Европа
Следниот круг преговори за Украина на 30-ти јануари во Минск
Новиот круг од преговорите за прекин на огнот во југоисточна Украина ќе се одржи во петок во Белорусија, откако украинскиот претседател Петро Порошенко ги повика рускојазичните бунтовници на разговори, а Русија предупреди на можна катастрофа доколку САД и Европа не престанат да ја поддржуваат „страната која сака војна“.
Белоруското министерство за надворешни работи објави дека следниот круг од преговорите меѓу киевските власти и претставниците на одметнатите самопрогласени ткн Народни републики во Донецк и во Луганск, со посредство на претставници на ткн Контактна група од Украина, Русија и Организацијата за безбедност и соработка во Европа (ОБСЕ), во Минск на 30-ти јануари, пренесе агенцијата ТАСС.
„Контактната група го извести белоруското министерство за надворешни работи дека утре, петок 30-ти јануари, планира да одржи нов круг од преговорите“, изјавил портпаролот на белоруската дипломатија, Дмитриј Мирончик.
Како што пренесува агенцијата AFP, украинскиот претседател Петро Порошенко ја повикал Контактната група којашто ја сочинуваат поранешниот украински претседател Леонид Кучма, рускиот амбасадор во Минск Михаил Зурабов и актуелната претставничка на ОБСЕ амбасадорката, Хајди Талјавини, да организира „итни консултации (со бунтовниците) за прекин на огнот“, соопштија од неговиот кабинет по состанокот на шефот на украинската држава и Контактната група.
Претставникот на самопрогласената Народна Република Донецк, Андреј Пургин за AFP изјавил дека нивен претставник ќе учествува на средбата во Минск, доколку таа се оствари. „Доколку средбата во Минск се одржи, ние ќе учествуваме на неа, секако. Но не би избрзувал, бидејќи во минатото разговорите беа откажувани неколкупати“, додал Пургин кој на минатогодишниот референдум во Донецк беше изгласан за претседател на парламентот, и додал дека „Народната република“ ќе ја претставува неговиот пратеник Денис Пушилин, а не претседателот на „републиката“ Александр Захарченко.
Челникот на другата самопрогласена Народна република во Луганск, Игор Плотницки навестил дека овој рускојазичен регион ќе го претставува Владислав Дајнего. „Доколку бидат потпишани некои документи, Александр Захарченко и јас, исто така, ќе заминеме“, изјавил за агенцијата РИА Новости.
Во меѓувреме агенцијата Интерфакс го пренесе предупредувањето на постојаниот руски претставник во ОБСЕ, Андреј Келин, упатено до САД Европа. „Апелирам на државите кои имаат влијание врз челниците во Киев, во прв ред САД. Време е да престанете да и’ одите на рака на страната којашто сака војна. Тоа може да резултира само со голема војна“, порачал рускиот дипломат.
Последниот круг од преговорите во Минск на 24-ти декември заврши со неуспех. Потоа ситуацијата во источните региони на Украина ескалираше, во судирите меѓу украинската армија и проруските бунтовници, во кој досега од април минатата година според податоците на Обединетите нации загинале над 5.000 луѓе. Само во последните 24 часови се пријавени 11 жртви, пет украински војници, а бунтовниците известија за шест загинати цивили, додека бројот на ранетите е 40 луѓе од кои десетина цивили./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
(Аудио) Кралот Чарлс ја испрати првата јавна порака по дијагнозата на здравјето на Кејт
Порака од кралот Чарлс беше емитувана денеска по повод годишната служба на Величетврток.
Аудиообраќањето на Чарлс беше емитувано на собранието во катедралата „Ворчестер“ во негово отсуство поради тековното лекување на ракот на монархот.
Тој им порача на сите „да ја подадат раката на пријателството“.
„Актот на богослужба, овде во катедралата ‘Ворчестер’, ме потсетува на заклетвата што ја дадов на почетокот на моето крунисување да го следам примерот на Христос ‘да не ми служат, туку да служам’“, рече кралот.
„Тоа е она што секогаш се трудев да го правам и правам со целото мое срце“, додаде тој.
Кралот дојде на тронот пред 18 месеци, а на почетокот на годината му беше дијагностициран рак поради што беше подложен на хемотерапија.
