Европа
Путин, Порошенко и Меркел разговараа за примирјето и Дебалцево
Прашањата во врска со почитувањето на договорениот прекин на огнот, повлекувањето на тешкото вооружување, како и состојбата во Дебалцево, и другите мерки за постигнување мир на југоистокот од Украина, беа дискутирани во текот на телефонскиот разговор меѓу дел од челниците на ткн „нормандска четворка“, односно рускиот, украинскиот и францускиот претседател, Владимир Путин, Петро Порошенко и Франсоа Оланд, и германската канцеларка Ангела Меркел, кои на 12-ти февруари во белоруската престолнина Минск ги договорија мерки за надминување на украинската криза, објави Кремљ.
Според договорот по маратонските 16-часовни преговори, четворицата челници треба да одржуваат постојани контакти со цел да се следи исполнувањето на мерките предвидени со Минската спогодба или решавање на проблемите кои може да се појават на теренот, меѓутоа разговорот ноќта кон вторникот минал без учество на францускиот претседател.
Како што соопшти Елисејската палата, францускиот претседател Франсоа Оланд претходно доцна вечерта во понеделникот разговарал со германската канцеларка Ангела Меркел и со украинскиот претседател Петро Порошенко.
„Изразија загриженост поради продолжување на борбите во Дебалцево. Исто така, изразија желба на набљудувачите на Организацијата за безбедност и соработка во Европа (ОБСЕ) да им се овозможи слободен пристап за својата работа на теренот на објективен начин“, соопшти кабинетот на Оланд.
ОБСЕ во неделата соопшти дека рускојазичните бунтовници одбиле на нејзините набљудувачи да им овозможат пристап кон градот Дебалцево во кој околу осум илјади украински војници се наоѓаат во опкружување.
Проруските бунтовници појаснија дека главниот пат кон Дебалцево е миниран од страна на украинската армија, а еден од командантите на силите на самопрогласената Народна република Донецк, Едуард Басурин, изјави дека поради постојаното гранатирање од страна на украинските сили, приодот кон градот е небезбеден.
Додаде и дека на украинските сили им оставиле ткн „зелен коридор“ за повлекување кон внатрешноста на Украина. Киев тврди дека овој град, која е важен железнички јазол во источните региони треба да го контролира украинската војска, бидејќи во моментот на потпишувањето на договорот тој беше под контрола на неговите сили, додека бунтовниците тврдат дека Дебалцево се наоѓа длабоко во територијата којашто ја контролираат тие, која според една од одредбите на договорот од Минск ќе добие специјален статус и поголема автономија.
Кремљ подоцна соопшти дека во телефонскиот конференциски разговор меѓу Путин, Порошенко и Меркел била разгледана реализацијата на договорените мерки од Минск, односно „почитувањето на прекинот на огнот, повлекувањето на тешкото оружје од страна на двете завојувани сили, и особено состојбата во областа на Дебалцево“, без да се навлегува во поединости за разговорите и позициите на тројцата челници.
Се додава само дека соговорниците размениле мислење за улогата на набљудувачите на ОБСЕ во тековната фаза од спроведувањето на договорот од Минск./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Два питбула убија 13-месечно дете, трагедија во Италија
Утрово, во Италија, во провинцијата Салерно, два питбула го нападнале тринаесетмесечното момче Франческо Пио Д’Амара и го убиле. Кучињата го нападнале во дворот на селската куќа. Мајка му и вујко му се обиделе да го спасат, но кучињата ги повредиле и нив. Според првите информации на полицијата, која на местото на несреќата пристигнала со возило на брзата помош, сопствениците на кучињата биле познајници на мајката. Кучињата биле пуштени на слобода во дворот на семејната куќа, а тие го нападнале детето бидејќи го гледале или како играчка или како закана.
Паола, мајката на детето, по несогласувањата со сопругот, се преселила во Камполонго, каде што изнајмила дел од селската куќа во која живеела сама со синот. Питбулите им припаѓале на сопствениците на куќата, кои живееле во друг дел од двокатната зграда, пишува „Салерно кориере“.
