Макрон за односот со Трамп: Дипломатијата не е само примање на оние со кои се согласувате

Францускиот претседател Емануел Макрон денес изјави дека „секогаш одржувал дијалог“ и „секогаш имал доверба“ во американскиот претседател Доналд Трамп, кој направи неочекуван пресврт во корист на Украина за време на самитот на Г7 во Евијан. „Секогаш му кажував како стојат работите. Кога не се согласуваме, го признаваметоа, но кога ветува нешто, се држи до тоа“, рече францускиот претседател на прес-конференција.

Макрон топло го пречека Трамп, кој не е обожавател на толку големи меѓународни собири, па дури и го напушти самитот на Г7 во Канада на почетокот на минатата година. Тој ќе го угости во Версајската палата вечерва, што предизвика критики од противниците на Макрон кои тврдат дека е премногу помирлив кон американскиот претседател.

„Доколку не бев доследен во одржувањето на односот во текот на изминатите неколку месеци, можеше да се сомневате во неговата динамика“, рече францускиот претседател.

Макрон објасни дека „секогаш одржувал дијалог“ затоа што дипломатијата не е само „прием на луѓе со кои целосно се согласувате“. Додаде дека Франција знае како да се однесува кон своите гости. „Да не се срамиме од тоа кои сме. Версај е дипломатски инструмент и инструмент на моќ“, нагласи тој.

Користејќи спортски жаргон, Макрон рече дека, како и француската фудбалска репрезентација, без разлика дали игра на гости или дома, целта е секогаш да се постигнуваат голови.

Трамп се закани дека ќе воведе 100-процентна царина на француските вина непосредно пред да пристигне на самитот на Г7.

фото/Depositphotos