Европа
Шкотска останува дел од Обединетото Кралство
Шкотска останува дел од Обединетото Кралство, одлучија избирачите на референдум што се одржа в четврток.
Над 55 проценти од избирачите гласале против иницијативата Шкотска да добие независност по 307 години.
Резултатите од референдумот покажаа дека поддршката за унијата е поголема од очекуваната врз основа на анкетите направени пред самото гласање и во текот на гласањето. Излезноста на референдумот беше 87 проценти, што е најголема излезност во демократскиот свет откако по Првата светска војна е воведено општото право на глас.
Од 32 окрузи, за независност на Шкотска најмногу граѓани се изјасниле во најголемиот шкотски град Глазгов, во два окрузи во негова околина и Данди, град кој се смета за најголемо упориште на поддржувачите на независност.
Унијата голема поддршка имала во главниот град Единбург, центарот за нафтена индустрија Абердин, во окрузите на англиската граница и на Шетландските и Оркниските острови.
Шкотскиот премиер Алекс Салмонд по објавување на резултатите изјавил дека ја прифаќа одлуката на народот „во овој момент Шкотска да не биде независна држава“, но и дека „повеќе нема враќање на старото“.
„Нашиот рефернедум беше дел од процесот до кој дојдовме со договор и согласност од сите страни. Ја повикувам цела Шкотска да ја прифати демократската волја на народот. Излезноста од 87 проценти е една од најголемите во демократскиот свет…Ова е кампања која ги инспирираше луѓето, сите бевме дел од неа. Кампањата ги допре сите делови на општеството до кои политиката никогаш не допрела. Нема да има враќање на тоа што беше пред ова. Вестминистер почувствува страв, затоа што почувствува масовно движење против себе“, рекол Салмонд.
Британскиот премиер Дејвид Камерон рекол дека е време Британците заедно да тргнат напред, дека резултатите се јасни и дека нема простор за расправа.
„Прашањето за независност е решено барем за една генерација, а можеби, како што вели Алекс Салмонд, засекогаш. Беше во ред тоа што ја почитувавме желбата на народот на Шкотска да се изјасни. Сега нема место за двоумење и расправа. Нема место за повторување“, рекол Камерон.крај/мф/сд
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Фон Дер Лајен: На Европа не и се заканува војна, но треба да бидеме подготвени и да произведуваме оружје
Европа во моментов не се соочува со непосредна закана од војна, но мора да биде подготвена за тоа, изјави претседателката на Европската комисија, Урсула фон дер Лајен.
„Заканата од војна можеби не е непосредна, но не е невозможна. Треба да бидеме подготвени и тоа започнува со итната потреба за зајакнување и трансформирање на вооружените сили на членките на блокот“, рече Фон дер Лајен на Европскиот самит за одбрана и безбедност.
Според неа, ЕУ мора да произведе оружје од новата генерација за да „победи на бојното поле“.
„Европа треба да се стреми да развие и произведе нова генерација на оперативни способности за да победи во битките и да обезбеди доволно материјално количество и технолошка супериорност што можеби ќе и треба во иднина, а тоа значи турбо полнење на нашиот одбранбен индустриски капацитет во следните пет години,“ изјави Фон дер Лајен.
Европа
(Видео) Русите го гранатираа Чернихив, загинаа најмалку 13 лица, Зеленски бара дополнителна помош
Украинскиот претседател Володимир Зеленски ги повика западните партнери на потребната решителност и поддршка по рускиот ракетен напад врз северниот град Чернихив утринава, при што загинаа најмалку 13 лица.
„Ова немаше да дојде до ова доколку Украина добиеше доволно опрема за противвоздушна одбрана и ако беше доволна решеноста на светот да се спротивстави на рускиот тероризам“, објави Зеленски на „Телеграм“.
Министерот за внатрешни работи, Ихор Клименко, во изјава за „Телеграм“ рече дека во нападот загинале најмалку 13 лица, а повеќе од 60 се повредени и дека спасувачките операции се во тек.
Во нападот беа оштетени и четири катни згради, болница, образовна институција и десетици автомобили, додаде тој.
Русија изврши напад со три крстосувачки ракети „Искандер“, изјави регионалниот гувернер Вјачеслав Чаус во коментар за украинскиот јавен сервис „Суспилна“. Тој рече дека три проектили паднале во близина на центарот на градот и дека е оштетена цивилната инфраструктура.
Локалното население е повикано да дарува крв, изјави градоначалникот Олександр Ломако. Чернихив се наоѓа на речиси 150 километри северно од Киев, недалеку од границата со Русија. Кога руските сили ја нападнаа Украина во февруари 2022 година, Чернихив беше нападнат, но не беше преземен.
Европа
Во Германија уапсени 10 лица: за пари набавувале дозволи за престој на странци
Во Германија денеска во полициска акција се уапсени десет лица осомничени дека за големи суми пари набавувале дозволи за престој во Германија за странци од Кина и арапските земји.
„Главни осомничени се двајца адвокати од Келн, а истрагата се води против 38 можни члена на шверцерската банда и против 147 други лица, кои се занимавале со систематски шверц на луѓе“, се вели во соопштението на полициската управа на град веднаш до Келн, кои ја водат операцијата.
Осомничените се обвинети дека донеле странски државјани во Германија и ги набавиле потребните документи за големи суми пари, од 30 до 350 илјади евра. Осомничените основале фиктивни фирми и лажни адреси со кои се регистрирале лица од странство.
Весникот „Билд“ пишува дека меѓу осомничените има и вработени во неколку канцеларии за странци во регионот Рајнланд-Пфалц, кои издавале дозволи за престој за пари. Еден од нив е меѓу уапсените. Како што е соопштено, за време на рацијата била запленета и голема количина пари. Минатата година, со 300.000 бегалци и баратели на азил, Германија забележа значителен пораст на илегалниот влез во земјата.