Според соседите, кучињата досега не покажале знаци на агресија. Градоначалникот на Еболи, Марио Конте, изјави дека администрацијата ќе ги сноси трошоците за погребот на детето. Во Италија не постои список на потенцијално опасни кучиња. Во 2006 година Министерството за здравство донесе правилник во кој беше вклучен список на раси што се сметаат за опасни, но оваа одредба подоцна беше укината.
Европа
Европа се загрева најбргу: објавен алармантен извештај
Заедничкиот извештај објавен од „Коперник“ (Службата за следење на климатските промени на ЕУ) и Светската метеоролошка организација (СМО) откри загрижувачки нови податоци. Имено, Европејците преку ден страдаат од невидена топлина, а навечер се под стрес поради непријатните горештини.
Европа е континентот што најбргу се загрева, предупредуваат експертите, затоплување со стапка далеку над глобалниот просек.
Стапката на смртност од топлина е зголемена 30 % во последните две децении во Европа. Економските загуби поврзани со временските услови и климата се проценуваат на 13,4 милијарди евра, според извештајот, како што објави „Гардијан“.
Според извештајот, температурите во Европа биле над просекот 11 месеци минатата година вклучувајќи го и најтоплиот септември од почетокот на евиденцијата. Поради жештините и сушата, имаше големи пожари, кои ги опустошија селата и ги задушија жителите на градовите.
Пожарите беа најинтензивни во јужноевропските земји, како Португалија, Шпанија и Италија. Грција беше погодена од најголемиот шумски пожар во ЕУ, изгореа 96.000 хектари шума, се вели во извештајот.
Од друга страна, обилните дождови предизвикаа смртоносни поплави. Во 2023 година Европа беше околу 7 % повлажна од просекот во последните три децении. „Минатата година Европа беше погодена од најголемиот шумски пожар. Во исто време бевме сведоци на една од највлажните години, силни морски топлотни бранови и разорни поплави“, изјави Карло Буонтемпо, директор на „Коперник“.
Континентот ја доживеа најтоплата година досега. Северозападна Европа го доживеа најтоплиот јуни досега, а поголемиот дел од Европа беше погоден од топлотни бранови за време на продолженото лето од јуни до септември.
На врвот на топлотниот бран во јули, 41 отсто од јужна Европа беше погодена од силен до екстремен топлотен стрес, што ги влошува постојните здравствени состојби и може да го зголеми ризикот од болести.
На Пиринејскиот Полуостров и во Источна Европа имаше суша. Бројот на денови со снежни врнежи беше под просекот, се вели во извештајот, а недостигот на зимски снег во комбинација со летните топлотни бранови значеше дека глечерите на Алпите исклучително се топат. Во последните две години алпските глечери изгубија околу 10 % од преостанатиот волумен.
Сè уште не е сосема јасно како глобалното затоплување предизвикува сè повеќе и повеќе обилни врнежи. Потоплиот воздух може да задржи повеќе влага, што овозможува поекстремни бури. Но, од друга страна, поради сложеноста на климатските промени, врнежите не мора секогаш да се случуваат. Постои многу посилна врска помеѓу глобалното затоплување и топлотните бранови.
Извештајот не дава податоци за минатата година за бројот на смртни случаи поврзани со топлина, но се знае дека имало 70.000 дополнителни смртни случаи поврзани со топлина во 2022 година. „Бројот на смртни случаи поврзани со топлина веројатно ќе биде поголем во 2023 година“, рече климатологот Фридерике Ото од Империјал колеџ во Лондон.
Европа
Напад во Русија, двајца полицајци загинаа, еден повреден
Двајца полицајци се убиени, а еден е ранет кога неидентификуван напаѓач нападнал руска полициска единица во градот Карачаивск во Карачаевско-Черкезија, во Северен Кавказ, соопшти регионалниот оддел на Истражниот комитет на Русија.
Како што се наведува, денеска, непознато лице со огнено оружје пукало неколкупати во полициски одред во градот Карачајевск, а потоа напаѓачот ги украл службеното оружје и муницијата на полицијата, пренесува „Интерфакс“.
Потрагата по напаѓачот е во тек.