Европа
Полската полиција спречи масовна тепачка меѓу поддржувачките и противничките на абортусот
Избегната е масовна тепачка во понеделникот во центарот на полската престолнина Варшава за време на протестите против заострувањето на националното законодавството за абортусот, кога противничките на прекинот на бременоста се појавиле на местото на одржување на демонстрациите за да ја изразат својата спротивна позиција.
Во еден момент во текот на блиската средба меѓу двете спротиставени групи, полицијата морала да интервенира за да ги раздели кога започнале да разменуваат тупаници, пренесува агенцијата ТАСС.
„Ние го браниме правото на животот. Ние сме против нацистичката политика на убиство на болните луѓе“, извикувале приврзаничките на построгиот закон за абортусот. „Ние се залагаме за слободата и сакаме самите да носиме одлуки за нашите судбини“, извикувале, пак, приврзаничките на слободата на изборот при прекинот на бременоста, пренесуваат полските медиуми.
Протестите во Варшава се одржаа во рамките на вториот Сеполски штрајк на жените. Таа акција започна во неделата и продолжи во понеделникот во повеќе од 100 градови ширум Полска.
Првата акција на протести наречена „Црн протест“, се одржа на 3-ти октомври. Учесничките и поддржувачите на овие протести се залагаат за правата на жените и против забраната за абортус. Три дена подоцна, под притисок на масовните протести на кои учествуваа околу 100.000 жени во целата земја, конзервативната влада на партијата Правда и справедливост (PiS), отфрли еден од нацрт законите кои го забранува абортусот. Но три дена по отфрлањето на тој предлог, челникот на PiS, Јарослав Качински изјави дека неговата партија и натаму сака да ја ограничи можноста за прекинување на бременоста, „дури и кога смртта на детето е неизбежна, за да биде крстено“.
„Успеавме да го отфрлиме апсурдниот закон и тензиите во земјата попуштија. Но сега власта тоа сака да го искористи и да спроведе нов закон, можеби помалку апсурден, но исто така неприфатлив, Не се согласуваме со тоа“, изјавила за AFP Алексндра Секула, една од демонстрантките,
Во текот на обновените протести кои групата наречена Штрајк на жените ги организираше и во Катовице, Вроцлав, Познан, Гданск, Варшава и Бјалисток, демонстрантките предупредуваа на „вмешување на црквата во политиката“ и „кршење на правата на жените“.
Една од организаторките на протестот Божена Пржилушка изјавила дека „црквата се вмешува во политиката и во правосудството на земјата. Тие ги уценуваат политичките партии и се мешаат во работи кои не се однесуваат на нив“. „Ние се бориме и за секуларна држава, за правото на контрацепција и за еднакви права меѓу мажите и жените во поглед на платите“, појаснила друга организаторка на протестите Камила Мајер.
Сегашниот полски закон усвоен во 1993 година. кој е еден од најрестриктивните во Европа, го дозволува прекинот на бременоста само во три случаи: опасност по животот и здравјето на мајата, во случај на тешка патологија на ембрионот и бременост по силување или инцест.
Меѓутоа, активистите од кампањата „За живот“ со предлогот од средината на септември би дозволиле абортус само доколку животот на мајката е загрозен, и бараат да се зголеми максималната казна затвор за оние кои го извршуваат од две на пет години. Граѓанската иницијатива која во парламентот ја поднесе здружението „Запрете го абортусот“, сојуз на различни групи против абортусот, предвидува и мајките кои направиле абортус да бидат осудени на затвор, иако судиите би можеле да се откажат од казните во таквите случаи.
Католичката црква, којашто е многу влијателна во Полска, ја одобри таа иницијатива претходно оваа година, иако бискупите се изјаснија против одредбите за затворање на мајките.
Овој предлог, кој Советот на Европа го нарече „сериозно назадување во правата на жените“, поттикна неколку големи поворки на поборниците на правото на избор во случајот на абортусот, како и иницијативата за либерализација на постојниот закон за абортус.
Полска, којашто има 38 милиони жители, има помалку од 2.000 легални абортуси годишно, но групите за женските права проценуваат дека дури 100.000 до 150.000 такви зафати се вршат илегално или во странство.
Предлогот против абортусот собра околу половина милион потписи за поддршка, многу повеќе отколку што е потребно за отворање на парламентарна расправа за тоа. Освен казнувањето на лекарите кои извршуваат абортуси, се бараше и државните и локалните власти да понудат поддршка за жените и за семејствата со хендикепирани деца и оние кои се родени како последица на силување или инцест.
Иако составот на парламентот не оди во прилог на надежите на активистите за правото на избор, тие не се откажуваат. Го основаа здружението „Спасете ги жените“ и поднесоа иницијатива во парламентот која би дозволувала абортус до 12-та седмица од бременоста. За тоа во септември собраа 215.000 потписи. Парламентот ја одби оваа иницијатива во септември во првото читање.
