Граѓанската војна во Судан создава една од најтешките хуманитарни кризи во светот, а милиони луѓе се соочуваат со глад и недостиг од основни услови за живот.

Агенции на ОН предупредија дека условите во Судан дополнително ќе се влошат, бидејќи продлабочувањето на кризата со глад се совпаѓа со почетокот на сезоната на дождови.

Условите во оваа источноафриканска земја, разорена од тригодишна граѓанска војна, се оценети како „крајно загрижувачки“, се наведува во заедничкото соопштение на неколку агенции на Обединетите нации, кои повикаа на итен и непречен хуманитарен пристап.

Организацијата за храна и земјоделство на ОН (ФАО), Светската програма за храна (ВФП) и УНИЦЕФ се повикаа на најновата анализа на Интегрираната класификација на фазите на безбедноста на храната (ИПЦ).

Проценките покажуваат дека околу 19,5 милиони луѓе, односно речиси 40 проценти од населението на Судан, се соочуваат со акутна несигурност во храната и гладување.

Според анализата, околу 14 милиони луѓе се наоѓаат во Фаза 3 на ИПЦ, која се карактеризира со акутен глад. Повеќе од пет милиони се во Фаза 4, што претставува хуманитарна вонредна состојба, додека околу 135.000 луѓе се во најкритичната Фаза 5, каде што условите се споредливи со глад.

„Се очекува состојбата дополнително да се влоши во текот на сезоната на дождови од јуни до септември“, предупредуваат агенциите.

Особено загрижувачка е состојбата во регионот Кордофан, каде што судирите меѓу паравоените Сили за брза поддршка (РСФ) и владините сили дополнително ги исцрпуваат резервите на храна. Според агенциите, РСФ ги блокира хуманитарните конвои и врши опсада на градови, што дополнително го продлабочува недостигот на храна и лекови.

ФАО, ВФП и УНИЦЕФ повикаа на итен прекин на непријателствата, заштита на цивилите и цивилната инфраструктура, како и зголемена меѓународна финансиска помош за справување со хуманитарната катастрофа во Судан.

Дописничката на „Њујорк пост“ од Белата куќа, Емили Гудин, денес изјави дека американскиот персонал не дозволил никакви кинески предмети да се внесат во авионот на американскиот претседател пред полетувањето за Соединетите Американски Држави, според написите.

„Американскиот персонал зел сè што кинеските претставници ѝ ги предале на делегацијата, вклучувајќи ги и акредитивите, привремените телефони и беџовите и ги фрлиле во корпа пред да се качат на авионот „Ер Форс Уан“. Ништо од Кина не било дозволено во авионот“, напиша таа на Икс.

Трамп беше во тридневна посета на Кина, прва посета на американски претседател од 2017 година.

Тој претходно денес изјави дека војната со Иран е меѓу главните теми на дискусија со кинеското раководство, сугерирајќи дека Пекинг го дели ставот на Вашингтон за потребата од прекин на конфликтот и отворање на Ормускиот теснец.

Трамп, исто така, рече дека тој и Шји постигнале „фантастични трговски договори“ и дека сè уште не донел одлука за големата продажба на американско оружје на Тајван.

Директорката на Одделот за подготвеност и превенција на епидемии и пандемии при Светската здравствена организација (СЗО), Марија ван Керхове, денес изјави дека во Соединетите Американски Држави е потврдено дека едно лице кое имало нејасен резултат од тестот подоцна било негативно на хантавирус, што го намалило вкупниот број на случаи во светот од 11 на 10.

Ван Керхове изјави дека претходниот извештај на агенцијата вклучувал едно лице кое имало неопределен резултат од тестот, а тоа било лице од Соединетите Американски Држави, пренесува Ројтерс.

„Подоцна добивме потврда од САД дека ова лице било негативно“, истакна таа.

Во САД, здравствената состојба на 41 лице се следи поради можноста да се заразени со хантавирусот, објави вчера Американскиот центар за контрола и превенција на болести (CDC).

Овие лица беа замолени да останат дома и да избегнуваат контакт со други во текот на 42-дневниот период на следење.

Дејвид Фитер, докторот задолжен за ситуацијата со хантавирусот во ЦДЦ, рече дека сите потенцијално заразени лица доаѓаат од „три главни групи“ на потенцијално заразени.

„Ова се патници кои неодамна се репатрирани и се наоѓаат во Небраска и Емори, потоа патници кои го напуштиле крузерот и се вратиле дома пред да се забележи епидемијата, и трето, оние кои можеби биле изложени на вирусот за време на патувањето, особено на летови каде што имало симптоматски случаи“, рече Фитер.

Епидемија на смртоносен хантавирус (сој од Андите) избувна на холандскиот крузер „MV Hondius“ во април оваа година, додека бил на пат од Аргентина кон Зелен ’Рт, а СЗО предупредува дека се очекува зголемување на бројот на случаи поради долгиот период на инкубација (шест до осум недели) и блискиот контакт на патниците.