Европа
Шкотска може да наложи вето на Brexit
Шкотската премиерка Никола Старџен изјави во неделата за BBC дека шкотскиот парламент би можел да го блокира излегувањето на Велика Британија од Европската унија.
Додека на референдумот во четвртокот Велика Британија со заокружени 52 отсто наспроти 48 проценти одлучи да ја напушти Европската унија, во Шкотска, обратно, за останувањето гласале 62 отсто, додека 38 отсто биле за излегувањето од 28-челниот европски блок.
Премиерката и челничка на Шкотската национална партија (SNP) изјави дека од пратениците во шкотскиот национален парламент ќе бара да одбијат да ја дадат својата „законодавна согласност“.
Старџен, чијашто партија има 63 од 129-те места во шкотскиот парламент, на прашањето за идните чекори на шкотскиот законодавен дом рече дека е многу веројатно дека излегувањето на Велика Британија од Европската унија ќе бара гласање за согласност на коешто таа од пратениците „секако“ ќе бара да гласаат против.
Доколку шкотскиот парламент за тоа ќе расудува врз основа на она што е најдоброто за Шкотска, тогаш таа опција мора да биде ставена на масата, смета Старџен, која претходно во неделата изјави дека со своите колеги следната седмица ќе ги започне разговорите со Брисел за останувањето на Шкотска во Европската унија.
Старџен додаде дека сега треба да се следи како ќе се развива ситуацијата и до што ќе доведат преговорите меѓу Шкотска со британските власти, на Британија со Брисел и на Шкотска со Брисел.
Ден по објавувањето на официјалните резултати од британскиот референдум шкотската премиерка тврдеше дека во план е и референдум за шкотската независност. Шкотскиот референдум за независност во 2014 година против кој кампања водеше токму Лондон, заврши со контроверзно изгласување на останувањето во Обединетото Кралство со 55,3 отсто гласови./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Фон Дер Лајен: На Европа не и се заканува војна, но треба да бидеме подготвени и да произведуваме оружје
Европа во моментов не се соочува со непосредна закана од војна, но мора да биде подготвена за тоа, изјави претседателката на Европската комисија, Урсула фон дер Лајен.
„Заканата од војна можеби не е непосредна, но не е невозможна. Треба да бидеме подготвени и тоа започнува со итната потреба за зајакнување и трансформирање на вооружените сили на членките на блокот“, рече Фон дер Лајен на Европскиот самит за одбрана и безбедност.
Според неа, ЕУ мора да произведе оружје од новата генерација за да „победи на бојното поле“.
„Европа треба да се стреми да развие и произведе нова генерација на оперативни способности за да победи во битките и да обезбеди доволно материјално количество и технолошка супериорност што можеби ќе и треба во иднина, а тоа значи турбо полнење на нашиот одбранбен индустриски капацитет во следните пет години,“ изјави Фон дер Лајен.
Европа
(Видео) Русите го гранатираа Чернихив, загинаа најмалку 13 лица, Зеленски бара дополнителна помош
Украинскиот претседател Володимир Зеленски ги повика западните партнери на потребната решителност и поддршка по рускиот ракетен напад врз северниот град Чернихив утринава, при што загинаа најмалку 13 лица.
„Ова немаше да дојде до ова доколку Украина добиеше доволно опрема за противвоздушна одбрана и ако беше доволна решеноста на светот да се спротивстави на рускиот тероризам“, објави Зеленски на „Телеграм“.
Министерот за внатрешни работи, Ихор Клименко, во изјава за „Телеграм“ рече дека во нападот загинале најмалку 13 лица, а повеќе од 60 се повредени и дека спасувачките операции се во тек.
Во нападот беа оштетени и четири катни згради, болница, образовна институција и десетици автомобили, додаде тој.
Русија изврши напад со три крстосувачки ракети „Искандер“, изјави регионалниот гувернер Вјачеслав Чаус во коментар за украинскиот јавен сервис „Суспилна“. Тој рече дека три проектили паднале во близина на центарот на градот и дека е оштетена цивилната инфраструктура.
Локалното население е повикано да дарува крв, изјави градоначалникот Олександр Ломако. Чернихив се наоѓа на речиси 150 километри северно од Киев, недалеку од границата со Русија. Кога руските сили ја нападнаа Украина во февруари 2022 година, Чернихив беше нападнат, но не беше преземен.
Европа
Во Германија уапсени 10 лица: за пари набавувале дозволи за престој на странци
Во Германија денеска во полициска акција се уапсени десет лица осомничени дека за големи суми пари набавувале дозволи за престој во Германија за странци од Кина и арапските земји.
„Главни осомничени се двајца адвокати од Келн, а истрагата се води против 38 можни члена на шверцерската банда и против 147 други лица, кои се занимавале со систематски шверц на луѓе“, се вели во соопштението на полициската управа на град веднаш до Келн, кои ја водат операцијата.
Осомничените се обвинети дека донеле странски државјани во Германија и ги набавиле потребните документи за големи суми пари, од 30 до 350 илјади евра. Осомничените основале фиктивни фирми и лажни адреси со кои се регистрирале лица од странство.
Весникот „Билд“ пишува дека меѓу осомничените има и вработени во неколку канцеларии за странци во регионот Рајнланд-Пфалц, кои издавале дозволи за престој за пари. Еден од нив е меѓу уапсените. Како што е соопштено, за време на рацијата била запленета и голема количина пари. Минатата година, со 300.000 бегалци и баратели на азил, Германија забележа значителен пораст на илегалниот влез во земјата.