Европа
Умре и напаѓачот во швајцарскиот воз
Дваесет и седумгодишниот Швајцарец кој во саботата го изведе нападот во воз во швајцарскиот кантон Сент Гален, починал во болница во неделата од здобиените изгореници, соопшти кантоналната полиција, откако претходно беше објавено дека починала 34-годишната жена повредена во нападот, и оти во критична состојба се уште две од петте жртви кои се повредени со нож и оган.
Во критична состојба е шестгодишно девојченце и 17-годишна девојка, од здобиените изгореници од огнот кој со запалива течност во возот го предизвикал напаѓачот.
Пет лица, уште една жена на 43 години, 17-годишно момче и 50-годишен маж, се повредени во нападот кој се одигра во саботата рано попладнето во возот кој влегувал на станицата Салез на линијата меѓу Бушес и Санвлад во кантотнот Сент Гален во североисточна Швајцарија. Пет лица се здобиле со убоди со нож и изгореници, додека шестата жртва е хоспитализирана поради вдишување чад кога се обидела да им помогне на загрозените.
Полицијата во рамките на криминалистичката истрага го пребарала домот на напаѓачот во соседниот кантон и не ги објави наодите, но соопшти дека нема показатели кои би укажувале дека мотивот за злосторството е тероризам. „Мотивот уште не е јасен. Засега не можеме ништо да кажеме“, се наведува во соопштението на полицијата на кантонот Сент Гален.
Самиот напаѓач бил тешко изгорен во пожарот кој самиот го предизвикал со запалива течност со којашто ги испрскал и патниците. Врз основа на прегледаните снимки, полицијата смета оти напаѓачот, кој нема криминално минато, дејствувал сам. Бил опериран во саботата, но во неделата умрел.
Едно од лицата кои се здобиле со повреди е мажот кој од перонот на железничката станица Салез скокнал во возот и го извлекол напаѓачот чија облека горела. „Со таа интервенција, без сомнение, го спречил најлошото“, изјави портпаролот на полицијата Бруно Нецгер,
Жената, којашто претходно во неделата им подлегна на повредите, е патничка во возот чијашто облека била најмногу натопена со запаливата течност, но полицијата не може да потврди дека таа била целта на напаѓачот. Полицијата, исто така, засега одбива да ги објави идентитети и националноста на жртвите. /крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Шпанскиот премиер размислува да се повлече од функцијата, отворена истрага против неговата сопруга
Шпанскиот премиер Педро Санчез денеска објави дека се повлекува од јавните должности затоа што мора „да застане и да размисли“ дали ќе продолжи да биде шеф на владата откако судот во Мадрид отвори прелиминарна истрага против неговата сопруга за корупција и трговско влијание.
„Итно ми треба одговор на прашањето дали вреди, дали да продолжам да ја водам владата или да се откажам од оваа чест“, објави тој преку социјалната мрежа „Икс“.
Синдикатот Манос Лимпијас (Чисти раце) ја пријавил неговата сопруга Бегона Гомез дека им помагала на претприемачите на јавни тендери и го искористила тоа. Судот претходно денеска соопшти дека отворил истрага, без да даде детали.
Министрите од левичарската влада на Санчез оценија дека се работи за лажен извештај и дека синдикатот што го доставил е близок до екстремната десница.
Европа
Суспендиран рускиот свештеник кој одржа јавна молитва за Навални
Рускиот православен свештеник, кој во март отслужи служба за мртвите за починатиот руски опозициски лидер Алексеј Навални, е суспендиран од свештеничките должности на три години, соопшти Московската епархија на Руската православна црква.
Во соопштението објавено вчера на официјалната веб-страница на епархијата, не се наведува зошто е казнет свештеникот Дмитриј Сафронов. Нему му е забрането да дава благослов, да ја носи облеката и крстот на црковниот свештеник до 2027 година.
Сафронов треба да биде префрлен и во друга црква во Москва за да ги извршува должностите на читател на псалми. По завршувањето на периодот на покајание, врз основа на повратни информации од местото на послушанието, ќе се донесе одлука за можноста за негова понатамошна свештеничка служба“, се вели во соопштението на епархијата.
Сафронов одржа комеморација на 26 март, на која присуствуваа илјадници луѓе кои дојдоа да се простат од Навални, најжестокиот критичар на претседателот Владимир Путин во Русија.
Навални почина во февруари на 47-годишна возраст во казнена колонија на Арктикот.
Европа
Судот во Русија ја одби жалбата на американскиот новинар кој е во затвор поради шпионажа
Руски суд денеска ја отфрли последната од серијата жалби на новинарот на „Волстрит журнал“, Еван Гершкович, против истражниот затвор под обвинение за шпионажа.
Гершкович (32) е првиот американски новинар уапсен во Русија под обвинение за шпионажа по Студената војна. На 29 март минатата година тој беше приведен од Федералната служба за безбедност (ФСБ), а беше уапсен на задача во рускиот град Екатеринбург.
Руските власти тврдат дека тој се обидувал да дојде до доверливи информации кои требало да и ги пренесе на американската влада, но новинарот, весникот за кој работи и американската влада негираат дека тој е шпион.
Датумот на судењето се уште не е одреден, а притворот минатиот месец му беше продолжен за уште три месеци и треба да трае до 30 јуни.
Минатомесечното рочиште беше затворено за печатот, но во вторникот на новинарите им беше дозволено да го снимат Гершкович додека тој стои во стаклената кутија во судницата и им се насмевнува на колегите од медиумите.
Рускиот претседател Владимир Путин изјави дека во одреден момент Гершкович би можел да биде ослободен во замена за рускиот затвореник кој се држи во странство, но таков договор се уште не е постигнат.