Свет
Нетанјаху: Резолуцијата на ОН ја формулирала и иницирала администрацијата на Обама
Резолуцијата за израелските доселенички населби во палестинската енклава Западен брег која во петокот ја донесе Советот за безбедност при Обединетите нации била формулирана и иницирана од страна на американскиот претседател на заминување Барак Обама, изјави во неделата израелскиот премиер Бенјамин Нетанјаху на седмичната седмица на владата во Ерусалим.
Советот за безбедност на ОН во петокот усвои резолуција со која се осудува израелското населување на териториите коишто меѓународната заедница ги смета за палестински окупирани од Израел по војната од 1967 година и се повикува Израел да престане со таквата практика. За резолуцијата гласаа 14 држави постојани непостојани членки, а САД, кои се израелски стратешки сојузник и имаат право на вето, беа воздржани со што го овозможија всушност носењето на резолуцијата.
„Според информациите коишто ги поседуваме, таа резолуција, без сомнение, била иницирана од администрацијата на Обама, која стои во заднината, подготвувајќи ја формулацијата и барајќи го нејзиното прифаќање“, се наведува во изјавата на израелскиот премиер Бенјамин Нетанјаху која ја објави неговиот кабинет.
Според Нетанјаху, ваквите активности на Вашингтон се „во спротивност со традиционалната политика на САД, којашто презема обврска да не се обидува да наметнува услови за постојаниот статус (од договорот со Палестинците – з.р.) и да не покренува прашања кои се однесуваат на тоа пред Советот за безбедност на ОН, а исто така и со недвосмислената обврска на самиот претседател Обама дадена во 2011 година, за избегнување на таквите чекори“.
Израелскиот премиер во изјавата додава и дека „ги споделува гневот на членовите на израелската влада и нивното разочарување од неправедната, непријателка кон државата Израел, резолуција која ја изгласа Советот за безбедност на ОН“.
Нетанјаху, исто така, истакнува дека „во изминатите децении имаше разлики меѓу американските и израелските влади по прашањето на населбите“. „Сепак, ние секогаш се согласувавме дека Советот за безбедност на ОН е погрешното место за решавање на ова прашање. Знаевме дека обраќањето во оваа институција само ќе го комплицира преговарачкиот процес и ќе го оддалечи од нас постигнувањето на мирот“, додава.
Израелскиот челник наведува дека минатиот четврток му порачал на американскиот државен секретар Џон Кери дека „пријателите не ги дознаваат меѓусебните односи во Советот за безбедност на ОН“. „Притоа, изјавите на нашите пријатели во САД, како републиканци, така и демократи, ми влеваат надеж. Се надевам дека ќе почнеме да работиме со нашите пријатели и со новата американска администрација, којашто ќе ги преземе своите должности следниот месец“, додава Нетанјаху.
Премиерот, исто така, вети дека неговата влада ќе стори сé што е возможно Израел да не претрпи штети од резолуцијата“ и оти им препорачал на министрите „да дејствуваат разборито, одговорно и смирено, како со постапките, така и со изјавите“.
Нетанјаху на своите министри официјално им потврдил дека му наложил на израелското министерство за надворешни работи да подготви план за дејствување во однос на ОН и другите меѓународни организации и да го претстават на владина седница во период од еден месец. „Дотогаш, исто така, ќе разгледуваме и дополнителни чекори“, додава./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Украина тврди дека соборила руски бомбардер
Украинските воздухопловни сили денеска соопштија дека собориле руски стратешки бомбардер, за прв пат од почетокот на руската инвазија, а Москва објави дека авионот се урнал поради „технички дефект“ и дека еден член на екипажот загинал.
„За прв пат противвоздушните ракетни единици на Военото воздухопловство во соработка со одбранбеното разузнавање на Украина го уништија стратешкиот бомбардер со долг дострел Ту-22М3, кој носи крстосувачки ракети Х-22“, изјави командантот на украинските воздухопловни сили на Телеграм.
