Европа
Папата откри дека ја налутил Меркел со својата споредба
Поглаварот на Римокатоличката црква, папата Франциск откри дека ја разлутил германската канцеларка Ангела Меркел која Европа ја споредил со јалова жена, во разговорот објавен во понеделникот.
Во разговорот за италијанскиот дневен весник Corriere della Sera, папата Франциск, или Хорхе Бергољио, вели дека во ноември 2014 година по говорот во европските институции во Стразбур телефонски го повикала германската канцеларка Ангела Меркел. „Беше помалку лута, бидејќи Европа ја споредив со јалова жена. Ме запраша дали навистина мислам дека Европа не може повеќе да раѓа деца“, вели папата.
Вели и дека ѝ одговорил: „Европа може уште да ги има, и тоа многу, бидејќи има цврсти и длабоки корени“.
Европа „поседува единствена историја“, истакнува папата, „имала и уште може да ја има темелната улога, доволно е да се потсетите на нејзината култура и традицијата којашто ја отелотворува“. „Во најтешките моменти покажа дека поседува ненасетени можности, додава“, папата Аргентинец, првиот не-Европеец кој доаѓа на челото на Светата столица.
Папата ја повикува Европа во којашто пристигнуваат реките бегалци, да се „промени“, „реформира“ и „обнови скршениот“ образовен систем. Силата на Стариот континент, оценува Светиот отец, може да му дадата „заборавените великани“ како што е германскиот канцелар Конрад Аденауер, Французот Роберт Шуман и Италијанецот Алчиде де Гаспери.
Папата и претходно често беше извонредно критичен кон европските институции. Минатата седмица во разговорот за интернет дневниот весник Asia Times, по пофалбите изречени на кинеската динамичност, изјави: „Имаме баба Европа. Се чини дека таа не е повеќе мајката Европа. Се надевам дека ќе биде кадра повторно да ја преземе таа улога!“, рече папата./крај/мф/сн
Извор: AFP
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Шпанскиот премиер размислува да се повлече од функцијата, отворена истрага против неговата сопруга
Шпанскиот премиер Педро Санчез денеска објави дека се повлекува од јавните должности затоа што мора „да застане и да размисли“ дали ќе продолжи да биде шеф на владата откако судот во Мадрид отвори прелиминарна истрага против неговата сопруга за корупција и трговско влијание.
„Итно ми треба одговор на прашањето дали вреди, дали да продолжам да ја водам владата или да се откажам од оваа чест“, објави тој преку социјалната мрежа „Икс“.
Синдикатот Манос Лимпијас (Чисти раце) ја пријавил неговата сопруга Бегона Гомез дека им помагала на претприемачите на јавни тендери и го искористила тоа. Судот претходно денеска соопшти дека отворил истрага, без да даде детали.
Министрите од левичарската влада на Санчез оценија дека се работи за лажен извештај и дека синдикатот што го доставил е близок до екстремната десница.
Европа
Суспендиран рускиот свештеник кој одржа јавна молитва за Навални
Рускиот православен свештеник, кој во март отслужи служба за мртвите за починатиот руски опозициски лидер Алексеј Навални, е суспендиран од свештеничките должности на три години, соопшти Московската епархија на Руската православна црква.
Во соопштението објавено вчера на официјалната веб-страница на епархијата, не се наведува зошто е казнет свештеникот Дмитриј Сафронов. Нему му е забрането да дава благослов, да ја носи облеката и крстот на црковниот свештеник до 2027 година.
Сафронов треба да биде префрлен и во друга црква во Москва за да ги извршува должностите на читател на псалми. По завршувањето на периодот на покајание, врз основа на повратни информации од местото на послушанието, ќе се донесе одлука за можноста за негова понатамошна свештеничка служба“, се вели во соопштението на епархијата.
Сафронов одржа комеморација на 26 март, на која присуствуваа илјадници луѓе кои дојдоа да се простат од Навални, најжестокиот критичар на претседателот Владимир Путин во Русија.
Навални почина во февруари на 47-годишна возраст во казнена колонија на Арктикот.
Европа
Судот во Русија ја одби жалбата на американскиот новинар кој е во затвор поради шпионажа
Руски суд денеска ја отфрли последната од серијата жалби на новинарот на „Волстрит журнал“, Еван Гершкович, против истражниот затвор под обвинение за шпионажа.
Гершкович (32) е првиот американски новинар уапсен во Русија под обвинение за шпионажа по Студената војна. На 29 март минатата година тој беше приведен од Федералната служба за безбедност (ФСБ), а беше уапсен на задача во рускиот град Екатеринбург.
Руските власти тврдат дека тој се обидувал да дојде до доверливи информации кои требало да и ги пренесе на американската влада, но новинарот, весникот за кој работи и американската влада негираат дека тој е шпион.
Датумот на судењето се уште не е одреден, а притворот минатиот месец му беше продолжен за уште три месеци и треба да трае до 30 јуни.
Минатомесечното рочиште беше затворено за печатот, но во вторникот на новинарите им беше дозволено да го снимат Гершкович додека тој стои во стаклената кутија во судницата и им се насмевнува на колегите од медиумите.
Рускиот претседател Владимир Путин изјави дека во одреден момент Гершкович би можел да биде ослободен во замена за рускиот затвореник кој се држи во странство, но таков договор се уште не е постигнат.