роскојазичен југоисточен украински регион Донбас, како и забелешките на рускиот претседател Владимир Путин за потребата да запрат „провокациите“ на Киев на Крим и неопходноста од повлекување на тешкото оружје од линијата на конфронтацијата во источна Украина.
Францускиот претседател Франсоа Оланд во разговорот „потсети на непроменливиот став на Франција дека анексијата на Крим нема да биде признаена“ и „изразил загриженост поради јакнењето на тензиите последните седмици и зачестеното кршење на прекинот на огнот“ на истокот на Украина, се наведува во соопштението, на Елисејската палата, пренесува AFP.
Оланд предупредил на ризиците од ескалација за мировниот процес и истакнал дека не постои алтернатива за мирното решавање на кризата. Се заземал, исто така, за спроведување на сите обврски од договорот од Минск, изразил желба наскоро да се одржи нов состанок во ткн Нормандиски формат, односно Украина, Русија, Франција и Германија посветен на украинската криза.
Тројцата лидери се договориле повторно да ја разгледаат ситуацијата во Украина на 4-ти и 5-ти септември во Пекинг, на маргините од самитот на групата Г20, потврдил кабинетот на францускиот претседател./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Шпанскиот премиер размислува да се повлече од функцијата, отворена истрага против неговата сопруга
Шпанскиот премиер Педро Санчез денеска објави дека се повлекува од јавните должности затоа што мора „да застане и да размисли“ дали ќе продолжи да биде шеф на владата откако судот во Мадрид отвори прелиминарна истрага против неговата сопруга за корупција и трговско влијание.
„Итно ми треба одговор на прашањето дали вреди, дали да продолжам да ја водам владата или да се откажам од оваа чест“, објави тој преку социјалната мрежа „Икс“.
Синдикатот Манос Лимпијас (Чисти раце) ја пријавил неговата сопруга Бегона Гомез дека им помагала на претприемачите на јавни тендери и го искористила тоа. Судот претходно денеска соопшти дека отворил истрага, без да даде детали.
Министрите од левичарската влада на Санчез оценија дека се работи за лажен извештај и дека синдикатот што го доставил е близок до екстремната десница.
Европа
Суспендиран рускиот свештеник кој одржа јавна молитва за Навални
Рускиот православен свештеник, кој во март отслужи служба за мртвите за починатиот руски опозициски лидер Алексеј Навални, е суспендиран од свештеничките должности на три години, соопшти Московската епархија на Руската православна црква.
Во соопштението објавено вчера на официјалната веб-страница на епархијата, не се наведува зошто е казнет свештеникот Дмитриј Сафронов. Нему му е забрането да дава благослов, да ја носи облеката и крстот на црковниот свештеник до 2027 година.
Сафронов треба да биде префрлен и во друга црква во Москва за да ги извршува должностите на читател на псалми. По завршувањето на периодот на покајание, врз основа на повратни информации од местото на послушанието, ќе се донесе одлука за можноста за негова понатамошна свештеничка служба“, се вели во соопштението на епархијата.
Сафронов одржа комеморација на 26 март, на која присуствуваа илјадници луѓе кои дојдоа да се простат од Навални, најжестокиот критичар на претседателот Владимир Путин во Русија.
Навални почина во февруари на 47-годишна возраст во казнена колонија на Арктикот.
Европа
Судот во Русија ја одби жалбата на американскиот новинар кој е во затвор поради шпионажа
Руски суд денеска ја отфрли последната од серијата жалби на новинарот на „Волстрит журнал“, Еван Гершкович, против истражниот затвор под обвинение за шпионажа.
Гершкович (32) е првиот американски новинар уапсен во Русија под обвинение за шпионажа по Студената војна. На 29 март минатата година тој беше приведен од Федералната служба за безбедност (ФСБ), а беше уапсен на задача во рускиот град Екатеринбург.
Руските власти тврдат дека тој се обидувал да дојде до доверливи информации кои требало да и ги пренесе на американската влада, но новинарот, весникот за кој работи и американската влада негираат дека тој е шпион.
Датумот на судењето се уште не е одреден, а притворот минатиот месец му беше продолжен за уште три месеци и треба да трае до 30 јуни.
Минатомесечното рочиште беше затворено за печатот, но во вторникот на новинарите им беше дозволено да го снимат Гершкович додека тој стои во стаклената кутија во судницата и им се насмевнува на колегите од медиумите.
Рускиот претседател Владимир Путин изјави дека во одреден момент Гершкович би можел да биде ослободен во замена за рускиот затвореник кој се држи во странство, но таков договор се уште не е постигнат.