Свет
Клинтон го обвинува FBI за изборниот пораз
Кандидатката на штотуку завршените избори за претседател на САД од Демократската партија, Хилари Клинтон, го обвини во саботата директорот на Федералното биро за истраги (FBI) Џејмс Коми, за поразот на изборите кој не го очекуваше, во телефонски разговор со најголемите донатори, објавија во неделата двајца учесници на разговорите.
Најголемиот број од анкетите предвидуваа победа на Хилари Клинтон на 8-ми ноември. Меѓутоа, нов претседател на САД стана кандидатот на Републиканската партија, Доналд Трамп, што претставуваше шок за многу Американци кои покренаа протести против неговиот избор.
Клинтон не се појавуваше во јавноста по говорот во средата утрото во кој го призна изборниот пораз. Поранешната прва дама и државна секретарка на донаторите во саботата им кажала дека нејзиниот тим ги анализирал предизборните анкети и заклучил дека пресвртница претставувало писмото на директорот на FBI, за повторно отворање на истрагата во врска со нејзината електронска пошта од приватните сервери и адреси за службена комуникација.
„Постојат многу причини поради коишто овие избори не беа успешни…Според нашето мислење, писмото на Коми (за обновување на истрагата – з.р.) предизвика сомневања, кои беа неосновани и ги попречија напите активности“, рекла Клинтон во саботата на прошталната средба со некои од донаторите, дознава весникот The Washington Post.
Според агенцијата Reuters, Клинтон во некои телефонски разговори истакнала дека писмото на Коми за покренување нова истрага за користењето на нејзината електронска пошта, предизвикало пад на поддршката на средниот запад на САД, рекле изворите.
Коми десет дена пред изборите го извести Конгресот дека повторно ја отвора истрагата за тоа како во тоа време според повеќето анкети водечката кандидатка за Белата куќа ја користела приватната електронска пошта додека била државна секретарка, по откривањето на нови преписки кои изгледале важни.
Потоа на два дена пред изборите објави писмо до пратениците во кое вели дека проверката на новооткриената електронска пошта на Клинтон не го променила заклучокот на FBI дека не постои причина за кривично гонење на Клинтон поради употребата на приватниот сервер.
Клинтон на донаторите им рекла дека Трамп ги искористил двете писма на Коми за напади врз неа. Иако ѝ е мило што второто писмо ја ослободило од вина, Клинтон смета дека тоа го зајакнало уверувањето на гласачите на Трамп дека системот е наместен во нејзина полза и ги мотивирало да излезат на избори.
„Тие пресвртни настани на крајот од кампањата биле премногу за нас“, било наведено во анализата изборните анкети и на поразот од страна на тимот на Клинтон.
Портпаролот на FBI не бил достапен за коментар.
Денис Чанг, финансиски директор на кампањата на Хилари Клинтон, изјавил дека Демократската партија и изборниот тим собрале повеќе од 900 милиони долари од околу три милиони донатори, рекле учесниците во споменатите разговори./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Во Индија почнаа изборите, кои ќе траат шест недели, а ќе гласаат речиси 970 милиони
Денеска, почнаа најобемните избори во светот, а речиси 970 милиони регистрирани гласачи во Индија учествуваат во овој огромен процес, кој ќе се одвива во седум фази и ќе трае дури шест недели.
Премиерот Нарендра Моди се надева дека ќе освои трет последователен мандат во земјата со 1,4 милијарда жители. Гласачите, всушност, не го избираат директно премиерот, туку 543-те пратеници на Лок Сабха, долниот дом на парламентот на најнаселената земја во светот, објави „Дојче веле“.
На натпреварот учествуваат шест национални партии, 57 партии од индиските сојузни држави и 2.597 помали партии. Сепак, главната трка ќе биде меѓу двете најголеми политички партии во Индија: владејачката Индиска народна партија (БЈП) и опозицискиот Индиски национален конгрес (ИНЦ) или скратено Конгресната партија.
За да се спротивстави на владејачката БЈП и премиерот Моди, Конгресната партија формира сојуз од 28 партии, наречен Индиски национален развој – инклузивен сојуз.
Според анкетите, премиерот Моди и неговата хинду-националистичка БЈП се очекува да победат на изборите оваа година.
Моди е популарен лидер, делумно благодарение на агендата насочена кон хинду-мнозинството во Индија, кое сочинува 80 отсто од населението.
Свет
Русија повика на воздржаност помеѓу Израел и Иран
Русија повика на воздржаност по информациите за напад на Израел врз Иран.
Портпаролот на Кремљ, Дмитриј Песков, изјави денеска за новинарите дека Русија ги проучува деталите за нападот и дека ќе го коментира кога ќе се разјасни неговата природа.
„Во секој случај, без разлика на сѐ, продолжуваме да се залагаме за воздржаност од двете страни за да нема дејства што би предизвикале натамошна ескалација на тензиите во регионот“, рече Песков.
Русија и Иран имаат блиско партнерство. За време на инвазијата на Украина, Москва користи беспилотни летала „Шахед“ од иранско производство.
Свет
(Видео) Туристи малтретирале мечиња за селфи, па ги фатила полиција во Северна Каролина
Во станбен комплекс во округот Бункомб, Северна Каролина, шест лица се снимени како влечат мали мечиња од гранките на дрвото за кои се држеле, а сè со цел да позираат за фотографија. Шестемина ги тегнеле двете мечиња, а едното дури им испаднало од рацете во текот на снимањето.
Кога снимките од инцидентот стигнале до експертите што се занимаваат со заштита на дивите животни, тие веднаш излегле на терен и повикале полиција. Меѓу нив бил и биологот Ешли Хобс, која за „Еј-би-си 13 њуз“ рекла дека кога пристигнала до дрвото каде што луѓето се фотографирале, пронашла само едно мече. Целото било влажно и смрзнато, па било дадено на човечка грижа и нега за да закрепне. Поради тоа, сосема е можно никогаш да не може да се вратат во дивината бидејќи мечките што растат со луѓе потоа не сакаат да ги напуштат. Неверојатно, но можно е некој да ѝ го уништил животот на мечката само за да добие убава фотографија за социјалните мрежи.
„Мечето преживеа големо трауматско искуство. На луѓето што го направија тоа им објаснивме колку е неодговорно и потенцијално смртоносно за мечето да се одвои од мајка си, а особено на овој начин да го влечат од дрвото“, рекла Хобс, пренесува „Унилад“.
По објавувањето на видеото, многумина се згрозиле од она што го направиле овие луѓе. За сето тоа морало да разговараат и со полицијата.