Мерц: Русија со месеци го подготвувала нападот врз аеродромот Лајпциг, избегнавме катастрофа

Германскиот канцелар Фридрих Мерц изјави дека обидот за напад со дрон врз аеродромот Лајпциг/Хале бил со месеци подготвуван во Русија и директно насочен против Германија.

„Само по чиста среќа избегнавме голема материјална штета и човечки жртви“, рече Мерц во обраќањето пред Бундестагот, додавајќи дека катастрофа била спречена во последен момент.

Германската влада на 1 септември првпат директно ја обвини Русија за обидот за напад. На 4 август во близина на украински товарни авиони на аеродромот бил пронајден дрон со експлозивна направа, која не експлодирала бидејќи детонаторот бил неисправен. Истражителите се сомневаат дека втор дрон удрил во товарен авион, а десетина дена подоцна во околината бил пронајден и трет.

Аеродромот Лајпциг/Хале, покрај цивилниот и товарниот сообраќај, го користат германската армија и сојузниците од НАТО за транспорт на воена опрема. Таму се наоѓа и база на украинската компанија „Антонов ерлајнс“.

Германскиот министер за внатрешни работи Александер Добринт оцени дека инцидентот одговара на „добро познатиот образец на руски хибридни операции во Европа“. Берлин најави затворање на рускиот конзулат и Рускиот дом на науката и културата, како и дополнителен притисок врз Москва.

Русија ги отфрла обвинувањата. Рускиот министер за надворешни работи Сергеј Лавров го обвини Мерц дека на Москва „практично ѝ објавува војна“, додека Владимир Путин тврди дека Берлин подметнал докази за нападот да ѝ го припише на Русија.

Изјавите на Мерц доаѓаат неколку дена по убедливата победа на АфД на изборите во Саксонија-Анхалт, каде партијата освои 43,8 отсто од гласовите и 39 од 83 пратенички места. АфД се залага за намалување или прекин на дел од германската помош за Украина и за нормализирање на односите со Москва.