Европа
Заменик-началникот на генералштабот: Британија може да се бори со Русија само 2 месеца
Британските вооружени сили мора да управуваат со оперативниот ризик, што произлегува од недостигот на ресурси што би сакале да ги имаат во идните војни, пишува „Телеграф“.
Информациите се појавија откако Грант Шапс, министерот за одбрана, им рече на пратениците дека лобирал кај премиерот, Риши Сунак, и министерот за економија и финансии, Џереми Хант, повеќе пари во буџетот да се потрошат за одбраната, но не успеал да обезбеди зголемување.
За време на сослушувањето пред пратениците во Комитетот за одбрана на долниот дом, висок офицер на кралските маринци рече: „Ние бевме многу јасни дека сумата што моментно ја трошиме за муниција не ги покрива трошоците во сите области и заканите со кои се соочуваме“.
„Бевме јасни дека треба да потрошиме повеќе пари над буџетот, на она што го нарекуваме интегрирани противвоздушни ракети“.
На прашањето на Марк Франсоа, поранешен министер за вооружени сили, дали е вистина оти Обединетото Кралство „не може да се бори со Владимир Путин повеќе од неколку месеци во целосна воена ситуација поради недостиог на резерви муниција и опрема, Шапс додаде дека секој таков конфликт ќе се води заедно со сојузниците од НАТО, кои заедно би можеле да ја совладаат Русија, наместо само Велика Британија.
„За луѓето што гледаат и слушаат дека Велика Британија не е подготвена за војна исклучиво со Русија, важно е да разберат дека сме во НАТО и постои меѓусојузнички одбранбен договор Член 5, така што никогаш не би биле во таква ситуација“.
Во еден извештај пратениците рекоа дека на вооружените сили им требаат повеќе средства за „учество во операции додека развиваат воена готовност“ или ќе мора да го намалат „оперативниот товар“ на војската.
Поранешните воени началници на комитетот му кажаа дека вооружените сили се ослабени од 2010 година и дека „во конфликт со еднаков противник тие ќе бидат исцрпени по првите неколку месеци од распоредувањето“.
Шапс исто така им рече на пратениците дека лекциите научени од војната во Украина ја покажале важноста на војната со беспилотни летала бидејќи е смртоносна и евтина.
„Ова во Украина е веројатно првата вистинска војна со беспилотни летала и мислам дека никогаш повторно нема да видиме војна која не вклучува тешка употреба на беспилотни летала“, рече тој.
Минатиот месец Обединетото Кралство објави дека, заедно со Латвија, ќе ја предводи новата коалиција за испорака на илјадници беспилотни летала „камикаѕе“ во Украина во услови на растечки недостиг на муниција на фронтот.
„Дроновите ги нарушуваат нормалните факти за војната. Обично секоја генерација станува поскапа за да има смртоносен ефект, но всушност беспилотните летала, кои понекогаш чинат неколку илјади фунти, може да бидат крајно смртоносни“, рече Шапс.
Сепак, тој предупреди дека „основното војување и муницијата“ остануваат важни во секој иден конфликт.
Европа
Кремљ за евентуалното блокирање на „Телеграм“: „Сè повеќе станува алатка во рацете на терористите“
Портпаролот на Кремљ, Дмитриј Песков, денеска изјави дека во моментот не се планира блокирање на социјалната мрежа „Телеграм“ во Русија.
„Не, во моментот нема такви планови“, изјави Песков за каналот „Шот“ на прашањето дали Русија планира да го блокира „Телеграм“.
Тој додаде дека основачот на оваа платформа, Павел Дуров, треба повеќе да внимава како се користи оваа социјална мрежа.
„Секако, би очекувале поголемо внимание од Павел Дуров бидејќи овој уникатен и феноменален ресурс од технолошки аспект, кој порасна, всушност, пред очите на нашата генерација сè повеќе станува алатка во рацете на терористите, се користи за терористички цели“, рече портпаролот на Кремљ, пренесува „РИА новости“.
Како што изјави во средата за „РИА новости“ извор запознаен со ситуацијата, сторителите на терористичкиот напад во предградието на Москва биле регрутирани преку каналот на „Телеграм“, „Глас Хорасан“, сопственост на авганистанското крило на Исламската држава.
Пратеникот на државната Дума од Обединета Русија, Олег Морозов, денеска оцени дека е неопходно да се развие механизам за автоматско блокирање на каналите на „Телеграм“, кои регрутираат терористи користејќи клучни зборови користејќи вештачка интелигенција.