Европа
WikiLeaks: САД и економски ја шпионирале Франција
Како што беше најавено, парискиот дневен весник Liberation и истражувачкиот порталот Mediapart во понеделникот заедно со разобличувачкиот ресурс WikiLeaks објавија нови документи од американското разузнавање кои покажуваат дека тамошната Агенција за национална безбедност (NSA), покрај шпионирањето на тројцата последни француски претседатели и политичари, вршела надзор и на електронските комуникации и на други претставници на политичката и бизнис елитата.
„Во соработка со WikiLeaks, Liberation и Mediapart разобличуваат како NSA нанесувала штета на комерцијалните интереси на Франција“, се вели во материјалот објавен на интернет изданието на весникот под наслов „Економска шпионажа: Американската валкана игра“.
Во извештајот, кој се повикува на материјали коишто ги поседува WikiLeaks, се тврди дека американските разузнавачки служби преземале големо шпионирање на француските компании, на високите функционери во министерството за економија, како и на склучувањето на големите зделки и контакти на официјален Париз со меѓународни организации.
Американското разузнавање било насочено кон собирање на сите информации за француските трговски односи, врските на Париз со меѓународните финансиски институции, ставовите и односите во рамките на групите на најразвиените земји како Г7 и Г20, а исто така и кон големите надворешни договори на француските компании, особено за оние чијашто вредност надминувала 200 милион американски долари.
„Целта на NSA била поголемиот дел од стратешките сектори: информатичката технологија, електричната енергија, гасот, нафтата, атомската енергија, транспортот, биотехнологијата и други…“, се вели во статијата. Авторот истакнува дека во сферата на интересот на разузнавањето можеле така да попаднат стотици француски компании, како и дека со голем дел од информациите коишто ги собрала NSA биле запознаени највисоките американски челници.
„Никогаш претходно докази за масовна економска шпионажа во Франција, организирана од самиот врв на американската држава, не беа презентирани толку јавно“, тврди Liberation.
Според весникот, во своите активности NSA можела да ги опфати и индустриската шпионажа и кражбата на чувствителни технологии. Сепак, главното што го интересирало американското разузнавање биле податоците за тендерите на коишто учествувале американските компании, истакнува весникот. Податоците добиени преку шпионирањето, имено, им давала огромна конкурентска предност, се вели натаму во написот. Се истакнува и дека вака добиените податоци САД ги споделувале со своите најблиски сојузници, особено во разузнавањето, Велика Британија, Канада, Нов Зеланд и Австралија.
„Под маската на борбата против тероризмот, NSA станала борбена единица на САД во економската војна. Војна којашто Франција целосно ја загуби“, истакнува весникот./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Голем руски напад врз Украина, Полска ги подигна борбените авиони
Руските сили рано утринава ја напаѓаа инфраструктурата во областа Камјанск во близина на украинскиот град Днипро, при што е повредено најмалку едно лице, изјави регионалниот гувернер, додека медиумите во Суспилна објавија дека има експлозии и во регионите Ивано-Франковск и Хмелницки.
„Непријателот ја нападна критичната инфраструктура во регионот. Главна цел на непријателот е нашиот народ и виталните места за населението“, напиша на Телеграм гувернерот на регионот Дњепропетровск, Серхиј Лисак.
Лисак не објасни за каков напад станува збор, но коментаторите на Телеграм известија за употребените проектили и експлозиите во областа. Исто така, наводно имало и прекин во снабдувањето со електрична енергија и вода.
Ројтерс не можеше независно да ги потврди извештаите од областа. Украинските медиуми јавуваат дека експлозии се слушнале и во Лавов, град на крајниот запад на Украина.
Медиумската куќа Суспилна објави за руски крстосувачки ракети во украинскиот воздушен простор и експлозии во регионите Ивано-Франковск и Хмелницки и градот Днипро, додавајќи дека не е познато дали проектилите погодиле некоја цел.
Руските сили извршија големи напади врз објектите на енергетската инфраструктура во последните неколку недели, вклучувајќи го и масовниот напад на 22 март, кој Киев го опиша како најголем таков напад од инвазијата на московските сили во февруари 2022 година.
Оперативната команда на полските вооружени сили соопшти дека полските и сојузничките авиони биле активирани рано утринава откако Русија извршила ракетни напади врз Украина.
„Полските и сојузничките авиони летаат во полскиот воздушен простор, што може да резултира со зголемени нивоа на бучава, особено во југоисточниот дел на земјата“, објави командата на социјалната платформа „Икс“.
Југоисточниот дел на Полска се граничи со Украина, додаде Ројтерс.
Европа
Автобус повторно се преврте на автопат во Германија, патниците биле средношколци
Автобус со околу 60 патници се преврте вчера на автопатот А44 во западната германска покраина Северна Рајна Вестфалија, јавува дпа. Во сообраќајката се повредени над 20 лица, извести полицијата синоќа.
Да потсетиме, ден претходно слична несреќа се случи во Германија кога автобус на „Фликсбас“ се преврте на автопатот во близина на градот Лајпциг на истокот од земјата. Во таа несреќа загинаа четири лица, а над 20 се повредени.
Автобусот излетал од патот и се превртел на страна во близина на градот Верл, 100 километри источно од Дизелдорф. Целосно е затворен делот од 20 километри од автопатот А44 од излезот Уна Ост до Верл во правец на Касел. На местото на несреќата пристигнале полицајци, пожарникари и спасувачки хеликоптер.
Полицијата првично соопшти дека 21 лице е полесно повредено, а едно е тешко. Подоцна, тие ја ревидираат бројката на 20 полесно повредени и еден тешко повреден. Портпаролот на полицијата изјави дека автобусот превезувал ученици од стручно училиште во Варбург кои се враќале од патување во Англија.
Се уште не е јасна причината за несреќата. Полицијата соопшти дека никој не е во животна опасност и дека во несреќата не учествувале други возила. Несреќата се случи само еден ден откако четири лица загинаа во автобуска несреќа во близина на Лајпциг во источна Германија.
Европа
Украина се обидува да ја убеди Индија да застане на страната на Киев, а не на Москва
Украинскиот министер за надворешни работи Дмитро Кулеба ја повика Индија да застане со Киев, велејќи дека блиските врски на Индија со Русија се засноваат на избледеното советско наследство, објави денеска Фајненшл тајмс.
Кулеба вчера пристигна во Њу Делхи со цел да ги зајакне врските со Индија, како и да ја промовира визијата на Киев за пат кон мирот во Украина.
Според Ројтерс, Индија традиционално има блиски економски и одбранбени врски со Москва и се воздржува да ја критикува Русија поради нејзината инвазија на Украина. Згора на тоа, купувањето на руска нафта од Индија е на рекордно ниво во последно време.
Кулеба рече дека Индија има многу да добие од проширувањето на трговските и технолошките врски со Украина, поставувајќи го прашањето за улогата на индиските компании во повоената обнова на Украина.
Украина сака да ја „врати трговијата“ со Индија, во форма на извоз на земјоделски производи како што е сончогледовото масло, а самата сака да купи повеќе индиски стоки. „Ние сме заинтересирани да увеземе дел од тешката машинерија што ја произведува Индија“, рече Кулеба.
Украина се надева дека во наредните месеци ќе одржи самит на светските лидери без учество на Русија, со цел да го промовира и зајакне својот план за мир, кој меѓу другото повикува на повлекување на руските трупи од нејзината територија.
Русија ја отфрли таа украинска дипломатска иницијатива.