Во Франција денеска 37 департмани се ставени под црвено ниво на предупредување поради силниот топлотен бран што ја зафати земјата, соопшти француската метеоролошка служба.

Уште 46 департмани се наоѓаат под портокалово ниво на тревога поради високите температури.

Според службата „Метео Франс“, ова е трет топлотен бран во изминатите месец и половина, а се очекува да трае најмалку до средината на следната недела. Постепено намалување на температурите се прогнозира од понеделник.

Зголемен ризик од пожари

Шумската метеоролошка служба предупреди на „многу висок“ ризик од шумски пожари во департманот Горна Гарона.

Дополнително, 54 други департмани се класифицирани со портокалово предупредување поради „висок“ ризик од пожари, што е последица на сушата и екстремните температури.

Скратена „Тур де Франс“

Поради екстремните временски услови, организаторите на велосипедската трка „Тур де Франс“ одлучија деветтата етапа, која се вози денеска меѓу Малмор и Усел, да биде скратена за 30 километри.

Високите температури влијаат и врз туристичките локации. Управите на Ајфеловата кула, музејот Лувр и музејот Орсеј одлучија да го скратат работното време поради жештините.

Француските власти во околу 30 департмани и градови најавија откажување на огномети по повод националниот празник 14 јули – Денот на Републиката и годишнината од падот на Бастилја, поради сушата и зголемениот ризик од пожари.

Нов топлотен бран ја зафати Западна Европа, а Франција и Холандија воведоа посебни мерки поради екстремно високите температури кои во делови од регионот во текот на викендот ќе достигнат и до 40 степени Целзиусови.

Француската метеоролошка служба прогласи црвено ниво на предупредување поради топлотниот бран во 24 департмани, меѓу кои е и целиот регион Ил-де-Франс, каде се наоѓа главниот град Париз.

Франција со највисок степен на тревога

Ова е трет топлотен бран што ја погодува Франција од мај годинава, а највисок степен на подготвеност е активиран во северозападниот дел од земјата.

Француските власти предупредуваат дека високите температури претставуваат ризик и за здрави лица, особено за спортисти и работници кои извршуваат физички активности на отворено.

Холандија активираше национален план за горештини

И Холандија се подготвува за новиот топлотен бран, со температури кои локално се очекува да достигнат до 34 степени.

Активиран е националниот план за високи температури, а издадено е и жолто предупредување за делови од земјата.

Најтопло ќе биде во провинциите Лимбург, Северен Брабант и Зеланд-Фландрија, додека во централните и јужните делови температурите ќе се движат меѓу 30 и 33 степени.

Синдикатите предупредуваат на опасни услови за работниците

Холандскиот синдикат ЦНВ предупреди дека многу работни места не се прилагодени на сè почестите екстремни температури.

Анкета спроведена меѓу 1.500 работници во градежништвото, индустријата и здравството покажала дека повеќе од половина од нив работат физички тешки работи за време на топлотни бранови, а 56 отсто сметаат дека високите температури создаваат небезбедни услови за работа.

Синдикатот побара задолжителни мерки, меѓу кои прилагодено работно време, дополнителни паузи, разладување на работните места и прекин на работата во услови на опасни температури.

Повеќе од 2.000 дополнителни смртни случаи во Франција

Француските власти соопштија дека од почетокот на топлотниот бран на 19 јуни, во земјата се регистрирани 131 случаи на давење.

Министерката за здравство претходно информираше дека за време на јунскиот топлотен бран биле забележани 2.025 дополнителни смртни случаи, особено кај лицата постари од 45 години.

Опасност од пожари и последици од климатските промени

Француската влада за првпат во историјата го активираше планот за вонредни ситуации „Орсек – екстремни горештини“ во девет департмани на западот од земјата.

Властите предупредуваат и на зголемен ризик од шумски пожари, додека метеоролозите оценуваат дека екстремните топлотни бранови стануваат сè почести поради климатските промени.

По 13 години преговори, Европската унија постигна договор за промена на правилата со кои се регулираат правата на патниците во воздушниот сообраќај. Новите правила имаат цел да донесат поголема заштита за патниците, поголема транспарентност на цените и појасни услови за багажот.

Европскиот парламент ги усвои ревидираните правила, со кои се задржуваат постојните права на патниците за надомест при големи доцнења и откажани летови.

Остануваат обештетувањата до 600 евра за доцнење и откажување летови

Според новите правила, патниците ќе имаат право на финансиски надомест доколку летот до крајната дестинација доцни повеќе од три часа или ако е откажан помалку од 14 дена пред полетувањето.

Висината на надоместоците останува непроменета:

– 250 евра за летови до 1.500 километри;
– 400 евра за летови во рамки на ЕУ подолги од 1.500 километри и други летови меѓу 1.500 и 3.500 километри;
– 600 евра за сите останати летови.

Авиокомпаниите ќе бидат обврзани електронски да ги информираат патниците за нивните права и можноста за поднесување барање за надомест најдоцна 96 часа по пристигнувањето.

Патниците ќе имаат девет месеци за поднесување барање, а авиокомпаниите ќе мора веднаш да го потврдат приемот и во рок од 30 дена или да исплатат надомест или детално да образложат зошто барањето е одбиено.

Се забранува практиката „no-show“

Со новата регулатива се забранува таканаречената „no-show“ практика, според која авиокомпаниите можеа да му го ускратат повратниот лет на патник кој не го искористил првиот дел од патувањето.

Новите правила предвидуваат и поголема транспарентност при прикажувањето на цените на билетите.

Познати димензии за бесплатна лична торба

За првпат се утврдуваат точни димензии за бесплатниот личен предмет што патникот може да го внесе во авионот – како мала торба, ранец или торба за лаптоп.

Максималните дозволени димензии ќе бидат 40 × 30 × 15 сантиметри.

Авиокомпаниите ќе мора уште при резервацијата јасно да прикажат која цена вклучува рачен багаж, за патниците полесно да ги споредуваат понудите.

И понатаму ќе можат да постојат поевтини тарифи за патници кои патуваат без рачен багаж.

Поголема заштита за деца, трудници и лица со намалена подвижност

Новите правила предвидуваат дополнителна заштита за лицата со инвалидитет и намалена подвижност, децата, трудниците и малолетниците кои патуваат без придружба.

Трудниците, децата под 14 години и семејствата со лица со намалена подвижност ќе имаат право да седат заедно без дополнителна наплата.

„Рајанер“ ги критикува новите правила

Авионската индустрија реагираше негативно на новата регулатива, предупредувајќи дека дополнителните обврски може да доведат до повисоки трошоци за патниците.

Меѓу најгласните критичари е нискобуџетната авиокомпанија „Рајанер“, која новите правила за транспарентност на цените ги нарече „лоша регулатива“.

Од компанијата и од здруженијата на авиопревозници предупредуваат дека обврската рачниот багаж да биде вклучен во јасно прикажаната цена може да ја отежни понудата на најевтини билети.

Експерти: Новите правила ќе ја намалат конфузијата за патниците

Експертите за воздушен сообраќај оценуваат дека Европската унија и досега имала еден од најразвиените системи за заштита на патниците, но дека проблем биле различните правила кај авиокомпаниите и тешкотиите при остварување на правата.

Според нив, најголема промена ќе биде унифицирањето на правилата за рачен багаж и дополнителните трошоци, особено кај патниците кои комбинираат летови со различни авиокомпании.

Новите правила треба да донесат помалку скриени трошоци и поголема сигурност за патниците, иако останува прашањето како авиокомпаниите ќе ги распределат дополнителните трошоци што ќе произлезат од новите обврски.