Европа
ВИДЕО: Камерон пред вклучени микрофони рече дека ги очекува челниците на најкорумпираните земји
Британскиот премиер Дејвид Камерон во вторникот пред вклучените микрофони на британската кралица ѝ рече дека на Самитот за борбата против корупцијата кој во четвртокот започнува во Лондон доаѓаат челниците на некои „неверојатно корумпирани земји“, меѓу кои на Нигерија и Авганистан, на што Елизабета Втора не реагираше.
Во четврток британскиот премиер Дејвид Камерон ќе биде домаќин на меѓународниот самит за борба против корупцијата чија цел е да се преземе глобална акција по ова прашање во сите аспекти од животот. На видео снимката којашто ја објави ITN, се гледа како Камерон разговара со кралицата Елизабета Втора за самитот.
„Утрово имавме многу успешен состанок на кабинетот на кој разговаравме за самитот за борбата против корупцијата“, вели Камерон на снимката додека кралицата му се приближува, „Ќе дојдат и Нигеријците.., всушност во Британија ќе дојдат челниците на некои неверојатно корумпирани земји. Нигерија и Авганистан, двете веројатно најкорумпирани земји на светот“, вели британскиот премиер.
Кралицата не одговара на коментарот на Камерон, но надбискупот од Кантербери на тоа вели „Но тој претседател всушност не е корумпиран“. Останува тајна на кого мислел надбискупот.
Нигерискиот претседател Муахмаду Бухари и авганистанскиот претседател Ашраф Гани, кои ќе учествуваат во работата на лондонскиот самит, изјавија претходно дека се свесни за степенот на корупцијата во нивните земји и ветија дека ќе настојуваат да ја искоренат
Според последните податоци за корупцијата коишто ги собира групата Transparency International, Авганистан е на 166-то место, односно претпоследното место на годишната листа на најкорумпираните земји во светот. Само Северна Кореја и Сомалија, кои го делат 167-то место, се покорумпирани. Нигерија на споменатата листа го зазема 136-то место
Засега не е познато дали Камерон бил свесен за фактот дека неговата комуникација со кралицата се снима додека присуствуваше на настан по друг повод во Бакингемската палата./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Фон Дер Лајен: На Европа не и се заканува војна, но треба да бидеме подготвени и да произведуваме оружје
Европа во моментов не се соочува со непосредна закана од војна, но мора да биде подготвена за тоа, изјави претседателката на Европската комисија, Урсула фон дер Лајен.
„Заканата од војна можеби не е непосредна, но не е невозможна. Треба да бидеме подготвени и тоа започнува со итната потреба за зајакнување и трансформирање на вооружените сили на членките на блокот“, рече Фон дер Лајен на Европскиот самит за одбрана и безбедност.
Според неа, ЕУ мора да произведе оружје од новата генерација за да „победи на бојното поле“.
„Европа треба да се стреми да развие и произведе нова генерација на оперативни способности за да победи во битките и да обезбеди доволно материјално количество и технолошка супериорност што можеби ќе и треба во иднина, а тоа значи турбо полнење на нашиот одбранбен индустриски капацитет во следните пет години,“ изјави Фон дер Лајен.
Европа
(Видео) Русите го гранатираа Чернихив, загинаа најмалку 13 лица, Зеленски бара дополнителна помош
Украинскиот претседател Володимир Зеленски ги повика западните партнери на потребната решителност и поддршка по рускиот ракетен напад врз северниот град Чернихив утринава, при што загинаа најмалку 13 лица.
„Ова немаше да дојде до ова доколку Украина добиеше доволно опрема за противвоздушна одбрана и ако беше доволна решеноста на светот да се спротивстави на рускиот тероризам“, објави Зеленски на „Телеграм“.
Министерот за внатрешни работи, Ихор Клименко, во изјава за „Телеграм“ рече дека во нападот загинале најмалку 13 лица, а повеќе од 60 се повредени и дека спасувачките операции се во тек.
Во нападот беа оштетени и четири катни згради, болница, образовна институција и десетици автомобили, додаде тој.
Русија изврши напад со три крстосувачки ракети „Искандер“, изјави регионалниот гувернер Вјачеслав Чаус во коментар за украинскиот јавен сервис „Суспилна“. Тој рече дека три проектили паднале во близина на центарот на градот и дека е оштетена цивилната инфраструктура.
Локалното население е повикано да дарува крв, изјави градоначалникот Олександр Ломако. Чернихив се наоѓа на речиси 150 километри северно од Киев, недалеку од границата со Русија. Кога руските сили ја нападнаа Украина во февруари 2022 година, Чернихив беше нападнат, но не беше преземен.
Европа
Во Германија уапсени 10 лица: за пари набавувале дозволи за престој на странци
Во Германија денеска во полициска акција се уапсени десет лица осомничени дека за големи суми пари набавувале дозволи за престој во Германија за странци од Кина и арапските земји.
„Главни осомничени се двајца адвокати од Келн, а истрагата се води против 38 можни члена на шверцерската банда и против 147 други лица, кои се занимавале со систематски шверц на луѓе“, се вели во соопштението на полициската управа на град веднаш до Келн, кои ја водат операцијата.
Осомничените се обвинети дека донеле странски државјани во Германија и ги набавиле потребните документи за големи суми пари, од 30 до 350 илјади евра. Осомничените основале фиктивни фирми и лажни адреси со кои се регистрирале лица од странство.
Весникот „Билд“ пишува дека меѓу осомничените има и вработени во неколку канцеларии за странци во регионот Рајнланд-Пфалц, кои издавале дозволи за престој за пари. Еден од нив е меѓу уапсените. Како што е соопштено, за време на рацијата била запленета и голема количина пари. Минатата година, со 300.000 бегалци и баратели на азил, Германија забележа значителен пораст на илегалниот влез во земјата.