Рускиот претседател Владимир Путин по повод Денот на Русија изјави дека единството, патриотизмот и почитувањето на историското наследство се клучните вредности што го обединуваат рускиот народ и претставуваат основа на силата на државата.

Зборувајќи на церемонијата на доделување државни награди во Големиот Кремљски дворец, Путин рече дека Русија го слави овој празник со гордост за работата и воените достигнувања на претходните генерации, објави Риа Новости.

„Го славиме овој празник со топол, искрен став кон нашата татковина, со гордост за огромната работа и воените достигнувања на многу генерации наши предци, со почит кон клучните настани во историјата на нашата нација и со разбирање дека сите фази од повеќе од илјадагодишното патување на нашата земја се една единствена целина“, рече Путин.

Рускиот претседател истакна дека длабоката поврзаност на граѓаните со Русија се рефлектира во карактерот на народот за кого единството и патриотизмот отсекогаш биле основни вредности.

Според него, поддршката на руското општество на учесниците во „специјалната воена операција“ претставува важен извор на морална и духовна сила.

„Искреното чувство на одговорност за Татковината е блиску до секој од нас, а за оние што учествуваат во специјална воена операција, тоа е сигурна духовна поддршка. Сите споделуваме заеднички цели“, рече Путин.

Зборувајќи за важноста на културата и историјата, рускиот претседател оцени дека силата на државата се темели на континуитетот на традицијата и зачувувањето на националното наследство.

„Делото на овогодинешните лауреати во областа на литературата и уметноста е обединето од темата за историјата на руската држава и гордоста во нејзините достигнувања, како и разбирањето дека силата на Татковината лежи во континуитетот на традициите и почитувањето на нејзиното наследство и големата култура“, рече Путин.

На овој национален празник, рускиот претседател традиционално доделува титули Херој на трудот и државни награди за достигнувања во науката, технологијата, литературата, уметноста, хуманитарната работа, добротворните активности и заштитата на човековите права.

САД планираат значително да го намалат бројот на своите авиони и бродови што му се на располагање на НАТО во Европа, пишува денес американскиот весник „Њујорк Тајмс“, повикувајќи се на двајца неименувани високи европски функционери.

Ова би ја ограничило способноста на воената алијанса да спроведува напади со долг дострел и да врши надзор.

САД ја објавија одлуката на своите сојузници на почетокот на јуни во писмен документ според „Њујорк Тајмс“.

Планирано е САД да го намалат бројот на своите ловци Ф-16 и Ф-15Е од 150 на 100 и бројот на поморски извидувачки авиони од 26 на 15.

Сите осум авиони-танкери за полнење гориво ќе бидат повлечени од Европа, како и подморница за лансирање ракети и носач на авиони со придружни авиони и неколку воени бродови.

Една од двете групи бомбардери исто така ќе биде повлечена.

Пентагон одби да коментира за конкретните бројки во документот и се повика на соопштението од својата Европска команда од минатата недела, во кое генерално наведува дека има намера да го намали присуството на американските сили во Европа.

Американската војска сè уште не објави временска рамка за повлекувањето, но американските претставници претходно посочија дека тоа ќе стапи на сила многу наскоро, многу порано отколку што очекуваа европските земји.

Наглото намалување на бројот на американските сили во Европа би влијаело на способноста на НАТО да го следи движењето на руските подморници или да лансира ракети „Томахавк“ со долг дострел длабоко на руска територија, според „Њујорк тајмс“.

Американската поп-ѕвезда Аријана Гранде побара од Белата куќа да не ја користи нејзината музика во видеото во кое американската администрација ја промовира својата имиграциска политика на социјалната мрежа „Tик-ток“.

„Ве молам, не ја користете мојата музика во врска со оваа варварска, нехумана, одвратна глупост“, напиша Гранде во коментар на објавата на „Tик-ток“, пренесува BBC.

Портпаролката на Белата куќа, Абигејл Џексон, одговори на критиките на пејачката, велејќи дека „нелегалните мигранти“ се оние кои извршуваат сериозни кривични дела.

„Она што е навистина варварско, нехумано и гнасно се криминалните нелегални странци кои повредиле и убиле невини американски граѓани“, рече Џексон.

Белата куќа во понеделникот објави снимки од агенти на Службата за имиграција и царина (ICE) како им ставаат лисици на луѓе додека хитот на Аријана од 2024 година свири во позадина.

Акцијата на граничните агенти беше спроведена како дел од законот потпишан од американскиот претседател Доналд Трамп, со кој се одобрува финансирање од повеќе од 70 милијарди долари за агенциите за имиграција за преостанатите две и пол години од неговиот претседателски мандат.

Откако Гранде одговори на објавата, видеото беше исклучено, а нејзиниот коментар беше отстранет.

Минатата година, поп-пејачката Сабрина Карпентер, исто така, побара нејзината музика да не се користи во монтажите, откако снимка од Белата куќа користеше дел од нејзината песна од 2024 година „Џуно“ во компилација што ги прикажува операциите на ICE.

„Никогаш не ме вклучувајте мене или мојата музика во унапредувањето на вашата нехумана агенда“, напиша Карпентер во тоа време.

ABBA, Селин Дион и Бијонсе, исто така, инсистираа тимот на Трамп да не ја користи нивната музика за време на кампањата за реизбор во 2024 година и на предизборните митинзи, потсетува Би-Би-Си, како што објави Танјуг.