Европа
Претставниците на Киев не дојдоа на преговорите во Минск, нови цивилни жртви во Донецк
На двете страни во борбите во источна Украина во петокот загинале најмалку 24 луѓе, од кои повеќето цивили во градот Донецк, а обидот да се обноват мировните преговори во белоруската престолнина Минск пропадна поради недоаѓањето на претставниците на Киев, додека челниците на рускојазичните побунети региони изјавија оти се подготвени на заедничко прогласување на прекин на огнот и да ги запрат силите на линијата на раздвојувањето.
Како што беше објавено претходно во четвртокот од неговиот кабинет, украинскиот претседател Петро Порошенко ја повикал Контактната група којашто ја сочинуваат поранешниот украински претседател Леонид Кучма, рускиот амбасадор во Минск Михаил Зурабов и актуелната претставничка на ОБСЕ амбасадорката, Хајди Талјавини, да организира итни консултации со бунтовниците за прекин на огнот.
Преговорите на претставниците на рускојазичните бунтовници, на Киев и на Москва кои за петокот го закажа Организацијата за безбедност и соработка во Европа (ОБСЕ) се откажани, изјави за AFP претставникот во преговорите на самопрогласената Народна република Донецк, Денис Пушилин, „Белорускиот министер за надворешни работи потврди денеска дека претставникот на Киев нема да дојде, преговорите пропаднаа. Ние денеска заминуваме од Минск“, рече Пушилин.
Доколку се одржеа овие преговори во Минск, тоа ќе беа првите преговори откако со минатонеделното напредување на бунтовничките сили сосема пропадна петмесечното примирје забележува Reuters. Проруските бунтовници тогаш објавија дека нивните операции се поттикнати од желбата да се отфрлат украинските сили кои ги гранатирале градовите во источните региони.
Засега нема информации од Киев за причините за отсуството на неговиот претставник на преговорите.
А на теренот борбите не престанува, и во Донецк, милионскиот град кој е главното упориште на бунтовниците, во гранатирање загинаа 19 цивили. Уште пет луѓе загинале додека чекале во ред да примат хуманитарна помош, пишува AFP. Снимателот на Reuters јави дека во Донецк видел четири прекриени трупови крај гранатираниот културен центар, и уште едно безживотно тело во целосно уништен автомобил. Станува збор за луѓе на коишто штотуку им била дистрибуирана хуманитарната помош кој пристигнува од Русија, кога паднала граната.
Киев објави дека гранатирањето во петокот е дело на бунтовниците, но Reuters забележува дека во текот на судирот веќе двете страни меѓусебно се обвинуваа. Покрај тоа, малку е веројатно дека проруските бунтовници би го гранатирале градот кој целосно го контролираат, а украинските сили ја држат стратешката позиција на блискиот меѓународен но сега речиси целосно разурнат аеродром.
Доцна попладнето во петокот од Минск двете самопрогласени ткн Народни републики, во Донецк и во Луганск, објавија заедничко соопштение, потпишано од претставниците Денис Пушилин односно Владислав Дејнего, дека „Донецката народна република“ е подготвена само на заеднички прекин на огнот (со украинските сили) и да ги запре активностите на своите сили на фактичката линија на контактот, пренесува РИА Новости.
„Во моментов ДНР е подготвена за прекин на огнот, но само земно, а исто така и на запирање на единците на милициите на фактичката линија на раздвојување со спротиставената страна којашто е формирана сега“, се вели во изјавата објавена на интернет страницата на донецките бунтовнички власти./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Шпанскиот премиер размислува да се повлече од функцијата, отворена истрага против неговата сопруга
Шпанскиот премиер Педро Санчез денеска објави дека се повлекува од јавните должности затоа што мора „да застане и да размисли“ дали ќе продолжи да биде шеф на владата откако судот во Мадрид отвори прелиминарна истрага против неговата сопруга за корупција и трговско влијание.
„Итно ми треба одговор на прашањето дали вреди, дали да продолжам да ја водам владата или да се откажам од оваа чест“, објави тој преку социјалната мрежа „Икс“.
Синдикатот Манос Лимпијас (Чисти раце) ја пријавил неговата сопруга Бегона Гомез дека им помагала на претприемачите на јавни тендери и го искористила тоа. Судот претходно денеска соопшти дека отворил истрага, без да даде детали.
Министрите од левичарската влада на Санчез оценија дека се работи за лажен извештај и дека синдикатот што го доставил е близок до екстремната десница.
Европа
Суспендиран рускиот свештеник кој одржа јавна молитва за Навални
Рускиот православен свештеник, кој во март отслужи служба за мртвите за починатиот руски опозициски лидер Алексеј Навални, е суспендиран од свештеничките должности на три години, соопшти Московската епархија на Руската православна црква.
Во соопштението објавено вчера на официјалната веб-страница на епархијата, не се наведува зошто е казнет свештеникот Дмитриј Сафронов. Нему му е забрането да дава благослов, да ја носи облеката и крстот на црковниот свештеник до 2027 година.
Сафронов треба да биде префрлен и во друга црква во Москва за да ги извршува должностите на читател на псалми. По завршувањето на периодот на покајание, врз основа на повратни информации од местото на послушанието, ќе се донесе одлука за можноста за негова понатамошна свештеничка служба“, се вели во соопштението на епархијата.
Сафронов одржа комеморација на 26 март, на која присуствуваа илјадници луѓе кои дојдоа да се простат од Навални, најжестокиот критичар на претседателот Владимир Путин во Русија.
Навални почина во февруари на 47-годишна возраст во казнена колонија на Арктикот.
Европа
Судот во Русија ја одби жалбата на американскиот новинар кој е во затвор поради шпионажа
Руски суд денеска ја отфрли последната од серијата жалби на новинарот на „Волстрит журнал“, Еван Гершкович, против истражниот затвор под обвинение за шпионажа.
Гершкович (32) е првиот американски новинар уапсен во Русија под обвинение за шпионажа по Студената војна. На 29 март минатата година тој беше приведен од Федералната служба за безбедност (ФСБ), а беше уапсен на задача во рускиот град Екатеринбург.
Руските власти тврдат дека тој се обидувал да дојде до доверливи информации кои требало да и ги пренесе на американската влада, но новинарот, весникот за кој работи и американската влада негираат дека тој е шпион.
Датумот на судењето се уште не е одреден, а притворот минатиот месец му беше продолжен за уште три месеци и треба да трае до 30 јуни.
Минатомесечното рочиште беше затворено за печатот, но во вторникот на новинарите им беше дозволено да го снимат Гершкович додека тој стои во стаклената кутија во судницата и им се насмевнува на колегите од медиумите.
Рускиот претседател Владимир Путин изјави дека во одреден момент Гершкович би можел да биде ослободен во замена за рускиот затвореник кој се држи во странство, но таков договор се уште не е постигнат.