Европа
Оставки на Милибанд, Клег и Фараж по поразот на британските избори
Челникот на британските лабуристи Ед Милибанд, вицепремиер и шефот на Либералните демократи Ник Клег, како и претседателот на Партијата на независност на Обединетото Кралство (UKIP), Најџел Фараж, си поднесоа во петокот оставки по тешкиот изборен пораз на нивните партии.
Лабуристите на Ед Милибанд, коишто на општите избори во четвртокот влегоа очекувајќи дека ќе ја освојат власта, наместо тоа убедливо се поразени од Конзервативната партија на досегашниот премиер Дејвид Камерон, којашто самостојно ќе владее благодарејќи на стабилното парламентарно мнозинство.
„На Британија ѝ е потребна силната Лабуристичка партија. На Британија ѝ е потребна Лабуристичката партија којашто може да се опорави по овој пораз и да формира влада којашто повторно ќе ги штити правата на работниците. Дојде времето некој друг да го презема водството на оваа партија и јас поднесувам оставка“, изјави Милибанд на партискиот собир и најави дека партијата до изборот на новото раководство ќе ја води неговата заменичка Хариет Харман.
Челникот на либералните демократи, Клег кој по изборите во 2010 година влезе во коалиција со конзервативците на Камерон, го задржа местото во парламентот, во што не успеаја голем број од неговите партиски колеги. По пребројувањето на речиси сите гласачки ливчиња, либералните демократи освоија само 8 во однос на 57 пратенички мандати освоени на изборите во 2010-та.
„Јасно е дека резултатите се многу полоши и понепријатни од најлошиот кошмар. Морам да ја преземам одговорноста и оттаму објавувам дека ќе се повлечам од местото претседател на Либералните демократи. Изборите за новото раководство ќе се одржат во согласност со партискиот статут“, изјави на прес-конференцијата Ник Клег, за кого медиумите пренесуваат дека изгледал многу исцрпено.
Фараж, кој на изборите не освои парламентарен мандат, исто така, на прес-конференција изјави дека не ја исклучува можноста од повторно кандидирање за челник на UKIP., „Новите партиски избори ќе се одржат во септември и преку летото ќе размислам дали повторно ќе се натпреварувам за таа должност“, истакна Најџел Фараж. Тој и пред изборите најави дека ќе отстапи доколку не освои мандат, а во петокот тоа и го потврди велејќи дека е „човек од збор“.
Агенцијата Reuters во меѓувреме објави дека конзервативците го осигуриле потребното мнозинство во парламентот. Така, во моментот кога не беа познати уште само десет од 650-те мандати, Конзервативната партија има обезбедени 325 пратеници. Главните ривали, лабуристите, пак, обезбедиле 228 пратеници во парламентот.
Тоа значи практични дека конзервативците обезбедиле доволно мнозинство, бидејќи четворицата пратеници од северноирскиот Шин Фејн нема да ја прифатат должноста во Вестминстер, а се претпоставува дека резултатите ќе бидат уште подобри за конзервативците кога ќе се обработат сите изборни материјали.
Шкотската национална партија (SNP), исто така, може да се смета за уверлив победник на изборите за локалниот парламент на општите избори, освојувајќи 56 од 59-те мандати, што се оценува како преседан. Од 1955 година, конзервативците беа најголемата партија во Шкотска, но тие на изборите во четвртокот добија само еден мандат. Уште пое ден пратеник ќе имаат и лабуристите и либерал демократите.
За изборите за составот на британскиот парламент, SNP, пак, најверојатно ќе има 56 мандати, што е за дури 50 повеќе отколку во претходниот парламентарен состав./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Шолц: Војната во Украина може да трае уште неколку години
Германскиот канцелар Олаф Шолц изјави дека верува оти војната во Украина може да се пролонгира уште неколку години.
„Никој не може да каже дали оваа војна ќе трае можеби пет години“, рече Шолц вечерва во источниот германски град Кемниц.
Тој ја бранеше германската воена помош за Украина и додаде дека заедно со неа мора да се негува и дипломатијата.
„Меѓутоа, од почетокот на војната, рускиот претседател Владимир Путин не покажа знаци на движење напред“, рече тој.
„Диктиран мир е неприфатлив. Не смее да се дозволи да се извлече со ова“, додаде германскиот канцелар.
Европа
Лавров: Москва се уште инсистира на вистинска руска Украина
По повеќе од две години интензивна војна во Украина, рускиот министер за надворешни работи Сергеј Лавров денеска го потврди тврдењето на Москва дека полага право да владее над соседната земја.
„Во најдобар случај, иднината на западна Украина е непозната“, рече Лавров во интервјуто во Москва за неколку руски телевизиски станици.
„Во спротивно ќе има само Украина која е навистина руска, која сака да биде дел од рускиот свет, која сака да зборува руски и да ги образува своите деца“, рече тој.
Не станува збор за каква било алтернатива, смета Лавров, кој е министер за надворешни работи од 2004 година и е лојален поддржувач и доверлив човек на претседателот Владимир Путин.
Русија не сака да ги напаѓа земјите на НАТО, како што се тврди на Запад за да ги исплаши гласачите, рече Лавров. „Но, ако сакаат да го донесат НАТО до нашите граници, тогаш секако дека ќе знаеме како да го спречиме тоа во Украина“, рече тој.
Како и другите високи членови на руското раководство, Лавров рече дека Русија е подготвена за преговори со Украина, но само под посебни услови.
Нема да има прекин на огнот за време на можните преговори, разговорите со украинскиот претседател Володимир Зеленски се бесмислени, а Киев мора да се откаже од својата формула за мир, рече тој.
Во есента 2022 година, Зеленски презентираше десет точки за мир, меѓу кои се издвојуваат повлекувањето на руската армија, реконструкцијата и компензацијата и гонењето на воените злосторници.
Европа
Генералниот секретар на НАТО и вети на Украина дополнителни системи за воздушна одбрана
Сојузниците на НАТО се согласија да обезбедат дополнителни системи за противвоздушна одбрана во Киев, изјави шефот на НАТО Јенс Столтенберг по специјалната средба на министрите за одбрана на сојузниците со украинскиот претседател Володимир Зеленски.
„Покрај „Патриот“, има и други оружја што сојузниците можат да ги обезбедат, вклучувајќи го и SAMP/T (францускиот систем), а многу други кои немаат достапни системи ветија дека ќе обезбедат финансиска поддршка за нивните набавки за Украина“, изјави Столтенберг за новинарите во Брисел.
Зеленски го побара состанокот бидејќи неговата земја се соочува со недостиг на муниција и задржување на клучните американски финансирања, што со месеци е блокирано од републиканците во Конгресот, додека ЕУ не успева да испорача муниција навреме.
Тој во петокот им рече на членките на НАТО дека на Украина и се потребни најмалку седум системи за воздушна одбрана „Патриот“ или други напредни системи за воздушна одбрана за да се спротивстави на руските воздушни напади, повикувајќи ги да ја засилат воената помош за Киев.
Во емотивниот говор преку видео врска, украинскиот лидер го опиша сегашното ниво на странска помош како „многу ограничено“ и рече дека Израел не бил оставен на себе за време на масовниот ирански воздушен напад во саботата.
„(Рускиот претседател Владимир) Путин мора да биде симнат на земјата, а нашето небо мора повторно да стане безбедно… И тоа целосно зависи од вашиот избор… (од) изборот дали сме навистина сојузници“, рече Зеленски во неговиот говор.