Американскиот претседател Доналд Трамп објави дека Израел и Либан постигнале договор за десетдневно примирје кое ќе стапи на сила вечерва.

Трамп потврди дека имал „одлични разговори“ со либанскиот претседател Џозеф Аун и израелскиот премиер Бенјамин Нетанјаху, велејќи дека ова е десеттата војна што ја решава.

Во првиот разговор меѓу двајцата лидери откако Аун ја презеде функцијата, либанскиот претседател му се заблагодари на Трамп за неговите напори за постигнување мир и ја изрази својата желба за итно прекинување на непријателствата. Трамп ја повтори својата поддршка за Либан и својата посветеност на постигнување траен мир и стабилност, пренесуваат светските медиуми.

„Тукушто имав одлични разговори со почитуваниот либански претседател Џозеф Аун и израелскиот премиер Биби Нетанјаху. Двајцата лидери се согласија официјално да започнат 10-дневен прекин на огнот за да се постигне мир меѓу нивните земји“, напиша Тармп, според светските медиуми.

Објавата, според написите, дојде откако претставниците на Израел и Либан се сретнаа во Вашингтон во вторникот, нивната прва официјална средба по 34 години. Домаќин на состанокот беше американскиот државен секретар Марко Рубио.

Претседателот на САД истакна дека ги задолжил највисоките американски претставници на понатамошна работа за постигнување траен мир. „Им наложив на потпретседателот Џ.Д. Венс и државниот секретар Рубио, заедно со началникот на Здружениот генералштаб Ден „Разин“ Кејн, да работат со Израел и Либан за да се постигне траен мир“, рече тој.

Тој ја заврши својата објава со оптимистички тон. „Имав чест да решам девет војни низ целиот свет, а ова ќе биде мојата десетта. Затоа, да го направиме тоа!“

Победникот на унгарските избори, Петер Маѓар, ѝ порача на владејачката партија Фидес, предводена од поранешниот премиер Виктор Орбан, дека нема да избега од одговорност за политиките што ги водеше во последните години.

„Им го кажувам ова на лидерите на Фидес: без разлика колку се преправате дека ништо не се случило, ние знаеме што сте им направиле на нашата татковина и на унгарскиот народ. Не се сомневајте ни за момент – ќе пожнеете што сте посеале“, напиша Маѓар на социјалната мрежа Икс.

Маѓар извојува убедлива победа со својата партија Тиса на изборите во неделата, со што заврши 16-годишното владеење на Виктор Орбан. Тоа е еден од најголемите политички пресврти во модерната унгарска политика, а се очекува да се формира нова влада предводена од Маѓар.

Агенциите велат дека неговата кампања била фокусирана на борба против корупцијата и демонтирање на системот што Фидес го градеше повеќе од една деценија, со силна поддршка од градските гласачи и помладите генерации.

По победата, Маѓар за прв пат се појави на унгарските јавни медиуми, на кои не беше поканет за време на кампањата. Прво се појави на радио Кошут, а потоа во емисија во живо на телевизијата М1, каде што остро го критикуваше начинот на кој функционираат државните медиуми.

„Веднаш ќе ја суспендираме оваа лажна информативна програма што се одвива тука и ќе воспоставиме независни, објективни и непристрасни услови“, рече тој, додавајќи дека тоа е „фабрика на лаги“ што ќе престане со работа по формирањето на новата влада.

Потоа уште поостро ја критикуваше ситуацијата со медиумите: „Ќе создадеме услови за објективни и непристрасни медиуми. Знаеме дека нема совршени медиуми, но она што се случува тука од 2010 година би го натерало Гебелс или севернокорејски диктатор да си ги лиже усните. Ниту еден вистинит збор не е кажан и ова не може да продолжи“, рече Маѓар.

Маѓар повтори дека неговата влада ќе ги исполни клучните услови за деблокирање на европските средства, вклучително и приклучување кон Европското јавно обвинителство, враќање на независноста на институциите и медиумите и укинување на државната пропаганда.

Тој исто така тврдеше дека претходната влада трошела околу 600 милијарди форинти годишно за „лажна пропаганда“ и најави зајакнување на академските слободи и универзитетската автономија.

Европа би можела да остане без гориво за авиони за само шест недели, предупреди денес директорот на Меѓународната агенција за енергија (ИЕА) Фатих Бирол и посочи на сè посериозните последици од кризата предизвикана од војната на Блискиот Исток и блокадата на Ормускиот теснец.

Во интервју за АП, Бирол оцени дека блокадата на клучниот морски пат за транспорт на нафта би можела да предизвика „најголемата енергетска криза со која некогаш сме се соочиле“, со предупредување дека последиците за глобалната економија ќе бидат потешки колку подолго трае кризата.

Според него, прекините во снабдувањето веќе водат до зголемување на цените на горивото, гасот и електричната енергија, при што одредени региони ќе бидат погодени повеќе од другите.

Тој претходно предупреди дека недостигот дополнително ќе се продлабочи во април, кога загубите во снабдувањето со нафта би можеле да бидат двојно поголеми од март, објавува CNN.

Бирол изјави дека последиците би можеле да бидат зголемување на инфлацијата и забавување на економскиот раст, особено во земјите во развој, со можност за воведување рационализација на енергијата во одредени земји.

Главниот економист на „Ристад енерџи“, Клаудио Галимберти, за Си-Ен-Ен изјави дека понатамошниот развој на ситуацијата во авиоиндустријата ќе зависи од тоа колку нафта и деривати ќе можат да поминат низ Ормускиот теснец.

Економистот на холандската банка ING Рико Луман истакна дека некои танкери веќе се запрени, што значи дека испораките од регионот на Блискиот Исток практично се запрени и дека е потребно итно да се најдат алтернативни извори на снабдување.

Кризата доаѓа во време кога европските авиокомпании се подготвуваат за летната туристичка сезона, која носи значителни приходи.

Според податоците на организацијата ACI Europe, воздушниот транспорт под нормални околности годишно генерира 851 милијарда евра бруто домашен производ и поддржува околу 14 милиони работни места во Европа.

Организацијата предупреди на можни проблеми во летната сезона, со „сериозни економски последици“ за земјите што зависат од туризмот и воздушниот сообраќај, доколку кризата со снабдувањето со енергија продолжи, пренесува Танјуг.