Европа
Во текот на операцијата во Донбас, дезертирале над 10.000 украински војници
Повеќе од 10 илјади војници ги напуштиле единици на украинската армија за време на воената операција во побунетите источни рускојазични региони на земјата од април 2014 година, објави со саботата началникот на военото обвинителство на украинските вооружени сили, Олександр Дублјан.
„Во 2014 година дезертерството имаше масовен карактер, околу 10 илјади војници самоволно ги напуштиле воените единици. Во врска со нив се отворени дела со сведоштва за кривична одговорност“, изјавил претставникот на генералштабот за украинскиот весник Вести. Дублјан додал дека во моментов за самоволното напуштање на воените единици со парична глоба или условно се казнети околу 400 војници, а тројца се осудени на седум години затвор.
Во минатото руските медиуми пишуваа дека илјадници украински војници оставени без поддршка и муниција, за да не бидат заробени од страна на проруските бунтовнички милиции пред прогласувањето на прекинот на огнот и формирањето линија на раздвојување, ја минувале границата со Русија, а потоа преку сигурни коридори со автобуси биле враќани на украинска територија.
Главниот воен обвинител на Украина, Анатолиј Матиос, уште во февруари година предупреди на масовната појава на дезертирање од редовите на армијата.
„Иследниците на военото обвинителство истражуваат 5.870 кривични дела за престапи извршени од 16.598 војници. Од нив за непостапување по наредба се обвинети 1.648 војници, за самоволно напуштање на службата или отсуство подолго од десет дена, се обвинети 3.200 војници, а за дезертерство 10.266 војници“, рече тогаш воениот обвинител на Украина.
Од 19-ти јуни во Украина започна новата шеста мобилизација од почетокот на воените дејствија во април 2014 година. Во текот на 2015 година, украинските власти објавија дека планираат да мобилизираат во армијата меѓу 100 и 50 илјади луѓе./крај/мф/сн
Извор: TACC
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
(Видео) 19-годишна девојка во Украина се обидела да го продаде синот, барала 23.500 евра
Во украинскиот град Днипро, 19-годишна девојка се обидела да го продаде сопствениот двегодишен син, соопшти локалната полиција, пренесоа украинските медиуми.
Девојката наводно побарала еден милион гривни, што е околу 23.500 евра за своето дете. 19-годишната девојка наводно му го понудила детето на својот познаник и договорила средба со него. Во вторникот полицијата приведе маж додека носел пари на договорена локација.
Девојката наводно рекла дека не сака да се грижи за својот син, па решила да го продаде. Со парите што ги добила планирала да отвори сопствен бизнис.
Детето е земено во полиција и предадено на надлежните органи. Против неговата мајка е подигнато обвинение за трговија со луѓе.
Европа
Уапсени тројца мажи во истрагата за бруталното убиство на Хрват во Даблин
Уапсени се тројца мажи осомничени за убиството на 31-годишен Хрват, Јосип Штрок во Даблин минатиот месец, пишуваат ирските медиуми.
Тие се осомничени дека ги претепале Штрок, кој живеел и работел во Даблин, и неговиот пријател. Штрок почина од повредите на 3 април.
Неговиот пријател за хрватските медиуми изјавил дека биле во продавница и планирале да се дружат, кога група луѓе им кажала да почнат да зборуваат англиски.
„Немате почит кон нашата земја, ова е Ирска…“, изјави тој за Јутарњи. Тие влегле во автобусот и не забележале дека напаѓачите ги следат и биле нападнати одзади.
„Прво ме удрија со нешто, не знам дали беше шипка или палка. Ги прашав полицајците за деталите што ги виделе на видеото, а кои наводно ги имаат“, рече тој, додавајќи дека следното нешто се сеќава е кога се разбудил во болница.
Европа
Шпанскиот државен обвинител бара прекин на истрагата против сопругата на Санчез
Шпанскиот државен обвинител, назначен од кралот по препорака на владата, денеска побара од судот во Мадрид да ја затвори истрагата за корупција против сопругата на премиерот Педро Санчез бидејќи „нема индиции за кривично дело“.
Судијата во Мадрид вчера пријавил дека отворил прелиминарна истрага за 59-годишната Бегоња Гомез. Сопругата на премиерот беше пријавена кај судијата од синдикатот Манос Лимпиос (Чисти раце) врз основа на медиумските извештаи дека давала препораки со нејзин потпис на претприемачи кои се пријавиле на јавни тендери. На овој начин, било наведено во пријавата, таа ја искористила својата позиција и влијание за да можат блиските луѓе да добијат јавни пари и работа.
Организацијата Манос Лимпијас претходно изјави дека својата тужба ја заснова на медиумски извештаи и дека не може да гарантира за нивната вистинитост, а шефот на организацијата, Мигел Бернад, рече дека извештаите биле проследени до судијата од „граѓанска должност“ и негираше дека акцијата била политички мотивирани.
Во 1980-тите, Бернад се натпреваруваше на два европски избори како кандидат на екстремно десничарскиот Национален фронт во 1980-тите.
Манос Лимпијас одлучи да побара од судот да отвори истрага за бизнисот на Гомез откако обвинителите не постапија самоиницијативно, а истражниот судија ќе одлучи дали медиумските извештаи се точни или не, рече тој.
Консултантската компанија на претприемачот Карлос Барабес, според пријавата, добила 10 милиони евра од јавно претпријатие во надлежност на Министерството за економија. Тој претприемач подоцна основал постдипломски курс кој го водела Гомез на Универзитетот Комплутенсе во Мадрид.
Во извештајот се споменува поврзаноста на сопругата на премиерот со туристичката компанија Globalia, која беше спонзор на едукативниот центар „Africa Centre del Instituto de Empresa“ управуван од Гомез. Шпанската влада со 600 милиони евра народни пари ја спаси „Air Europa“, во сопственост на Globalia.
Државното правобранителство испрати жалба до судот во Мадрид, во која се наведува дека нема „индиции дека сторила кривично дело“, објави радиото Ла Секста.