Европа
Украина призна дека уапсила две руски новинарки
Двете руски новинарки коишто работат за руската глобална телевизиска мрежа LifeNews се уапсени и наскоро ќе бидат протерани од Украина, изјави во петокот попладнето шефот на Службата за безбедност на Украина, Маркијан Лубкивски, откако претходно редакцијата го загуби контактот со двете новинарки во украинската престолнина Киев, а тамошните власти досега не даваа никакви информации каде се наоѓаат, истовремено Москва побара итно да бидат ослободени.
„Украинската безбедносна служба приведе две руски државјанки кои работат како новинарки за LifeNews. Нивната дозвола за престој е поништена и ќе бидат прогонети од нашата земја со забрана за влез во Украина на три години“, напиша челникот на СБУ, Маркијан Лубкивски на Facebook.
„Нивната работа нема никаква врска со новинарството и им нанесува штета на безбедноста и на интересите на Украина“, додаде.
Од LifeNews, каде претходно се сомневаа дека нивните новинарки се приведени од украинските безбедносни структури, ја потврдија информацијата за нивното приведување,
Меѓутоа, генералниот директор на телевизијата Арам Габрелјанов обвини дека новинарката Елизавета Храмцова и снимателката Наталија Калишева се приведени под лажно обвинување дека ја снимале зградата на украинската служба во Киев, како и дека можеби нешто знаеле во врска со заканата за поставена бомба за што наводно информации имала СБУ.
Габрелјанов во писмото до организациите за заштита на правата и слободите на новинарите истакна дека „новинарите на LifeNews ги извршувале своите професионални задачи и не ги нарушиле законите на Украина, покривајќи ги настаните во Киев“.
Инаку ова не е прв инцидент и приведување на новинарите на телевизијата LifeNews во Украина. Двајцата новинари Олег Сидјакин и Марат Сајченко украинските сили во мај минатата година ги затворија и една седмица ги држеа во заточеништво без образложение во околината на Краматорск, бунтовничко упориште во рускојазичните источни региони.
На почетокот од јануари годинава, следејќи го протестот во центарот на Киев новинарките на оваа телевизија Жана Карпенко и Александра Улјанова беа нападнати од поголема група лица кои им ја скршила опремата за снимање. Неколку дена претходно тие беа нападнати исто така во центарот на украинската престолнина за време на ткн манифестација марш на факелите во организација на украинските ултранационалистичките партии и движења, при што новинарките биле физички нападнати, а им биле одземени мобилните телефони и камерата./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Шолц: Војната во Украина може да трае уште неколку години
Германскиот канцелар Олаф Шолц изјави дека верува оти војната во Украина може да се пролонгира уште неколку години.
„Никој не може да каже дали оваа војна ќе трае можеби пет години“, рече Шолц вечерва во источниот германски град Кемниц.
Тој ја бранеше германската воена помош за Украина и додаде дека заедно со неа мора да се негува и дипломатијата.
„Меѓутоа, од почетокот на војната, рускиот претседател Владимир Путин не покажа знаци на движење напред“, рече тој.
„Диктиран мир е неприфатлив. Не смее да се дозволи да се извлече со ова“, додаде германскиот канцелар.
Европа
Лавров: Москва се уште инсистира на вистинска руска Украина
По повеќе од две години интензивна војна во Украина, рускиот министер за надворешни работи Сергеј Лавров денеска го потврди тврдењето на Москва дека полага право да владее над соседната земја.
„Во најдобар случај, иднината на западна Украина е непозната“, рече Лавров во интервјуто во Москва за неколку руски телевизиски станици.
„Во спротивно ќе има само Украина која е навистина руска, која сака да биде дел од рускиот свет, која сака да зборува руски и да ги образува своите деца“, рече тој.
Не станува збор за каква било алтернатива, смета Лавров, кој е министер за надворешни работи од 2004 година и е лојален поддржувач и доверлив човек на претседателот Владимир Путин.
Русија не сака да ги напаѓа земјите на НАТО, како што се тврди на Запад за да ги исплаши гласачите, рече Лавров. „Но, ако сакаат да го донесат НАТО до нашите граници, тогаш секако дека ќе знаеме како да го спречиме тоа во Украина“, рече тој.
Како и другите високи членови на руското раководство, Лавров рече дека Русија е подготвена за преговори со Украина, но само под посебни услови.
Нема да има прекин на огнот за време на можните преговори, разговорите со украинскиот претседател Володимир Зеленски се бесмислени, а Киев мора да се откаже од својата формула за мир, рече тој.
Во есента 2022 година, Зеленски презентираше десет точки за мир, меѓу кои се издвојуваат повлекувањето на руската армија, реконструкцијата и компензацијата и гонењето на воените злосторници.
Европа
Генералниот секретар на НАТО и вети на Украина дополнителни системи за воздушна одбрана
Сојузниците на НАТО се согласија да обезбедат дополнителни системи за противвоздушна одбрана во Киев, изјави шефот на НАТО Јенс Столтенберг по специјалната средба на министрите за одбрана на сојузниците со украинскиот претседател Володимир Зеленски.
„Покрај „Патриот“, има и други оружја што сојузниците можат да ги обезбедат, вклучувајќи го и SAMP/T (францускиот систем), а многу други кои немаат достапни системи ветија дека ќе обезбедат финансиска поддршка за нивните набавки за Украина“, изјави Столтенберг за новинарите во Брисел.
Зеленски го побара состанокот бидејќи неговата земја се соочува со недостиг на муниција и задржување на клучните американски финансирања, што со месеци е блокирано од републиканците во Конгресот, додека ЕУ не успева да испорача муниција навреме.
Тој во петокот им рече на членките на НАТО дека на Украина и се потребни најмалку седум системи за воздушна одбрана „Патриот“ или други напредни системи за воздушна одбрана за да се спротивстави на руските воздушни напади, повикувајќи ги да ја засилат воената помош за Киев.
Во емотивниот говор преку видео врска, украинскиот лидер го опиша сегашното ниво на странска помош како „многу ограничено“ и рече дека Израел не бил оставен на себе за време на масовниот ирански воздушен напад во саботата.
„(Рускиот претседател Владимир) Путин мора да биде симнат на земјата, а нашето небо мора повторно да стане безбедно… И тоа целосно зависи од вашиот избор… (од) изборот дали сме навистина сојузници“, рече Зеленски во неговиот говор.