Парламентот, исто така, ќе расправа и за предлог законот кој го предложија пратениците, а чија цел е да го ограничи вештачки потпомогнатото оплодување. Доколку овој закон мине, замрзнувањето на ембрионите би станало илегално. Предложувачите на законот сметаат дека новото живо суштество настанува во моментот на оплодувањето. Законот би дозволувал вештачко оплодување само на едно јајце по циклус, што значително би ги намалило изгледите за остварување на бременоста. /крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Судот во Русија ја одби жалбата на американскиот новинар кој е во затвор поради шпионажа
Руски суд денеска ја отфрли последната од серијата жалби на новинарот на „Волстрит журнал“, Еван Гершкович, против истражниот затвор под обвинение за шпионажа.
Гершкович (32) е првиот американски новинар уапсен во Русија под обвинение за шпионажа по Студената војна. На 29 март минатата година тој беше приведен од Федералната служба за безбедност (ФСБ), а беше уапсен на задача во рускиот град Екатеринбург.
Руските власти тврдат дека тој се обидувал да дојде до доверливи информации кои требало да и ги пренесе на американската влада, но новинарот, весникот за кој работи и американската влада негираат дека тој е шпион.
Датумот на судењето се уште не е одреден, а притворот минатиот месец му беше продолжен за уште три месеци и треба да трае до 30 јуни.
Минатомесечното рочиште беше затворено за печатот, но во вторникот на новинарите им беше дозволено да го снимат Гершкович додека тој стои во стаклената кутија во судницата и им се насмевнува на колегите од медиумите.
Рускиот претседател Владимир Путин изјави дека во одреден момент Гершкович би можел да биде ослободен во замена за рускиот затвореник кој се држи во странство, но таков договор се уште не е постигнат.
Европа
Нова корупциска афера во Украина, осомничен министер за земјоделство
Украинската антикорупциска полиција го именуваше министерот за земјоделство Микола Солски како осомничен во кривичната истрага за незаконско стекнување на државно земјиште во вредност од седум милиони долари.
Солски, кој го надгледува производството на жито во Украина за време на војната од март 2022 година, рече дека не разбира зошто сега се појавија наводите поврзани со настаните од 2017 и 2018 година.
„Не се согласувам со обвинувањата“, им рече тој на новинарите во Киев откако Украинското национално биро за борба против корупцијата објави соопштение со резултатите од истрагата.
Канцеларијата соопшти дека министерот го предводел планот за стекнување на државно земјиште во вредност од околу 6,9 милиони евра и обид да се стекне земјиште во вредност од 190 милиони гривни.
Солски е првиот министер во владата на претседателот Володимир Зеленски кој е осомничен во корупциски скандал.
Зеленски се обидува да спроведе стапка на нулта толеранција за корупција, а минатата година го отпушти министерот за одбрана поради обвинувања за примање мито поврзани со одбранбената индустрија.
Законодавците изминативе денови порачаа дека очекуваат реконструкција на Владата, секако до крајот на пролетта.
Европа
Русија: Ќе ги таргетираме украинските магацини во кои се доставува западното оружје
Русија ќе ги интензивира нападите врз украинските бази за складирање во кои е сместено оружјето доставено од Запад, изјави денеска министерот за одбрана, Сергеј Шојгу, а Соединетите Држави се подготвуваат да одобрат и достават долго одложувана нова воена помош.
Шојгу рече дека Русија „го отфрли митот за супериорноста на западното оружје“ и дека нејзините сили презеле иницијатива на фронтот долг 1.000 километри.
Тој алудира на фактот дека в сабота, по гласањето во Претставничкиот дом, Вашингтон е подготвен да достави нов пакет воена помош за Украина, вреден речиси 61 милијарда долари.
Украинскиот претседател Володимир Зеленски изјави дека Киев набргу ќе добие повеќе ракетни системи со долг дострел ATACMS како дел од ветениот пакет. Американските власти рекоа дека помошта ќе вклучува испорака на муниција и пресретнувачи за системи за противвоздушна одбрана за Украина.
„Со оглед на заканите од САД и нивните сојузници, ние мора да продолжиме да ги подобруваме составот и структурата на вооружените сили и да го зголемиме производството на најпопуларното оружје и воена опрема“, рече Шојгу додавајќи дека руските сили „ќе го зголемат интензитетот на нападите врз логистичките центри и базите за складирање на западното оружје“.
Рускиот министер за одбрана повтори дека Русија овој месец ги освоила селата Первомајске, Бохданивка и Новомихајливка.
Во понеделникот украинскиот командант го негира падот на Новомихајливка велејќи дека неговите војници сè уште држат 15- 20 отсто од селото.
Руското Министерство за одбрана објави дека руските маринци, кои учествувале во заземањето на Новомихајливка, заробиле оружје од западно производство, вклучувајќи шведски фрлачи на гранати, американски противоклопни системи Javelin и системи за електронско војување на НАТО.