Киев ги прифати барањата на Унгарија за малцинските права во Закарпатје

Договорот меѓу Унгарија и Украина за регулирање на образовните, културните и јазичните права на унгарското малцинство во регионот Закарпатје и официјално стапи на сила, соопшти денеска унгарскиот премиер Петер Маѓар на својот Фејсбук профил.

Брзо решение по децениски застој

Според информациите што ги пренесува новинската агенција МТИ, украинската страна се согласи целосно да ги исполни сите точки од официјалниот протокол. Договорот веќе е имплементиран во украинскиот акциски план на Европската Унија за етничките малцинства.

„Успeавме да го решиме ова прашање за само неколку недели, нешто што владата на Орбан не успеа да го направи цели десет години“, истакна премиерот Маѓар.

Тој оцени дека овој чекор е огромен напредок кон долгорочно гарантирање на јазичните, образовните, културните и политичките права на унгарската заедница во Закарпатје, нагласувајќи дека претходниот експертски договор сега е целосно потврден и на највисоко политичко ниво.

Правата на малцинствата како дел од европската агенда

Со одлуката на Киев да го вклучи овој договор во официјалниот акциски план за ЕУ, прашањето за правата на закарпатските Унгарци прерасна во директна европска обврска и јасно очекување од страна на Брисел.

ЕУ како гарант: Без малцински права нема членство

Спроведувањето на договорените точки ќе биде под будно око на Брисел. Имплементацијата на преземените обврски редовно ќе ја следат Европската комисија и Европскиот совет.

Унгарскиот премиер испрати и јасна порака до Киев, потенцирајќи дека доколку Украина не ги исполни своите обврски навремено, нема да може да го продолжи својот пат кон пристапувањето во Европската Унија.