Европа
Валс: Париските напади се планирани во Сирија, можни се нови следните денови
Терористичките напади од петокот вечерта во Париз, биле организирани и планирани на територијата на Сирија, изјави во понеделникот францускиот премиер Мануел Валс, и истакна дека Франција треба да се подготви за нови напади коишто може да се случат и во други европски земји, во следните денови и седмици.
„Овој напад бил организиран, обмислен и планиран на територијата на Сирија“, изјави францускиот претседател на владата Мануел Валс во интервјуто за радиото RTL.
„Знаеме дека постојат операции кои се подготвувале и кои се подготвуваат сé уште, не само во Франција туку и во другите европски земји“, додаде Валс.
Според него, терористички напади може да бидат изведени „во текот на следните денови, во текот на следните седмици“. „Долго ќе живееме со оваа закана.., треба да се подготвиме за неа“, додаде францускиот премиер.
Во разговорот за радио RTL истакна дека француските безбедносни сили спречиле неколку терористички напади во текот на изминатото лето.
Валс потврди дека француската полиција во текот на ноќта кон понеделникот ширум земјата извршила претреси во домовите на осомничени исламисти. „Вкупно повеќе од 150 претреси се спроведено од атентатите од петокот навечер“, рече премиерот.
Кусо извести дека се запленети оружје и панцир елеци. Ги потврди информациите на медиумите дека претресите се изврени и во париското предградие Бобињи, потоа во Жуемон во близина на границата со Белгија, како и во Гренобл и во Тулуз.
Вонредната состојба што ја прогласи претседателот Франсоа Оланд само неколку часа по нападите, го проширува просторот за полициските интервенции. „Ја користиме правната рамка на вонредната состојба за да ги испитаме луѓето коишто им припаѓаат на радикалните исламистички движење… и сите оние коишто пропагираат омраза кон Републиката“, додаде Валс./крај/мф/сн
Извор: RTL
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Шолц: Војната во Украина може да трае уште неколку години
Германскиот канцелар Олаф Шолц изјави дека верува оти војната во Украина може да се пролонгира уште неколку години.
„Никој не може да каже дали оваа војна ќе трае можеби пет години“, рече Шолц вечерва во источниот германски град Кемниц.
Тој ја бранеше германската воена помош за Украина и додаде дека заедно со неа мора да се негува и дипломатијата.
„Меѓутоа, од почетокот на војната, рускиот претседател Владимир Путин не покажа знаци на движење напред“, рече тој.
„Диктиран мир е неприфатлив. Не смее да се дозволи да се извлече со ова“, додаде германскиот канцелар.
Европа
Лавров: Москва се уште инсистира на вистинска руска Украина
По повеќе од две години интензивна војна во Украина, рускиот министер за надворешни работи Сергеј Лавров денеска го потврди тврдењето на Москва дека полага право да владее над соседната земја.
„Во најдобар случај, иднината на западна Украина е непозната“, рече Лавров во интервјуто во Москва за неколку руски телевизиски станици.
„Во спротивно ќе има само Украина која е навистина руска, која сака да биде дел од рускиот свет, која сака да зборува руски и да ги образува своите деца“, рече тој.
Не станува збор за каква било алтернатива, смета Лавров, кој е министер за надворешни работи од 2004 година и е лојален поддржувач и доверлив човек на претседателот Владимир Путин.
Русија не сака да ги напаѓа земјите на НАТО, како што се тврди на Запад за да ги исплаши гласачите, рече Лавров. „Но, ако сакаат да го донесат НАТО до нашите граници, тогаш секако дека ќе знаеме како да го спречиме тоа во Украина“, рече тој.
Како и другите високи членови на руското раководство, Лавров рече дека Русија е подготвена за преговори со Украина, но само под посебни услови.
Нема да има прекин на огнот за време на можните преговори, разговорите со украинскиот претседател Володимир Зеленски се бесмислени, а Киев мора да се откаже од својата формула за мир, рече тој.
Во есента 2022 година, Зеленски презентираше десет точки за мир, меѓу кои се издвојуваат повлекувањето на руската армија, реконструкцијата и компензацијата и гонењето на воените злосторници.
Европа
Генералниот секретар на НАТО и вети на Украина дополнителни системи за воздушна одбрана
Сојузниците на НАТО се согласија да обезбедат дополнителни системи за противвоздушна одбрана во Киев, изјави шефот на НАТО Јенс Столтенберг по специјалната средба на министрите за одбрана на сојузниците со украинскиот претседател Володимир Зеленски.
„Покрај „Патриот“, има и други оружја што сојузниците можат да ги обезбедат, вклучувајќи го и SAMP/T (францускиот систем), а многу други кои немаат достапни системи ветија дека ќе обезбедат финансиска поддршка за нивните набавки за Украина“, изјави Столтенберг за новинарите во Брисел.
Зеленски го побара состанокот бидејќи неговата земја се соочува со недостиг на муниција и задржување на клучните американски финансирања, што со месеци е блокирано од републиканците во Конгресот, додека ЕУ не успева да испорача муниција навреме.
Тој во петокот им рече на членките на НАТО дека на Украина и се потребни најмалку седум системи за воздушна одбрана „Патриот“ или други напредни системи за воздушна одбрана за да се спротивстави на руските воздушни напади, повикувајќи ги да ја засилат воената помош за Киев.
Во емотивниот говор преку видео врска, украинскиот лидер го опиша сегашното ниво на странска помош како „многу ограничено“ и рече дека Израел не бил оставен на себе за време на масовниот ирански воздушен напад во саботата.
„(Рускиот претседател Владимир) Путин мора да биде симнат на земјата, а нашето небо мора повторно да стане безбедно… И тоа целосно зависи од вашиот избор… (од) изборот дали сме навистина сојузници“, рече Зеленски во неговиот говор.