Европа
Сестрата на лондонски џихадист најде сличност во гласовите на братот и лицето од видеото на IS
Сестрата на лондонскиот исламист Абу Румајзи, роден како Сидарта Дар, смета дека има одредена сличност во гласот на нејзиниот брат и маскираниот маж кој говори во последното пропагандно видео на екстремната сунитска организација Исламска држава (IS), на кое е прикажана егзекуцијата на пет лица обвинети дека „шпионирале за Велика Британија“, што британскиот премиер Дејвид Камерон го нарече „очајнички потег“.
„Мислам дека гласот звучи помалку како неговиот. Но тоа може да биде и некој друг, а тој (братот) може да го синхронизирал гласот од кадарот“, изјави за британските медиуми во понеделникот Коника Дар, која живее во северниот дел од Лондон. Сепак, таа вели дека маскираниот маж на снимката најверојатно не е нејзиниот брат, споредувајќи ги очите и веѓите, како и градбата на лицето од видеото.
„Но доколку, не дај Боже, тоа е тој, тогаш јас лично ќе го убијам“, додава Коника, признавајќи дека веќе повеќе од година нема никакви вести со братот кој потпаднал под влијание на исламистичката идеологија и воопшто не знае каде сега се наоѓа тој.
Исламска државата објави во неделата видео со егзекуција на пет луѓе кои ги обвинува дека се „британски шпиони“, како „предупредување“ до премиерот Дејвид Камерон. На видео снимката се прикажани петте мажи облечени во портокалови комбинезони, кои џихадистите ги обвинуваат дека се шпиони на разузнавачките служби на Велика Британија. Според Исламската држава работеле организирано и испраќале „во странство“ фото и видео материјали од сирискиот град Рака, која се смета за престолнина на нејзиниот „калифат“. Пред извршувањето на егзекуцијата, еден од маскираните милитанти вели дека видеото е „порака за Дејвид Камерон“ вели маскираниот со британски акцент и британскиот премиер го нарекува „идиот“ и „роб на Белата куќа“.
Видеото кое од џихадистичките страници го пренесе американскиот ресурс за следење на исламистичките страници SITE, започнува со признанието на петте мажи од Рака, самопрогласената престолнина на калифатот на Исламската држава во Сирија, дека се шпиони. Притоа истиот маскиран џихадист вели дека нив ги „напуштила британската влада“.
„Тоа е очајнички потег на организацијата која ги изведува најужасните активности, кои се достојни за најголем презир“, изјави британскиот премиер Дејвид Камерон во понеделникот и додаде дека „тоа е организација којашто губи на теренот“.
„Тие не нé мрзат поради тоа што го правиме, туку поради тоа кои сме и што сме, бидејќи сме успешна, толерантна, демократска, мултиетничка и мултиконфесионална нација. Нашите вредности се многу посилни од нивните. Можеби ќе потрае, меѓутоа ќе бидат поразени“, порача Камерон.
Но на истото видео е снимено и дете на околу петгодишна возраст, коешто исто така зборува со британски акцент, облечено во камуфлажна униформа на Исламската држава и со лента на главата иста каква што носат возрасните припадници на оваа терористичка група, забележува во извештајот SITE.
Џихадистот кој учествува во егзекуцијата и ги упатува навредите на адреса на британскиот премиер Камерон, британските медиуми веќе го нарекоа „новиот Џихади Џон“, според 27-годишниот британски државјанин Мухамед Емвази, кој обезглавува западни заложници на претходни пропагандни видеа на Исламската држава. Во ноември минатата година Емвази бил ликвидиран во прецизен воздушен удар на американско беспилотно летало за време на заедничка операција на Лондон и Вашингтон.
Британските разузнавачки агенции сега работат на утврдување на идентитетот на маскираното лице од последното џихдистичко видео, како и да го лоцираат. /крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Шпанскиот премиер размислува да се повлече од функцијата, отворена истрага против неговата сопруга
Шпанскиот премиер Педро Санчез денеска објави дека се повлекува од јавните должности затоа што мора „да застане и да размисли“ дали ќе продолжи да биде шеф на владата откако судот во Мадрид отвори прелиминарна истрага против неговата сопруга за корупција и трговско влијание.
„Итно ми треба одговор на прашањето дали вреди, дали да продолжам да ја водам владата или да се откажам од оваа чест“, објави тој преку социјалната мрежа „Икс“.
Синдикатот Манос Лимпијас (Чисти раце) ја пријавил неговата сопруга Бегона Гомез дека им помагала на претприемачите на јавни тендери и го искористила тоа. Судот претходно денеска соопшти дека отворил истрага, без да даде детали.
Министрите од левичарската влада на Санчез оценија дека се работи за лажен извештај и дека синдикатот што го доставил е близок до екстремната десница.
Европа
Суспендиран рускиот свештеник кој одржа јавна молитва за Навални
Рускиот православен свештеник, кој во март отслужи служба за мртвите за починатиот руски опозициски лидер Алексеј Навални, е суспендиран од свештеничките должности на три години, соопшти Московската епархија на Руската православна црква.
Во соопштението објавено вчера на официјалната веб-страница на епархијата, не се наведува зошто е казнет свештеникот Дмитриј Сафронов. Нему му е забрането да дава благослов, да ја носи облеката и крстот на црковниот свештеник до 2027 година.
Сафронов треба да биде префрлен и во друга црква во Москва за да ги извршува должностите на читател на псалми. По завршувањето на периодот на покајание, врз основа на повратни информации од местото на послушанието, ќе се донесе одлука за можноста за негова понатамошна свештеничка служба“, се вели во соопштението на епархијата.
Сафронов одржа комеморација на 26 март, на која присуствуваа илјадници луѓе кои дојдоа да се простат од Навални, најжестокиот критичар на претседателот Владимир Путин во Русија.
Навални почина во февруари на 47-годишна возраст во казнена колонија на Арктикот.
Европа
Судот во Русија ја одби жалбата на американскиот новинар кој е во затвор поради шпионажа
Руски суд денеска ја отфрли последната од серијата жалби на новинарот на „Волстрит журнал“, Еван Гершкович, против истражниот затвор под обвинение за шпионажа.
Гершкович (32) е првиот американски новинар уапсен во Русија под обвинение за шпионажа по Студената војна. На 29 март минатата година тој беше приведен од Федералната служба за безбедност (ФСБ), а беше уапсен на задача во рускиот град Екатеринбург.
Руските власти тврдат дека тој се обидувал да дојде до доверливи информации кои требало да и ги пренесе на американската влада, но новинарот, весникот за кој работи и американската влада негираат дека тој е шпион.
Датумот на судењето се уште не е одреден, а притворот минатиот месец му беше продолжен за уште три месеци и треба да трае до 30 јуни.
Минатомесечното рочиште беше затворено за печатот, но во вторникот на новинарите им беше дозволено да го снимат Гершкович додека тој стои во стаклената кутија во судницата и им се насмевнува на колегите од медиумите.
Рускиот претседател Владимир Путин изјави дека во одреден момент Гершкович би можел да биде ослободен во замена за рускиот затвореник кој се држи во странство, но таков договор се уште не е постигнат.