Европа
Русија ја укинува зоната за слободна трговија со Украина, Киев ќе го сопре снабдувањето на Крим
Русија ја укинува зоната за слободна трговија со Украина од 1-ви јануари, на денот кога стапува на сила договорот за слободна трговија меѓу Киев и Европската унија, се наведува во указот кој во средата го потпиша претседателот Владимир Путин, а претходно украинскиот премиер Арсениј Јаценјук објави дека Украина ќе ја запре трговијата со Крим за 30 дена истакнувајќи дека снабдувањето на црноморскиот полуостров со електрична енергија ќе биде засебно прашање.
Одлуката на Москва за укинување на зоната на слободна трговија со Киев е донесена поради „околностите кои им штетат на интересите и на економската безбедност на Руската Федерација“, се наведува во указот кој го потпишал рускиот претседател Владимир Путин.
Конкретно, со документот се укинува примената на договорот потпишан на 18-ти октомври 2011 година во Санкт Петербург со кој се создаден специјален трговски режим меѓу земјите членки на Заедницата на независни држави (ЗНД), односно сите држави од поранешниот Советски сојуз освен балтичките земји и Грузија.
Москва постојано повторува дека поради договорот за слободна трговија меѓу Украина и Европската унија рускиот пазар би можел да биде преплавен со нецаринети европски производи и оти затоа е принудена да преземе мерки за трговска заштита.
Покрај тоа, Русија се закани дека против Украина од 1-ви јануари ќе го примени ембаргото коешто пред повеќе од една година го воведе за производите од ЕУ, како одговор на нејзините економски санкции против Москва во врска со украинската криза.
Москва најави дека таа возвратна мерка ќе ја преземе, само доколку не успее да се договори со Брисел и Киев за примена на договорот меѓу Украина и ЕУ.
Новите преговори се предвидени за понеделник во Брисел. Страните, меѓутоа, оценуваат дека се мали изгледите за постигнување договор до крајот на годината, бидејќи претходните договори не дадоа резултат. Според украинските медиуми, Киев предлага преоден период од две до три години, а Москва бара десет.
Крим, кој со референдумот на тамошното мнозинско руско и рускојазично население по соборувањето на поранешниот украински претседател Виктор Јанукович преку референдум си ја поврати автономијата и изгласа присоединување кон Руската Федерација што Киев и Западот го сметаат за нелегално руско анектирање на украинска територија, речиси целосно остана без електрична енергија, откако со подметнати експлозии беа оштетени четири далноводи кои го снабдуваат со струја.
Русија за возврат го забрани извозот на јаглен во Украина, а Киев одговори дека ќе ги спречи пратките со јаглен за Крим.
„Во согласност со владината одлука која ќе стапи на сила за 30 дена, испораките на стоки и работна сила на Крим се забранети. Што се однесува до електричната енергија, снабдувањето може да биде единствено врз база на одлуката на Советот за безбедност и одбран“ на Украина, изјави во средата украинскиот премиер Арсениј Јаценјук./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Нова корупциска афера во Украина, осомничен министер за земјоделство
Украинската антикорупциска полиција го именуваше министерот за земјоделство Микола Солски како осомничен во кривичната истрага за незаконско стекнување на државно земјиште во вредност од седум милиони долари.
Солски, кој го надгледува производството на жито во Украина за време на војната од март 2022 година, рече дека не разбира зошто сега се појавија наводите поврзани со настаните од 2017 и 2018 година.
„Не се согласувам со обвинувањата“, им рече тој на новинарите во Киев откако Украинското национално биро за борба против корупцијата објави соопштение со резултатите од истрагата.
Канцеларијата соопшти дека министерот го предводел планот за стекнување на државно земјиште во вредност од околу 6,9 милиони евра и обид да се стекне земјиште во вредност од 190 милиони гривни.
Солски е првиот министер во владата на претседателот Володимир Зеленски кој е осомничен во корупциски скандал.
Зеленски се обидува да спроведе стапка на нулта толеранција за корупција, а минатата година го отпушти министерот за одбрана поради обвинувања за примање мито поврзани со одбранбената индустрија.
Законодавците изминативе денови порачаа дека очекуваат реконструкција на Владата, секако до крајот на пролетта.
Европа
Русија: Ќе ги таргетираме украинските магацини во кои се доставува западното оружје
Русија ќе ги интензивира нападите врз украинските бази за складирање во кои е сместено оружјето доставено од Запад, изјави денеска министерот за одбрана, Сергеј Шојгу, а Соединетите Држави се подготвуваат да одобрат и достават долго одложувана нова воена помош.
Шојгу рече дека Русија „го отфрли митот за супериорноста на западното оружје“ и дека нејзините сили презеле иницијатива на фронтот долг 1.000 километри.
