Европа
Русија доби согласност од Украина за доставувањето на помошта
Руското министерство за надворешни работи соопшти во вторникот дека конвојот со хуманитарна помош кој тргна од Русија кон источна Украина каде во побунетите рускојазични региони треба да биди предадено на цивилното населени, ќе ја мине границата во придружба на Црвениот крст, и дека за тоа добило нота од украинската дипломатија која изразила подготвеност да ја прифати руската хуманитарна помош.
Во разговор со новинарите, шефот на руската дипломатија Сергеј Лавров изјави дека руското министерство за надворешни работи до украинското испратило писмо со барање дозвола да започне транспортот на рускиот хуманитарен конвој.„Конвојот тргна. Добивме писмо со потврда за подготвеноста на украинската страна дека оваа помош ќе биде прифатена. Нотата пристигна денеска“, изјави Лавров. Потсети дека последните денови имало интензивна работа за да се усогласат деталите од хуманитарната операција. „Во соработка со Меѓународниот комитет на Црвениот крст, со украинското раководство, со претставници на други меѓународни организации, вклучително и Обединетите нации и Организацијата за безбедност и соработка во Европа, разработивме шема којашто во понеделникот конечно беше финализирана“, рече Лавров, пренесе Итар-Тасс.Според него, Русија притоа ги земала предвид без исклучок сите барања на украинската страна за сите аспекти на операцијата, вклучително и рутата по која ќе се движи конвојот а којашто ја предложиле властите во Киев, и покрај тоа што ќе треба да се направи многу големо заокружување од околу илјада километри, за што некои руски медиуми сметаат дека на хуманитарниот конвој ќе му бидат потребни неколку дена да стигне до одредиштата во Луганск и Донецк, каде локалното население како последица на воените дејствија и офанзива на украинската армија против проруските бунтовници повеќе од седмица е без електрична енергија, вода за пиење, а се веќе се потрошени и резервите од најосновните лекарства, храна и гориво. „Сепак, ние тргнавме по таа маршрута, кој е погоден за киевските власти. Се согласивме и на нашите транспорти да се појават украински ознаки за време на транспортот низ територијата на Украина“, додаде Лавров и дека е постигната согласност во камионите со помошта да има не само претставници на Црвениот крст и на ОБСЕ, туку и украински претставници. Според Лавров, Украина се откажала од идејата да се претовари целиот товар од рускиот хуманитарен конвој на украински камиони откако детално ќе биде проверен на границата. Како што беше претходно објавено, оваа иницијатива беше истакната од претставниците на украинските власти во текот на преговорите.„Тие го поставија прашањето на претовар на продуктите од сите 287 камиони во камиони коишто би требало да ги изнајми Црвениот крст, но од очигледно причини, од таа замисла на крајот се откажаа, бидејќи ќе ја усложнеше и ќе ја направеше многу скапа реализацијата на оваа хуманитарна акција“, рече шефот на руската дипломатија. Лавров соопшти и оти се надева дека Украина ќе ја гарантираат безбедноста на конвојот кога ќе минува по територијата што ја контролираа нејзините сили. „Цврсто веруваме во убедувањата што ни ги дадоа украинските власти дека ќе ја гарантираат безбедноста на движењето на целата колона по територијата што ја контролираат киевските сили“, рече.Лавров истакнал и дека бунтовниците, исто така, ќе обезбедат без пречки да минува низ областите кои тие ги контролираат. „Соодветен однос кон оваа хуманитарна акција очекуваме и од милициите (како што Москва ги означува ткн народни милиции на самоодбраната на русофоното население во источна Украина). Такви изјави добивме од таму. Убеден сум дека од нивна страна нема да има ниеден инцидент, имајќи предвид дека тие се наоѓаат на територијата чиишто жители имаат потреба од итна хуманитарна помош, истакна Лавров. /крај/мф/сн
Извор: Итар-Тасс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Повеќе од сто килограми кокаин пронајдени меѓу банани во супермаркети во Германија
Вработени во неколку германски супермаркети во Берлин и Бранденбург откриле повеќе од 100 килограми кокаин во пакувања со банани, пренесува „Билд“ повикувајќи се на полициски извори.
Во Бранденбург, како што се наведува, во најмалку четири продавници биле пронајдени меѓу 20 и 100 килограми кокаин, пренесува „Танјуг“.
Полицијата во моментот спроведува истрага со проверка на стоката во продавниците поради што сѐ уште не се знае конечната количина дрога во нив, но не и информацијата во колку продавници има.
Европа
Шпанскиот премиер размислува да се повлече од функцијата, отворена истрага против неговата сопруга
Шпанскиот премиер Педро Санчез денеска објави дека се повлекува од јавните должности затоа што мора „да застане и да размисли“ дали ќе продолжи да биде шеф на владата откако судот во Мадрид отвори прелиминарна истрага против неговата сопруга за корупција и трговско влијание.
„Итно ми треба одговор на прашањето дали вреди, дали да продолжам да ја водам владата или да се откажам од оваа чест“, објави тој преку социјалната мрежа „Икс“.
Синдикатот Манос Лимпијас (Чисти раце) ја пријавил неговата сопруга Бегона Гомез дека им помагала на претприемачите на јавни тендери и го искористила тоа. Судот претходно денеска соопшти дека отворил истрага, без да даде детали.
Министрите од левичарската влада на Санчез оценија дека се работи за лажен извештај и дека синдикатот што го доставил е близок до екстремната десница.
Европа
Суспендиран рускиот свештеник кој одржа јавна молитва за Навални
Рускиот православен свештеник, кој во март отслужи служба за мртвите за починатиот руски опозициски лидер Алексеј Навални, е суспендиран од свештеничките должности на три години, соопшти Московската епархија на Руската православна црква.
Во соопштението објавено вчера на официјалната веб-страница на епархијата, не се наведува зошто е казнет свештеникот Дмитриј Сафронов. Нему му е забрането да дава благослов, да ја носи облеката и крстот на црковниот свештеник до 2027 година.
Сафронов треба да биде префрлен и во друга црква во Москва за да ги извршува должностите на читател на псалми. По завршувањето на периодот на покајание, врз основа на повратни информации од местото на послушанието, ќе се донесе одлука за можноста за негова понатамошна свештеничка служба“, се вели во соопштението на епархијата.
Сафронов одржа комеморација на 26 март, на која присуствуваа илјадници луѓе кои дојдоа да се простат од Навални, најжестокиот критичар на претседателот Владимир Путин во Русија.
Навални почина во февруари на 47-годишна возраст во казнена колонија на Арктикот.