Европа
Во Брисел продолжено највисокото ниво на тревога, училиштата и метрото ќе работат од среда
Белгиските власти одлучија во понеделникот да го задржат и натаму највисокото ниво на опасност од можен терористички напад на подрачјето на главниот град Брисел, а училиштата и подземната железница би требало да бидат отворени од среда.
Оваа одлука во петокот вечерта ја соопшти на прес-конференција белгискиот премиер Шарл Мишел по седницата на националниот Совет за безбедноста, на кој била анализирана ситуацијата во главниот град и воопшто во земјата.
„Остануваат истите потенцијални цели на терористичките напади: јавниот транспорт, трговските центри и фреквентните улици“, рече Мишел. Додаде дека училиштата и подземната железница постепено ќе започнат да работат од среда.
Кога станува збор за остатокот од Белгија, и натаму останува 3-то ниво на тревога од напад на скалата од 4, кое, исто така, беше воведено ноќта кон саботата.
Премиерот Мишел порача дека и натаму останува на ставот максимално да се намалат бројот на настаните на коишто се собираат поголем број луѓе, како и дека на улиците на Брисел дополнително ќе биде засилено присуството на полицијата и на војската, а овие мерки на сила ќе останат до следниот понеделник.
Вторник ќе биде четвртиот ден како белгиската престолнина живее со највисокото ниво на опасност поради терористичка закана.
Во неделата вечерта до понеделникот утрото белгиската полиција изврши голем број рации, во кои се уапсени 21 човек. Од 16 кои беа приведени во неделата ноќта, 15 се пуштени, а против едно лице е покренато обвинение за учество во активности на терористичка група.
Од петтемина, пак, уапсени во понеделникот утрото во Брисел и Лим, две веќе се ослободени, а другите три лица сé уште се на испитување.
Белгиската полиција во ниеден случај досега не го соопшти идентитетот на приведените и задржаните, освен дека меѓу нив не е Салах Абеслам, за кој постојат сомневања дека се крие во Брисел или Белгија и е подготвен да изврши терористички напад.
Абдеслам е осомничен еден од главните луѓе и помагач на осомничениот како организатор на париските терористички напади од 13-ти ноември, Адбелхамид Абаауд, кој беше убиен во полициската операција во париското предградие Сен Дени./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Шолц: Војната во Украина може да трае уште неколку години
Германскиот канцелар Олаф Шолц изјави дека верува оти војната во Украина може да се пролонгира уште неколку години.
„Никој не може да каже дали оваа војна ќе трае можеби пет години“, рече Шолц вечерва во источниот германски град Кемниц.
Тој ја бранеше германската воена помош за Украина и додаде дека заедно со неа мора да се негува и дипломатијата.
„Меѓутоа, од почетокот на војната, рускиот претседател Владимир Путин не покажа знаци на движење напред“, рече тој.
„Диктиран мир е неприфатлив. Не смее да се дозволи да се извлече со ова“, додаде германскиот канцелар.
Европа
Лавров: Москва се уште инсистира на вистинска руска Украина
По повеќе од две години интензивна војна во Украина, рускиот министер за надворешни работи Сергеј Лавров денеска го потврди тврдењето на Москва дека полага право да владее над соседната земја.
„Во најдобар случај, иднината на западна Украина е непозната“, рече Лавров во интервјуто во Москва за неколку руски телевизиски станици.
„Во спротивно ќе има само Украина која е навистина руска, која сака да биде дел од рускиот свет, која сака да зборува руски и да ги образува своите деца“, рече тој.
Не станува збор за каква било алтернатива, смета Лавров, кој е министер за надворешни работи од 2004 година и е лојален поддржувач и доверлив човек на претседателот Владимир Путин.
Русија не сака да ги напаѓа земјите на НАТО, како што се тврди на Запад за да ги исплаши гласачите, рече Лавров. „Но, ако сакаат да го донесат НАТО до нашите граници, тогаш секако дека ќе знаеме како да го спречиме тоа во Украина“, рече тој.
Како и другите високи членови на руското раководство, Лавров рече дека Русија е подготвена за преговори со Украина, но само под посебни услови.
Нема да има прекин на огнот за време на можните преговори, разговорите со украинскиот претседател Володимир Зеленски се бесмислени, а Киев мора да се откаже од својата формула за мир, рече тој.
Во есента 2022 година, Зеленски презентираше десет точки за мир, меѓу кои се издвојуваат повлекувањето на руската армија, реконструкцијата и компензацијата и гонењето на воените злосторници.
Европа
Генералниот секретар на НАТО и вети на Украина дополнителни системи за воздушна одбрана
Сојузниците на НАТО се согласија да обезбедат дополнителни системи за противвоздушна одбрана во Киев, изјави шефот на НАТО Јенс Столтенберг по специјалната средба на министрите за одбрана на сојузниците со украинскиот претседател Володимир Зеленски.
„Покрај „Патриот“, има и други оружја што сојузниците можат да ги обезбедат, вклучувајќи го и SAMP/T (францускиот систем), а многу други кои немаат достапни системи ветија дека ќе обезбедат финансиска поддршка за нивните набавки за Украина“, изјави Столтенберг за новинарите во Брисел.
Зеленски го побара состанокот бидејќи неговата земја се соочува со недостиг на муниција и задржување на клучните американски финансирања, што со месеци е блокирано од републиканците во Конгресот, додека ЕУ не успева да испорача муниција навреме.
Тој во петокот им рече на членките на НАТО дека на Украина и се потребни најмалку седум системи за воздушна одбрана „Патриот“ или други напредни системи за воздушна одбрана за да се спротивстави на руските воздушни напади, повикувајќи ги да ја засилат воената помош за Киев.
Во емотивниот говор преку видео врска, украинскиот лидер го опиша сегашното ниво на странска помош како „многу ограничено“ и рече дека Израел не бил оставен на себе за време на масовниот ирански воздушен напад во саботата.
„(Рускиот претседател Владимир) Путин мора да биде симнат на земјата, а нашето небо мора повторно да стане безбедно… И тоа целосно зависи од вашиот избор… (од) изборот дали сме навистина сојузници“, рече Зеленски во неговиот говор.