Тој алудира на фактот дека в сабота, по гласањето во Претставничкиот дом, Вашингтон е подготвен да достави нов пакет воена помош за Украина, вреден речиси 61 милијарда долари.
Украинскиот претседател Володимир Зеленски изјави дека Киев набргу ќе добие повеќе ракетни системи со долг дострел ATACMS како дел од ветениот пакет. Американските власти рекоа дека помошта ќе вклучува испорака на муниција и пресретнувачи за системи за противвоздушна одбрана за Украина.
„Со оглед на заканите од САД и нивните сојузници, ние мора да продолжиме да ги подобруваме составот и структурата на вооружените сили и да го зголемиме производството на најпопуларното оружје и воена опрема“, рече Шојгу додавајќи дека руските сили „ќе го зголемат интензитетот на нападите врз логистичките центри и базите за складирање на западното оружје“.
Рускиот министер за одбрана повтори дека Русија овој месец ги освоила селата Первомајске, Бохданивка и Новомихајливка.
Во понеделникот украинскиот командант го негира падот на Новомихајливка велејќи дека неговите војници сè уште држат 15- 20 отсто од селото.
Руското Министерство за одбрана објави дека руските маринци, кои учествувале во заземањето на Новомихајливка, заробиле оружје од западно производство, вклучувајќи шведски фрлачи на гранати, американски противоклопни системи Javelin и системи за електронско војување на НАТО.
Европа
Првиот разузнавач на Германија: Русите се подготвени и за саботажа
Кинезите се активни во Германија во собирање информации за воената технологија, изјави за „Дојче веле“, Томас Халденванг, претседател на Сојузната канцеларија за заштита на Уставот, домашната разузнавачка служба на Германија.
Халденванг зборуваше за апсењето тројца германски државјани поради сомнение дека на Кинезите им откриле информации за нови технологии, кои може да се користат за воени цели.
„Ова е случај од особено значење. Се занимаваме со проширување на активностите, се работи за знаење за производство на оружје“, додаде тој.
Халденванг разговараше за „Дојче веле“ пред новото апсење во врска со наводното кинеско шпионирање. Во вторникот вечерта, помошник на европскиот претставник на Алтернатива за Германија (AfD) беше уапсен во Дрезден за давање информации на Кинезите.
Тоа беше само продолжение на шпионските игри во последно време. Претходно, двајца руско-германски државјани беа уапсени во Баварија под сомнение дека снимиле американски воени бази во Германија и подготвувале напад.
„Со години забележуваме дека Русија има развиено големи активности овде во Германија“, вели Халденванг. „Уште пред војната во Украина реков дека заканата е слична на онаа од времето на Студената војна“.
„Се разбира, сè беше интензивирано со рускиот напад врз Украина и мораме да разбереме дека Русија се занимава со шпионажа, сајбер-шпионажа, операции за влијание, дезинформации“, продолжи првиот човек на германската разузнавачка служба.
Според него, Германија е особено нападната како важен играч во воената и политичката поддршка за Украина. Украинските војници се обучуваат и во Германија.
Халденванг рече дека во екстремен случај рускиот репертоар вклучува саботажа. „Може да се смета дека витален интерес на Москва е да ја спречи или попречи испораката на оружје за Украина. А земја што е подготвена да води војна со најбрутални средства сигурно нема да се оддалечи од саботажа. Така и ние во Германија мораме да бидеме подготвени за тоа сценарио“.
Како што наведе, германските служби се во состојба на готовност и веќе на почетокот на војната во Украина прогласиле „голем број руски агенти“ за непожелни, што ги „ослабнало можностите на руските служби во Германија“.
Како што додаде Томас Халденванг за „Дојче вече“, исламистички групи и поединци се на радарот на службата поради можни терористички напади. Особено што летово претстојат два големи спортски настана: Европското фудбалско првенство во Германија и Олимписките игри во Париз.
„И на тоа поле нивото на закана е високо. Во моментот, иако не се познати конкретни планови за напад, апстрактната опасност е исклучително висока“, додаде тој.
Тој изјави дека особено Исламската држава Корасан, активна во Авганистан и Пакистан, се залага за голем, спектакуларен напад.
„Можеме да замислиме разни сценарија. Едно многу опасно е, на пример, тимови на напаѓачи да доаѓаат во Германија, можеби некои веќе дошле, а потоа да извршат напад како група“, рече Халденванг.
Други сценарија вклучуваат радикализација на поединци, додаде тој. Како една од новите причини за радикализација тој ги наведе ситуацијата во Појасот Газа и пропагандата на исламистичките групи, кои поттикнуваат поединци да вршат напади.