Украинската воена разузнавачка служба (ГУР) соопшти дека рускиот авион „бил соборен благодарение на специјалната операција спроведена од украинското одбранбено разузнавање во соработка со воздухопловните сили“.
Руското Министерство за одбрана не потврди дека украинската страна нападнала еден нејзин авион, но воен извор изјавил за новинската агенција ТАСС дека бомбардерот Тупољев-22М3 се урнал во регионот Ставропол по борбена мисија додека се враќал во базата. Според овој извор, авионот не носел оружје.
Свет
САД ставија вето на приемот на Палестина во ОН
Соединетите Американски Држави ставија вето на нацрт-резолуцијата на Советот за безбедност на Обединетите нации „Државата Палестина да биде прифатена како членка на ОН“.
Воздржани беа Велика Британија и Швајцарија, а „за“ гласаа Словенија, Сиера Леоне, Русија, Јужна Кореја, Мозамбик, Малта, Јапонија, Франција, Гвајана, Еквадор, Кина и Алжир.
Претходно вчера, заменик-портпаролот на американскиот Стејт департмент, Ведант Пател, потврди дека Вашингтон ќе стави вето на гласањето во Советот за безбедност на ОН наведувајќи дека нема едногласно мислење меѓу членовите на комитетот за тоа дали Палестинците ги исполнуваат критериумите неопходни за да бидат дефинирани како држава.
Палестинската управа (ПА) го осуди потегот нарекувајќи го „нефер, неетички и неоправдан“.
Кабинетот на претседателот на палестинската управа, Махмуд Абас, го нарече американското вето „еклатантна агресија …туркање на регионот преку работ“.
Израелскиот министер за надворешни работи, Израел Кац, го пофали американското вето додавајќи: „Срамниот предлог беше отфрлен. Тероризмот нема да биде награден“.
Свет
Небензја: Америка го крши духот на Палестинците, ги принудува да му се покорат на Израел
САД, кои ја блокираа резолуцијата за Палестина во Советот за безбедност на ОН, се обидуваат да ја скршат волјата на Палестинците и да ги принудат да му се покорат на Израел, изјави постојаниот претставник на Русија во ОН, Василиј Небензја.
„Со користењето на ветото петтипат од почетокот на ескалацијата во Газа тие повторно го покажаа својот вистински однос кон Палестинците. Според мислењето на Вашингтон, тие не заслужуваат да имаат своја земја“, изјави Небензја.
Тој истакна дека Палестинците се само пречка на патот кон остварување на интересите на Израел.
„САД се подготвени да ги затворат очите пред злосторствата на Израел врз цивилите во Газа, да го игнорираат илегалното населување на Западен Ерусалим на Западниот Брег. Целта е да се скрши духот на Палестинците, да се натераат безусловно да се потчинат на окупаторската власт, да се претворат во слуги и луѓе од втор ред, а можеби и целосно да се искоренат и протераат од нивната родна земја“, изјави Небензја по гласањето за нацрт-резолуцијата за прием на Палестина во ОН.
Како што истакна, резултатот од гласањето во Советот за безбедност на ОН за резолуцијата за прием на Палестина во ОН како полноправна членка покажува дека САД се речиси целосно изолирани.
„Страдањата на палестинските цивили одекнуваат во срцата и душите на милиони луѓе во светот. Во земјите што доставуваат оружје за Западен Ерусалим сѐ почесто се слушаат гласовите на оние пто се за забрана на таквите испораки. Резултатите од гласањето, кога Вашингтон се најде речиси целосно изолиран, зборуваат сами за себе“, рече рускиот дипломат.
Тој оцени дека американското вето е „неплоден обид да се запре неуморниот тек на историјата“.
„Гледајќи низ прсти на најнепромислените постапки на нашиот сојузник (Израел), немањето желба за барање праведни решенија, е директен пат кон натамошно лизгање во бездната на војната што може да го зафати целиот регион“, рече Небензја.
Тој рече и дека таквата политика е недостојна за една голема сила.
„Историјата нема да ви го прости тоа. Ги повикуваме САД да го слушаат гласот на разумот и да размислат за последиците од нивните одлуки“, рече Небензја.