Европа
Путин: Русија во 2015-та спречи 30 атентати, во Сирија уште не ја покажа сета моќ
Руските тајни служби спречиле 30 планирани терористички напади и откриле повеќе од 320 странски шпиони во текот на 2015 година изјави во саботата рускиот претседател Владимир Путин на средбата со безбедносните офицери во Кремљ, и истовремено истакна дека руските вооружени сили во операциите во Сирија ниту од далеку не ги искористиле сите свои можности.
„Сакам да истакнам дека оваа година благодарејќи на Федералната служба за безбедност (ФСБ), се спречени повеќе од 30 злосторства со терористички карактер“, изјави рускиот претседател Владимир Путин по повод празникот на припадниците на безбедносните служби.„Нашето контраразузнавање има голема одговорност. Годинава открија повеќе од 325 припадници на странските тајни служби. Гледаме дека тајните служби од голем број земји засилено работат во Русија“, рече Путин и самиот поранешен припадник на советската тајна служба КГБ и директор во ФСБ пред да дојде на власт во 1999 година.Шпионските афери во последниот период се зачестени во Русија, а повеќето од нив се поврзани со ситуацијата во Украина, каде што од април 2014 година трае судирот меѓу прозападните сили и силите на рускојазичното мнозинство на југоистокот од земјата.Во истото обраќање Путин порача дека руската армија е „далеку од тоа дека ги искористила сите свои капацитети во Сирија“, наведувајќи дека ќе „бидат употребени и дополнителни средства, доколку е потребно“.„Можеме да видиме колку ефикасно дејствуваат (во Сирија) нашите пилот, разузнавачи, колку ефикасно ги координираат меѓусебно своите напори, при што различните родови од армијата, морнарицата, воздухопловните сили, ги применуваат најсовремените оружја. Сакам да истакнам дека тоа е далеку од сите наши можности. Ние не го применуваме таму, сето она со што располагаме“, рече Путин.„Поседуваме и со дополнителни средства. Доколку биде потребно, и ќе ги искористиме“, додаде рускиот челник.„Ситуацијата во светот сложено се развива. Расте напнатоста во Блискиот исток, а и во многу други региони. Терористите отворено ѝ објавија војна на цивилизацијата, на целата меѓународната заедница. Нивните дејствија и планови претставуваат директна закана за нашата земја“, истакна Путин. Според него, во моментов руските вооружени сили се борат против таа закана на фронтовите во странство, уништувајќи ја нивната инфраструктура, кампови за обука, бази во Сирија.„Повторно ќе истакнам дека тие одлучни чекори треба да бидат поврзани и координирани со исто толкава жестина на сите нашите специјални служби. Станува збор за плановите на терористите, спречување обиди на терористичките и екстремните групи да ја интензивираат својата активност на територијата на Русија“, заклучи Путин./крај/мф/сн
Извор: РИА Новости
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Германија уапси две лица: соработувале со Русите, планирале да ја саботираат армијата
Две лица, кои, освен германско, имаат и руско државјанство, се уапсени во Германија поради наводно планирање саботирање воени објекти, вклучително и американски, со цел да ја поткопаат воената поддршка за Украина, соопшти денеска германското Обвинителство. Властите извршија претрес во домовите и работните места на двајцата осомничени, кои се обвинети дека работеле за странска тајна служба, се наведува во соопштението на Обвинителството.
Еден од осомничените, идентификуван како Дитер С., разговарал за можни заговори со лице поврзано со руската тајна служба од октомври 2023 година, се посочува во соопштението.
Дитер С. подготвувал бомбашки напади и палење во воени објекти, вклучително и оние со кои управуваат американските сили, се додава во соопштението.
Според магазинот „Шпигел“, еден од објектите е воената база „Графенвоер“, во јужната сојузна држава Баварија, каде што украинските војници се обучуваат да управуваат со американските тенкови „Абрамс“. Руската амбасада во Берлин не одговори веднаш на барањето за коментар.
„Намерата на акциите беше да се поткопа воената поддршка што Германија и ја дава на Украина против руската воена агресија“, се вели во соопштението на германските обвинители.
Европа
Фон Дер Лајен: На Европа не и се заканува војна, но треба да бидеме подготвени и да произведуваме оружје
Европа во моментов не се соочува со непосредна закана од војна, но мора да биде подготвена за тоа, изјави претседателката на Европската комисија, Урсула фон дер Лајен.
„Заканата од војна можеби не е непосредна, но не е невозможна. Треба да бидеме подготвени и тоа започнува со итната потреба за зајакнување и трансформирање на вооружените сили на членките на блокот“, рече Фон дер Лајен на Европскиот самит за одбрана и безбедност.
Според неа, ЕУ мора да произведе оружје од новата генерација за да „победи на бојното поле“.
„Европа треба да се стреми да развие и произведе нова генерација на оперативни способности за да победи во битките и да обезбеди доволно материјално количество и технолошка супериорност што можеби ќе и треба во иднина, а тоа значи турбо полнење на нашиот одбранбен индустриски капацитет во следните пет години,“ изјави Фон дер Лајен.
Европа
(Видео) Русите го гранатираа Чернихив, загинаа најмалку 13 лица, Зеленски бара дополнителна помош
Украинскиот претседател Володимир Зеленски ги повика западните партнери на потребната решителност и поддршка по рускиот ракетен напад врз северниот град Чернихив утринава, при што загинаа најмалку 13 лица.
„Ова немаше да дојде до ова доколку Украина добиеше доволно опрема за противвоздушна одбрана и ако беше доволна решеноста на светот да се спротивстави на рускиот тероризам“, објави Зеленски на „Телеграм“.
Министерот за внатрешни работи, Ихор Клименко, во изјава за „Телеграм“ рече дека во нападот загинале најмалку 13 лица, а повеќе од 60 се повредени и дека спасувачките операции се во тек.
Во нападот беа оштетени и четири катни згради, болница, образовна институција и десетици автомобили, додаде тој.
Русија изврши напад со три крстосувачки ракети „Искандер“, изјави регионалниот гувернер Вјачеслав Чаус во коментар за украинскиот јавен сервис „Суспилна“. Тој рече дека три проектили паднале во близина на центарот на градот и дека е оштетена цивилната инфраструктура.
Локалното население е повикано да дарува крв, изјави градоначалникот Олександр Ломако. Чернихив се наоѓа на речиси 150 километри северно од Киев, недалеку од границата со Русија. Кога руските сили ја нападнаа Украина во февруари 2022 година, Чернихив беше нападнат, но не беше преземен.